Brězowka (JoS/SN). Jako wopytowarski magnet su so zawčerawšim znowa wiki jutrownych jejkow w Brězowce wopo­kazali. 22 lět hižo wone lubowarjow debjenych jejkow do srjedźneje Łužicy přiwabjeja, a to předewšěm swójbneje atmosfery dla. Ta nastawa hłownje z toho, zo su wšitcy debjerjo a debjerki ze wsy a so tuž mjez sobu znaja.

Dalša wosebitosć je, zo něhdźe połojca wšitkich debjerjow k dorostej słuša. Na to su w Brězowce z prawom hordźi, přetož takle to na druhich wikach njedožiwiš. Dźědojo a wowki kaž tež starši swoje kmanosće wnučkam a dźěćom dale dawaja. To płaći za debjenje jejkow runje­ tak kaž za narodnu drastu, kotruž sy njedźelu­ w bohatej ličbje wuhladał. Dźěći a młodostni běchu so ju runje tak wo­blekli, kaž žony zrališeje generacije, štož je wikam cyłkowny dostojny raz spož­čiło.

Wjacori chětro nuzne měli

Zhorjelc. Wobchadna stražna słužba Zhorjelskeje policajskeje direkcije je njedźelu wječor a w póndźelnych rańšich hodźinach na awtodróze A 4 blisko Ottendorfa-Okrille spěšnosć měriła. W běhu šěsćhodźinskeje akcije kontrolowachu wjace hač 4 000 jězdźi­dłow. 145 šoferow bě spěšnišo hač dowolenych 130 km/h po puću. W 108 padach wosta při warnowanju. 37 wodźerjow pak měješe wosebje nuzne a dyrbi přichodne dny pokutny pjenjez zapłaćić. Njesławny rekord docpě wodźer Citroëna z Wies­badenskim čisłom, kotrehož błysknychu ze 190 km/h. Wón změje 240 eurow pokuty­ płaćić, dóstanje dwaj dypkaj w Flensburgu a dyrbi měsac nóžkować.

W šuli so paliło

Huska. W jednej rjadowniskej rumnosći Hušćanskeje šule je so sobotu rano papjernik palił. Dźeń do toho běchu šulerjo we wučbje chemije twjerde pjenjezy z acetonom­ rjedźili a wužiwanu papjeru po wšěm zdaću do papjernika ćisnyli. Hač je so papjera wotsamo zapaliła, po­licija nětko pruwuje.

Budyske partnerske towarstwo kritizuje, zo chcedźa w měsće naměsto partnerskich městow přechwatnje pomjenować. Tole bjez hosći činić chcyć wonkownemu wobrazej Budyšina njetyje.

Budyšin (CK/SN). Město Budyšin ma přichodnje naměsto měšćanskich partnerstwow měć. Kak ma so to stać, su na zašłym posedźenju měšćanskeje rady kritizowali. Předsyda měšćanskeho part­nerskeho towarstwa Tomasz Nawka mjenowaše postupowanje města „skandal“. Naměsto chcychu na kóncu tři­dnjowskeho měšćanskeho swjedźenja, „Budyskeho nalěća“, 28. meje pomjenować. Towarstwo bě wo tym jenož powšitkownje informowane. Hakle na swójske naprašowanje w zjawnostnym wotrjedźe města je Tomasz Nawka wo tym zhonił. Při tym běchu zastupjerjo towarstwa hakle spočatk měrca z wyšim měšćanostu Alexanderom Ahrensom (SPD/hač do měrca njestronjan) wo tym rěčeli, kak móhli dźěło towarstwa znowa wusměrić. „Runje w času socialnych napjatosćow a nacionalnych tendencow je dźěło towarstwa wažne za přežiwjenje“, Tomasz Nawka­ wuzběhny.

Do přewróta słušachu małe wjesne wobchody ke wšědnemu žiwjenju. Po přewróće­ so nimale wšitke zhubichu. Jedne z mało wuwzaćow nadeńdźeš w Rudeji blisko Delnjeho Wujězda.

Rudej (AK/SN). Durinski kečup je woblubowany. „Za nim so samo jězdźerjo z Łazowskeje kart-čary wobhonjeja“, powěda Hannelore Mentele. Wot lěta 1990 wjedźe wona Rudźanski mały wjesny wobchod. Na polcach wuhladaš wjele tworow z blišeje a dalšeje wokoliny, kaž Załomsku marmeladu, łužiski kisykał, błótowske kórki, Wjelećanski palenc a Budyski žonop. Čerstwy chlěb a całty dochadźeja wšědnje z Wagnerec pjekarnje w Mina­kale a z Hainec pjekarnje we Łomsku. Maja-li kupcy wosebite přeća, wobstara Hannelore Mentele tež praliny, sekt abo samo hrajki.