Zdźěla wotpušćeny Budyski spjaty jězor skići tele dny wosebite wobrazy, kotrež drje fotograf přichodne lěta hižo zapopadnyć móc njebudźe. Nimo zbytkow domow bywšich Małsec wuhladaš tam samo zdónki podrězanych štomow. Wone stejachu něhdy podłu dróhi­ do wsy, zhubjeneje z twarom spjateho jězora. Foto: SN/Maćij Bulank

W Trjebinskej gmejnje njewola přichodnu njedźelu jeno zapósłancow noweho­ zwjazkoweho sejma, ale tež noweho wjesnjanostu resp. nowu wjesnjanostku. Wo zastojnstwo prócujetaj so Ariane Kraink a Waldemar Locke.

Trjebin (AK/SN). Hórnistwo Trjebinsku gmejnu hižo wjele lět poćežuje. Brunicoweje jamy Wochozy II dla wobydlerjow Miłoraza přesydla. Haru, proch a spadowacu dnownu wodu pak maja tež w Trjebinje samym. Štóž přichodnje čestnohamtsce na čole gmejny steji, změje tuž wjele dźěła.

Gastronomija sej dźensniši dźeń zawěrno lochko nima. Raz hosćencarjo dodźěłać njemóža, dokelž njewočakowano wjele ludźi přińdźe, raz wostanje hosćenc prózdny. Ćim bóle dyrbiš hódnoćić, štož Budyscy korčmarjo kóžde lěto na nohi stajeja. Woni­ njeorganizuja jenož kóždu prěnju sobotu w meji korčmowy festiwal, ale stajnje 2. oktobra tež korčmarsku kermušu jako­ dźak hosćom za wopokazanu swěru. Tajkile wječor móžeš sej woprawdźe lubić dać a njetrjebaš za njón sam ničo orga­nizować. Hdyž w dźesać hosćencach najwšelakoriša live-hudźba zaklinči – w Culinariumje samo serbska –, je to kaž přeprošenje, při darmotnym zastupje do korčmow pohladnyć a při piwje abo winje chwilu na hudźbu słuchać. Potom dale ćehnješ abo cyle jednorje trochu po měsće dundaš. To so njech hišće něchtó hórši, zo so w sprjewinym měsće ničo njestawa. Ja znajmjeńša sej iniciatiwu Budyskich korč­marjow­ jara wažu. Marian Wjeńka

Wjesny předstejićer spřisahany

Čorny Chołmc. Peter Michala je wot wčerawšeho Čornochołmčanski wjesny předstejićer. Wojerowski socialny měšćanosta Thomas Delling (SPD) bě jeho na posedźenju wjesneje rady spřisahał. 60lětny energijowy inženjer Michala je zastojnstwo wot lońšeho junija komisarisce wukonjał, po tym zo bě předstejićer Mirko Pink wotstupił.

Eva Menasse čita w cyrkwi

Kamjenc. Znata w Berlinje bydlaca Wienska awtorka a publicistka Eva Menasse změje jutře, štwórtk, mjeztym „4. Kamjensku narěč w klóšterskej cyrkwi“. Spisowaćelka čita ze swojeje zběrki krótkopowědančkow „Zwěrjata za pokročenych“. Zarjadowanje organizuje zarjad za recepciju Lessinga we wobłuku 8. interkulturneju tydźenjow.

3,5 milionow ludźi smě wolić

Kamjenc. Něhdźe 3,5 milionow wobydlerjow Sakskeje smě so na wólbach zwjazkoweho sejma přichodnu njedźelu wobdźělić. Tole zdźěla krajny statistiski zarjad ze sydłom w Kamjencu. Ludźo smědźa we 16 wólbnych wokrjesach swój hłós wotedać. 17 politiskich stron je lětsa za wólby dowolenych a steji tuž na wotpowědnej wólbnej lisćinje.