Hosćenc dyrbja předać
Worklecy. Z nanuzowanym přesadźowanjom ma so Worklečanski hosćenc předać. Kaž z lisćiny Budyskeho zarjadniskeho sudnistwa wuchadźa, ma objekt 129 000 eurow płaćić a so srjedź meje přesadźować. Wšitke skazane terminy pak so dodźerža a tež nowe hodźa so skazać, wobkruća mějićelka Marlies Hüllowa. Wjesnjanosta Franc Brusk (CDU) wobžaruje, zo je k přesadźowanju dóšło.
Zaso warnowanske stawki
Halle. Přistajeni zjawneje słužby su dźensa w Sakskej, Saksko-Anhaltskej a Durinskej z warnowanskimi stawkami pokročowali. Tak je 120 přistajenych Zwjazkoweje agentury za dźěło w Halle słužbu zapowědźiło. Tež w durinskim Sonnebergu a sakskim Freibergu přistajeni zjawneje słužby stawkowachu.
Mnozy monarchojo njepřijědu
Wobchad kontrolowali
Budyšin. Na třoch městnach je policija zawčerawšim, wutoru, w Budyšinje wobchad kontrolowała, a to na Mosće měra, na Mjasowych wikach a na Zeppelinowej. W běhu štyri hodźiny trajaceje akcije zadźeržachu zastojnicy dohromady 15 wodźerjow awtow, dokelž běchu woni zabyli so připasać. Pjećo dalši su při jězdźenju mobilny telefon wužiwali. Za jězdźenje bjez wěstotneho pasa předwidźa pokutny katalog 30 eurow warnowanskeho pjenjeza. Za wužiwanje mobilneho telefona dyrbja potrjecheni 60 eurow pokuty płaćić a dóstanu nimo toho dypk w Flensburgu.
Alkoholizowany z awtom jěł
Stróža. Dobry čuch měješe wobsadka policajskeho awta wutoru wječor w Stróži pola Rakec. Tam zadźeržachu 55lětneho wodźerja Golfa, kotrehož kontrolowachu. Při tym zastojnicy zwěsćichu, zo bě wón alkohol pił. Wotpowědny test wunjese 0,96 promilow alkohola w kreji. To budźe za 55lětneho droha naležnosć. Wón změje nětko znajmjeńša 500 eurow pokuty płaćić, njesmě měsac žane awto wodźić a dóstanje nimo toho dwaj dypkaj w Flensburgu.
Budyšin (SN/MWj). Wobydlerjo Budyšina a ći, kotřiž do sprjewineho města na dźěło jězdźa abo dyrbja přez nje jěć, maja so lětsa znowa na někotre wjetše nadróžne twarnišća nastajić. W hospodarskim planje města su wjacore inwesticije zaplanowane, kotrež budu wobchad zdźěla wobšěrnje poćežować, rěka w nowinskej zdźělence měšćanskeho zarjadnistwa.
Bóšicy (JK/SN). Wjetšich starosćow a problemow Bóščanski wjesnjanosta Stanij Ryćer (Bóšćanscy rjemjeslnicy) a gmejnscy radźićeljo tuchwilu žanych nimaja. Wšitko běži po planje. To je rezimej wčerawšeho zjawneho dźěla posedźenja gmejnskeje rady. Radźićelow jeničce mjerza, zo so někotři wobydlerjo na Horje na porjad njedźerža a hałzy abo drjewo za chodojtypalenje na městnach wotkładuja, kotrež njejsu za to předwidźane. Nimo toho njeje scyła hišće dowolene hromady přihotować. W Jaseńcy kaž tež Bóšicach maja zamołwiteju, kotrajž so wo to starataj, zo so chodojtypalenje porjadnje přihotuje. Přeńdźenja přećiwo płaćiwym postajenjam chce gmejna čujomnje chłostać, runje tak ilegalne wotkładowanje smjećow. Tajke pady so w zašłosći w gmejnje časćišo jewjachu, kaž wjesnjanosta Ryćer zwěsći.
Kulow. Nic aprylski žort, ale skerje wjeselo bě, štož přistajeni Kulowskeje piwarnje minjeny pjatk wuhladachu. Tamniše baćonjace hnězdo na starym wuhenju běštej piwarniskej baćonaj Hopf a Malzi wobsadźiłoj. Tak móžeće jej nětko zaso na internetnej stronje piwarnje www. wittichenauer.de live wobkedźbować.
Warja klewernje a kreatiwnje
Pančicy-Kukow. Kak w kuchni žiwidła zlutniwje zasadźeš a žane preč njemjetaš, to budźe tema přichodneho zarjadowanja „Klewernje a kreatiwnje warić“ w zežiwjenskim a zelowym centrumje klóštra Marijineje hwězdy w Pančicach-Kukowje. Zežiwjenska wědomostnica Silvia Ulrich chce srjedu, 13. apryla, w 19 hodź. z wobdźělnikami regionalnje a sezonalnje typiske jědźe warić. Wona podawa tež pokiwy k přihotowanju runje tak kaž k zlutniwemu nakupowanju. Wobdźělenje płaći šěsć eurow na wosobu. Zajimcy njech přizjewja so pod telefonowym čisłom 035796/ 97 1 10. Dalše informacije wo terminach a temach warjenskich wječorow namakaće pod rubriku „zarjadowanja“ na internetnej stronje www.ekz-marienstern.de.
Runja tamnym łužiskim gmejnam ma tež Trjebinska wulke ćeže, swój hospodarski plan wurunać. To pak njeje wina komuny. Tohodla so nětko přećiwo Swobodnemu statej Sakskej wobara.
Trjebin (AK/SN). Jeno z masiwnymi zalutowanjemi a ze swójskimi rezerwami móže Trjebinska gmejna hospodarski plan 2016 nastajić. „Dyrbimy tójšto ze swojich nalutowanych srědkow wužiwać“, wuzběhny wjesnjanostka Kerstin Antonius (Trjebinske wolerske zjednoćenstwo) na wčerawšim posedźenju gmejnskeje rady. „Njeje pak naša wina, zo smy nětko w tajkim połoženju“, wona rjekny.
Manfred Hermaš (CDU) złoži swojej funkciji jako gmejnski radźićel Slepjanskeje gmejny a jako zastupowacy wjesnjanosta. Jako přičinu je 66lětny Rownjan strowotne přičiny podał.
Slepo (AK/SN). Wobkrućiła je Slepjanska gmejnska rada na swojim wčerawšim posedźenju, zo jeje čłon Manfred Hermaš swojej zastojnstwje jako gmejnski radźićel a jako zastupowacy wjesnjanosta złoži. Přećiwo tomu hłosował bě Wolfgang Goldstein, Matthias Jainsch so hłosa wzda. Hižo na posedźenju w februaru bě Hermaš swój wotstup po skřiwdźenjach a wosobinskich wumjetowanjach přećiwo jeho wosobje připowědźił. Dokelž wjesnjanosta Reinhard Bork (CDU) dlěši čas wupadny, bě jeho Hermaš přiwšěm zastupował a je nětko wróćo sahajo k 30. měrcej wotstupił.
Wulki zajim za wustajeńcu
Budyšin. Wustajeńca z fotografijemi Rolfa Dvoraceka w Budyskim muzeju budźe wulkeho zajima dla hač do 26. junija podlěšena. Zdobom wotměje so njedźelu, 17. apryla a 1. meje, přidatne wodźenje po wustajenišću. Žiwjenske dźěło Dvoraceka wopřijima wjace hač stotysac negatiwow. W muzeju je něhdźe pjećstow jeho fotow widźeć. Ćežišćo přehladki stej město Budyšin a jeho wuwiće.
Roznošuje póštu zaso z čołmom
Lědy. W Błótach nětko zaso póstownica wódne puće za roznošowanje wužiwa. Wot dźensnišeho je Andrea Bunar na Lědach z čołmom po groblach po puću, kaž Němski póst zdźěla. Hač do oktobra chce wona wobydlerjam listy, karty a pakćiki na te wašnje do domu nosyć. Na něhdźe wosom kilometrow dołhej čarje zastaruje Bunar 65 domjacnosćow.
Festiwal słowjanskeje kultury