Za jězbu so přizjewić
Chrósćicy. Župa „Michał Hórnik“ přeproša swojich čłonow a dalšich zajimcow na kubłansku jězbu sobotu, 30. septembra, do Wrócławja. Na programje steja wodźenje po měsće, wopyt tachantskeje cyrkwje a dalšich wosebitosćow města. Wotjězd je w 7 hodź. z Chrósćic. Swójski přinošk z wobjedom wučinja 25 eurow za dorosćenych a 15 eurow za dźěći. Přizjewjenja přijimuja hač do 20. septembra w regionalnym běrowje Domowiny w Chrósćicach pod telefonowym čisłom 035796/ 96 254 abo pod emailowej adresu .
Na dworowy swjedźeń
Dubrjenk. Šesty dworowy swjedźeń budźe njedźelu, 20. awgusta, w Dubrjenskim Krječmarjec hosćencu. Wot 11 hodź. změja tam wobjed a jězby z konjacym zapřahom po Dubrjenskim bahnje. W 14 hodź. započnje so wubědźowanje w kałanju wěnca, na čimž chce so něhdźe 15 jěcharjow wobdźělić. W 16 hodź. přizamknje so wubědźowanje konjacych zapřahow z něhdźe runje telko korejtami. Wězo poskića popołdnju kofej a tykanc, dźěćom pak zabawu na skakanskim hrodźe a při paslenju. Wšitcy su do Dubrjenka přeprošeni.
Motorscy so zetkaja
Nukstock zaso woła
Policija (18.08.17)
Chětro hłuboko do škleńcy hladała
Delnja Hórka. Zo policija alkoholizowanych šoferow lepi, so nimale wšědnje stawa. Zo pak něchtó po připołdnju hižo z 3,52 promilemi alkohola w kreji z awtom jězdźi, je njewšědne. Stało je so to zawčerawšim, srjedu, w 13.30 hodź. na Delnjohórčanskim přemysłownišću. Po pokiwje swědka kontrolowachu tam 49lětnu wodźerku Opela. Dokelž měješe wona chětru „chorhojčku“, přewjedźechu alkoholowy test z mjenowanym wuslědkom. Jězbnu dowolnosć žony wšak zastojnicy bohužel sćazać njemóžachu, dokelž bě wona ju druheho delikta dla hižo wotedać dyrbjała. Za to wobchowachu sej awtowy klučik a přewodźachu 49lětnu k wotedaću kreje.
Krótkopowěsće (18.08.17)
Pušćić a škodźe zadźěwać
Drježdźany. Po wotkryću dowěrliweje komunikacije zastupowaceho Budyskeho krajneho rady Uda Wićaza (CDU) z wodźacym neonacijom we wokrjesu přez rešěrše MDR a dźenika Sächsische Zeitung su Lěwica a Zeleni ministerskeho prezidenta Stanisława Tilicha a krajneho radu Michaela Hariga (wobaj CDU) namołwiłoj, Wićaza pušćić a tak škodźe Budyskemu wokrjesej zadźěwać.
Srědki za bywšu synagogu
Drježdźany/Zhorjelc. Sakske ministerstwo za wuměłstwo spěchuje saněrowanje bywšeje synagogi w Zhorjelcu z 1,5 milionami eurow, kaž ministerstwo dźensa zdźěli. Tak je wuměnjenje date, zo Zwjazk projekt ze samsnej sumu podpěruje. Z cyłkownych kóštow 3,7 milionow eurow přewozmje město 300 000 eurow. Nimo toho su wšelake załožby financielnje wobdźělene.
W jězoru so kupać
Boršć wabi do Lessingoweho města
Policija (17.08.17)
Alkoholizowaneho lepili
Šunow. Wodźerja Mercedesa su zawčerawšim wječor w Šunowje kontrolowali. Při tym zwěsćichu, zo měješe 47lětny 1,94 promilow alkohola w kreji. Jeho jězbnu dowolnosć sej hnydom wobchowachu.
W błóće tčacy wostała
Chwaćicy. Dokelž je staw wody Budyskeho spjateho jězora twarskich dźěłow dla niši hač hewak, chcyše sej to zawčerawšim 64lětna žona pola Chwaćic z kolesom bliže wobhladać. Při tym pak w błóće tčacy wosta a dyrbješe policiju na pomoc wołać.
Rozmysluja wo nowym mosće
Puć z Budyskeho turistiskeho parkowanišća do stareho města skrótšić
Budyšin (CS/SN). Poradźi-li so wšitko, móhli w Budyšinje w lěće 2020 wiziju zwoprawdźić: nowy móst nad Sprjewju, zwjazowacy turistiske parkowanišćo na Schliebenowej z Hrodom. Na te wašnje bychu sej dowolnicy a domoródni wokołopuć přez Móst měra resp. wobćežny puć přez sprjewiny doł zalutowali. Město bě Drježdźanskej techniskej uniwersiće nadawk dało zdźěłać studiju, kotruž wčera tójšto zajimcam předstajichu. 30. awgusta chce měšćanska rada wobzamknyć, kak z tym dale wobchadźeja. Wyši měšćanosta Alexander Ahrens (SPD) so nadźija, zo móža projekt klětu planować započeć a 2020 twarić.
Popłatki hišće njewobzamknyli
Rakecy (JK/SN). Jara wobšěrny bě dnjowy porjad wčerawšeho posedźenja Rakečanskich gmejnskich radźićelow po lětnjej přestawce. Tež přitomnych zajimowanych wobydlerjow bě wjace hač hewak.
Solidne a wurunane financy gmejny předstaji nawodnica financneho wotrjada gmejny Franziska Pfeiffer. Likwidita komuny je lěpša hač w minjenych lětach. K tomu přinošowała je wosebje tež Rakečanska zastaranska towaršnosć, kotrejež mějićel gmejna je. Bilanca lońšeho lěta wujewja pozitiwny trend a pod smužku 98 000 eurow nadbytka. To njeje jenož wjesnjanosta Swen Nowotny (CDU) spokojom, ale tež radźićeljo.
Krótkopowěsće (17.08.17)
Poručeja imunitu Petry zběhnyć
Drježdźany. Imunitny wuběrk Sakskeho krajneho sejma je poručił imunitu předsydki AfD Frauke Petry zběhnyć. Wuběrk je tak dźensa jednohłósnje próstwje statneho rěčnistwa wotpowědował, kotrež přepytuje přećiwo Petry pozdatnych wopačnych wuprajenjow před wólbnym pruwowanskim wuběrkom lěta 2015 dla. Petry wumjetowanja wotpokazuje.
Ulbig přećiwo pyrotechnice
Drježdźany. Sakski nutřkowny minister Markus Ulbig (CDU) wupraja so raznje přećiwo wobmjezowanemu dowolenju pyrotechniki w koparskich stadionach. Wotpowědny namjet delnjosakskeho kolegi Borisa Pistoriusa (SPD) je Ulbiga „jara překwapił“. Pistorius bě namjetował, pyrotechniku na kruće postajenych městnach stadiona dowolić.
Z ćahom ke krajanam
Praha. Čěske železniske předewzaće RegioJet je swój dotal najdlěši, nimale połkilometrowski ćah do rumunskeho Banata pósłało. Wjace hač 1 000 fanow poda so z nim na 18 hodźin trajacu jězbu na hudźbny festiwal pola 1 000 kilometrow zdaleneje čěskeje mjeńšiny. Susodny kraj pěstuje jara čiłe styki z „čěskim Banatom“.
