Budyšin (CS/SN). We wobłuku dnja wotewrjeneje zahrody móžachu sej zajimcy minjenu njedźelu w Budyšinje a wokolinje jědnaće zahrod(k)ow wobhladać. Mjez nimi běchu priwatne runje tak kaž tej klóštra klarisow a Diakoniskeho skutka. Prěni raz wobdźěli so na akciji Ilona Marschner. Wona je 1 000 kwadratnych metrow wulku zahrodu na zapadnej kromje sprjewineho města na zelenu oazu přetworiła. Jeje lubosć za stare meble bě wopytowarjam wočiwidna. Runje tak lubuje wona róže. Na jeje zahrodźe sy samo do kupanskeje wanje zalězć móhł, runje do teje, kotraž bě tydźeń do toho we wobłuku swjedźenja pod Starej wodarnju stała.
Lawski wěžer Andreas Thronicker přewodźeše połsta zajimcow po Budyskich zahrod(k)ach. Pěši zmištrowachu wobdźělnicy wosom kilometrow dołhi puć. Tón skónči so w parku Weigangec wile, hdźež čakachu na nich wiki rjanych wěcow. Mjez druhim nańdźechu tam kreatiwnje zhotowjenu pychu na hłowu, dekoraciju za dom a zahrod(k)u kaž tež tójšto kulinariskeho. Młodźi muzikanća starachu so wo hudźbne wobrubjenje na harfje a na akordeonje.