Zo je ličba bjezdźěłnych we wuchodnej Sakskej přiběrała, so hižo dołho stało njeje. Zo je nětko tola k tomu dóšło, ma sezonalne přičiny. Wuhlady na nowe dźěłowe městna su přiwšěm dobre.

Budyšin (CK/SN). Minjeny měsac bě we wuchodnej Sakskej 22 060 žonow a muži bjez dźěła. To je połsta wjace hač w januaru. „Februar bě zawěrno jara zymny. Někajke dźěła wonka scyła móžne njeběchu“, rozłožuje šef Budyskeje dźěłoweje agentury Thomas Berndt. Snadny rozrost bjezdźěłnosće tuž žana překwapjenka njeje.

Kwota bjezdźěłnosće wosta ze 7,8 procentami konstantna. Rozdźěle mjez jednotliwymi wotnožkami sahaja wot 4,3 procentow w Kamjencu hač do 12,4 procentow w Zhorjelcu. Přirunujo z lětom 2017 bě w Hornjej Łužicy 3 230 ludźi mjenje bjezdźěłnych, štož po wuprajenju Thomasa Berndta nima jenož demografiske přičiny. Kaž je ze statistiki wučitać, maja wšitke skupiny wobydlerstwa podźěl na hospodarskim rozmachu. Mjez młódšimi hač 25lětnymi je ličba bjezdźěłnych porno minjenemu lětu runje tak woteběrała kaž mjez tymi nad 55 lětami. To płaći tohorunja za ćežko­zbrašenych a dołhodobnje bjezdźěłnych.