Hory (SN/JaW). Wulka syła ewangelskich wěriwych Wojerowskeje Janskeje wosady, mnozy dalši křesćenjo a wěriwi kaž tež hosćo su minjeny štwórtk mjeztym 17. zelenoštwórtkownu nutrnosć w Horjanskej Patokec kładźitej bróžni dožiwili. Hosćićelka, wuměłča Birgit Patokowa, kaž tež superintendent na wuměnku Friedhart Vogel so jara wjeseleštaj, zo je tež po telko lětach zajim na tymle serbsko-němskim zarjadowanju dale wulki.

Birgit Patokowa předčita postrowny list fararja Joachima Nagela, kiž bě tule zelenoštwórtkownu nutrnosć iniciěrował. Superintendent Vogel wěnowaše so w swojim prědowanju – a to bě jenički ryzy němski dźěl nutrnosće – stawiznje, kak je japoštoł Pětr Jězusa trójce zaprěł. „Njeměli swoje přeswědčenje po wětřiku, kotryž runje duje, wusměrjeć“, Vogel wuzběhny a pokaza na aktualne podawki, kaž na přesćěhanje křesćanow a tuchwilnu krizu ćěkancow dla. Wšitke kěrluše a čitanja spěwachu a słyšachu přitomni serbsce kaž němsce. Serbskorěčne čitanja přewza Měrćin Hermann. Překwapjace bě, kelko ludźi je serbske teksty kěrlušow sobu spěwało.

Pančicy (SN/mwe). Klóšterskich kři­žerjow w Pančicach-Kukowje je lětsa na přewšo dostojne wašnje farar Tomasz Dawidowski w serbskej, němskej a łaćonskej rěči wužohnował. Mjez 107 jěcharjemi, štož bě jedyn mjenje hač loni, bě sydom nowačkow. Slěborny wěnčk měješe Handrij Bulank z Pančic přityknjeny. Zo klóšterscy jěcharjo tež lětsa zaso derje spěwachu, je w prěnim rjedźe zasłužba młodeho kantora Joachima Jurenca. Wosebje na klóšterskim dworje je za wšěch, tež za konje ćežko, mjez tysacami hosći w procesionje měr wobchować. Na to pak běchu křižerjo přihotowani.
Njebjelčicy (SN/MiR). 116 křižerjow, štyri mjenje hač loni, je so jutrońčku dopoł­dnja na puć do Wotrowa nastajiło a so strowych zaso domoj nawróćiło. W lětušim Njebjelčanskim procesionje wuhladachu wěriwi wobeju wosadow a mnozy hosćo třoch nowačkow, Tristana Mjechelu ze Serbskich Pazlic kaž tež Jonasa Lehmanna a Floriana Hähnela z Njebjelčic. Blidarski mišter Tobias Cyž, kiž je prěni króć Božu matru njesł, a Bosćij Kokla z Njebjelčic jěchaštaj ze slěbornym wěnčkom.

Na jednym z Budyskich symbolow dyrbja najwšelakoriše škody, kotrež su wjedro a dalše wliwy zawostajili, wotstronić. Financować chcedźa tele předewzaće zdźěla z darami.

Budyšin (CK/SN). Po swjedźenju Budyske nalěćo chcedźa tudyšu Bohatu wěžu zaróštować. Kaž měšćanscy radźićeljo na swojim wčerawšim posedźenju jednohłósnje wobzamknychu, dyrbja jedyn ze symbolow sprjewineho města zawěsćić a saněrować. Před połdra lětom běchu wokoło wěže wotpadane dźěle wobmjetka namakali. Při dokładnišim wobhladanju zwěsćichu škody na hawbje. „Wot toho časa je jasne, zo dyrbimy so z Bohatej wěžu dokładnišo zaběrać“, rjekny wčera Falko Wendler. 1992/1993 běchu wěžu dospołnje ponowili. Zo je wobmjetk nimale 25 lět dźeržał, je realistiska doba, měnješe nawoda wysoko- a hłuboko­twarskeho zarjada města. Škody zwěsćichu nimo toho we woběmaj rumnosćomaj nad wuhladnišćom, do kotrejuž so jeno z rěblom wo­hnjoweje wobory dóstanješ. Tam su murje mokre. Tomu ma so přichodnje zadźěwać.

Dźěćacu agresiwitu rozumić

Budyšin. Lětsa steji w srjedźišću hornjoserbskich Staršiskich listow Serbskeho šulskeho towarstwa wašnje wobchadźenja mjez dźěćimi, kubłarjemi a staršimi. K tomu čitaće přinošk prof. dr. Barbary Wolf z Wysokeje šule Mittweida. W delnjoserbskim wudaću rozprawja dr. Jana Markowa wo tym, što chore dźěćo trjeba. We woběmaj wudaćomaj zhoniće wo 25lětnym skutkowanju SŠT.

Dwurěčnosć spěšnišo přesadźić

Praha. Dwurěčne mjena dróhow a napisy móža mjeńšiny w Čěskej republice přichodnje spěšnišo přesadźić. Mjeztym zo dyrbjachu dotal gmejnski wuběrk za narodne mjeńšiny załožić, dosaha nětko žadanje znajmjeńša pjeć lět wobstejacych towarstwow. Wuměnjenje je, zo ma mjeńšina dźesaćprocentowski podźěl na wobydlerstwje gmejny.

Změny pola maltezow