Budyšin (CRM/SN). Wosebje serbscy wěriwi sćěhowachu njedawno přeprošenje na duchownu hudźbu do Budyskeje Tachantskeje cyrkwje swj. Pětra. Pišćele w katolskim dźělu hraješe tónraz mjenujcy koncertny organist Stefan Kießling. Wo meditaciju je so tachantski farar kanonik Wito Sćapan starał.
Wuměłc, kotryž pochadźa ze serbskeje Žurec swójby w Bukecach, hraje mjeztym jako wuznamny swobodny pišćeler na wšěch pjeć kontinentach. Dostudowawši w Lipsku skutkowaše jako cyrkwinski hudźbnik w Choćebuzu, Lipsku a na dalšich městnach. Nětko mějachmy zbožo a wjeselo jeho, kotryž dotal hižo w 30 krajach swěta koncertowaše, live w tudyšim simultanym Božim domje na Leopolda Kohlowych pišćelach dožiwić.
