Krótkopowěsće (29.09.17)
Za wokrjes w Euroregionje
Budyšin. W sobustawskej zhromadźiznje Euroregiona Nysa z.t. zastupuja wokrjesni radźićeljo Wolfgang Zettwitz (CDU), Sven Gabriel (FDP) a Hajko Kozel (Lěwica) dale Budyski wokrjes. Wokrjesny sejmik jich wobkrući a pomjenowaše zdobom třoch zastupjerjow-radźićelow Patrica Junga, Normana Retzlaffa (wobaj CDU) a Ralpha Büchnera (Lěwica).
5 000 šulerjow wjace
Drježdźany. Sakske statne ministerstwo za kultus njemóže narunać dotal pobrachowacych wučerjow. Přičina je zwyšenje ličby šulerjow. W šulskim lěće 2017/2018 chodźi po cyłej Sakskej 5 000 šulerjow wjace do šule hač lěto před tym. Za tutych šulerjow je trjeba něhdźe 200 rjadownjow a 200 přidatnych wučerjow, zdźěli kubłanskopolitiska rěčnica frakcije Lěwicy Cornelia Falken.
Młodym ćěkancam pomhać
Budyšin. Budyski wokrjes a město Budyšin chcetaj so sylnišo za kubłanje ćěkancow zasadźić. Tuž stej wobě zarjadnišći podpisałoj kooperaciske dorěčenje z Němskej załožbu za dźěći a młodźinu. Mjez druhim chcedźa młodych ćěkancow sčasom wo přechodźe ze šule do wukubłanja informować a jich přewodźeć.
Wjesela so na camp
Budyšin. Lětuši prózdninski camp Rěčneho centruma WITAJ za šulerjow 3. a 4. lětnika dwurěčnych rjadownjow wotměje so wot 3. oktobra wječor hač do 6. oktobra w Budyskej młodowni. Dohromady 18 dźěći ze zakładnych šulow Radwor, Pančicy-Kukow, Chrósćicy, Worklecy, Ralbicy, Kulow a Slepo móže so na rjane dožiwjenja při pućowanju, paslenju, hraću a kupanju kaž tež na wopyt Krabatoweho młyna w Čornym Chołmcu wjeselić.
Poskitk za prózdniny
Kamjenc. Sakralny muzej Kamjenca přeproša dźěći w starobje sydom do 14 lět na prózdninsku akciju. Wutoru, 10. oktobra, wot 10 do 12.30 hodź. chcedźa sej tam zhromadnje wšelake wuměłske twórby wotkryć a so na hódančkowu rallye podać. Wo tym zhotowja wobdźělnicy pohladnicy, kotrež móža přećelam a znatym pósłać. K zakónčenju zalězu wšitcy na wěžu Kamjenskeje Marineje cyrkwje, zwotkelž změja rjany wuhlad na město. Wobdźělenje płaći tři eura na wosobu. Zajimcy njech přizjewja so pod telefonowym čisłom 03578/ 379 111.
Na rozmołwu z filmom
Chcedźa psyče powostanki rumować
Wučer za psy Torsten Kurz z Hornjeje Hórki namołwja 3. oktobra k wosebitej akciji we Wojerecach. Tam měli wobsedźerjo psow a wšitcy dalši zajimowani na zelenišćach a zjawnych naměstach psyče howna rumować. Silke Richter je so z 50lětnym wo tym rozmołwjała.
Knježe Kurzo, čehodla Was myli, zo ludźo howna swojich psow njerumuja?
T. Kurz: To mje jenož njemyli, ale jara hněwa, dokelž njerozumju, čehodla wobydlerjo swoje města/wsy čiste njedźerža. Wšako w nich bydla, a powostanki psow pohubjeńšeja bydlensku kulturu.
Njeje móžno psej přiwučić howno jenož na wěstych městnach njepušćić, hdźež to nikoho njemyli? To by tola tež zmysłapołne było hladajo na diskusiju wo přiběracych plastikowych wotpadkowych titach.
T. Kurz: Zasadnje móžeš psej tajke zadźerženje přiwučić. To je samo poměrnje jednore. Hdyž pak so pos na přikład na kromje puća wolóži, potom maja wodźerjo awtow tele zawostajenstwo we wobruči. A nimo toho: Čehodla měł pos lěnjosć jeho wobsedźerja kompensować.
Mnozy wobsedźerjo psow skorža, zo je we Wojerecach přemało wotpadkowych sudobjow za hownjace titki.
Policija (28.09.17)
Kable roztřihali
Miłoraz. Na terenje Wochožanskeje brunicoweje jamy pola Miłoraza chcychu wutoru wječor njeznaći kable kradnyć. Woni wotrěznychu wjacore milinowody po cyłkownej dołhosći 200 metrow, roztřihachu je do mjeńšich kuskow a sej je za pozdźiši transport přihotowachu. Sobudźěłaćerjo pak to pytnychu, tak zo k padustwu hižo njedóńdźe. Přiwšěm nasta wěcna škoda, kotruž trochuje firma na něhdźe 3 000 eurow.
Zawod najprjedy njepowjetša
Wjele informacijow na posedźenju Malešanskeje gmejnskeje rady
Malešecy (CS/SN). Swój hospodarski plan za lěto 2017 je Malešanska gmejnska rada na swojim posedźenju zawčerawšim wobzamknyła. Přičina toho, zo móžachu to hakle nětko činić, je, zo bě jedna ze sobudźěłaćerkow gmejnskeho zarjadnistwa wjacore měsacy wupadnyła. Wona měješe wotewrjensku bilancu za nowy zličbowanski system doppik sobu zestajeć. W małym zarjadnistwje, tak wjesnjanosta Matthias Seidel (CDU) rjekny, móžeš tajkile wupad jeno ćežko narunać. Etat Malešanskeje gmejny wopřijima lětsa něhdźe sydom milionow eurow. Z toho je milion eurow za inwesticije předwidźany. Dróhi w Přiwćicach, na Delnjohórčanskim přemysłownišću a w Rakojdach za dohromady wjac hač 800 000 eurow su najwjetše projekty, kotrež zdźěla hižo zwoprawdźeja.
Južnoamerisku domiznu předstajił
Budyšin (SK/SN). Južnoameriski kraj Peru spřistupni rodźeny Peručan Yuri Lévano García zajimcam na derje wopytanym přednošku, organizowanym wot Budyskeho kluba wuchowarjow rěče, w tudyšej měšćanskej bibliotece zawčerawšim jako krajinowu, rěčnu a kulturnu mnohotnosć. Yuri Lévano, wot najnowšeho městopředsyda Europskeho kluba Budyšin, wobknježi sydom rěčow, mjez nimi perfektnje hornjoserbšćinu, a je nimo toho dobry znajer stawiznow južnoameriskeho kraja. Něhdźe połsta hosći wječora dožiwi we wobłuku Mjezykulturelneju tydźenjow napjate pućowanje do zdaleneho kraja. Peru ma ze swojimi 31,5 milionami wobydlerjow na trójce tak wulkim teritoriju kaž Němska nimo španišćiny 65 rěčow a 77 wšelakich etnijow.
Kamjenske torhošćo je tuchwilu wulke twarnišćo. Wone dóstawa cyle ...
Kóždy jednotliwy dóńt je jej wažny
Zhorjelc (AK/SN). Wokrjes Zhorjelc so we wobłuku integracije ćěkancow chětro napina. Olga Schmidt, kotraž je mjeztym hižo wosom lět komunalna społnomócnjena za wukrajnikow w Zhorjelskim wokrjesu, podšmórny tole na zańdźenym posedźenju wokrjesneho sejmika. Hłownje wěnowaše so wona časowej dobje wot junija 2014 hač donětka. Z 3,6 procentami wukrajnikow je w Zhorjelskim wokrjesu najwjac z nich wšitkich sakskich wokrjesow. „Hač do lětušeho 30. junija bydleše tu 10 996 wukrajnikow. Pózdni wusydlency njejsu w ličbje zapřijeći“, Olga Schmidt rozkładźe.
Nowa šula změje nowu sportownju
Při planowanej nowej wyšej šuli we Wojerecach ma třipolowa, a nic jenož dwupolowa sportowa hala nastać. Zo pak ma jeno 300 přihladowarskich městnow měć, zbudźa diskusije.
Wojerecy (AK/SN). Hač do lěta 2020 ma we Wojerecach nowa centralna wyša šula nastać. Za to chcedźa bywši Konrada Zusowy gymnazij z lěta 1959 saněrować a zdźěla přitwarić. Nimo toho natwarja tam nowu třipolowu sportownju z 300 přihladowarskimi městnami. To je wjetšina čłonow měšćanskeje rady zawčerawšim na swojim posedźenju wobzamknyła. Wyši měšćanosta Stefan Skora (CDU) ma nětko wšitke trěbne podłožki zestajeć a próstwy wo spěchowanje zapodać.
„Ličimy najzašo w decembru z tym, zo nam Sakska natwarna banka spěchowanske srědki přizwoli. Tuchwilu pruwujemy, hač hodźi so projekt spěchować“, Skora rozłoži. Po tuchwilnym stawje móhli nowu wyšu šulu wot februara 2020 wužiwać. Klětu w aprylu maja so twarske dźěła zahajić. Za saněrowanje a přitwar liča z něhdźe 20 měsacami. Wot junija hač do oktobra 2019 maja wonkowne připrawy nastać. W decembru 2019 a januaru 2020 chcedźa potom nowu šulu nutřkownje wuhotować.
Krótkopowěsće (28.09.17)
Förster a Statnik čłonaj konwenta
Budyšin. Jako poradźowacaj čłonaj zastupujetaj wokrjesny radźićel frakcije Swobodnych wolerjow, předsyda Domowiny Dawid Statnik, a radźićelka Lěwicy Elke Förster Budyski wokrjes w konwenće kulturneho ruma Hornja Łužica-Delnja Šleska. To wobzamkny wokrjesny sejmik na póndźelnym posedźenju. Frakcija CDU bě Statnika namjetowała.
Roman stipendiata wuńdźe
Bórkowy. Kulturna załožba Błóta a hotel „Blejcha“ wukristalizujetej so dale jako spěchowarjej literatury z łužiskej temu. Tak nawróći so tele dny Klaus Cäsar Zehrer na něhdyše městno swojeho skutkowanja. Jako stipendiat załožby Błóta bě wón před lětomaj w Bórkowach bydlił a dźěłał. Nětko wuńdźe jeho debitowy roman „Ženij“ w šwicarskim nakładnistwje Diogenes.
40 lět šulske partnerstwo
