Gmejna podpěruje kulturne wjerški
Pěskecy (JK/SN). Tež Njebjelčanskej gmejnje su přidźělili spěchowanske srědki po sakskim zakonju wo zesylnjenju inwesticijow. Ze srědkami Zwjazka za energetiske saněrowanje ponowi gmejna tepjeni wohnjoweje wobory a sportoweho domu w Njebjelčicach, ze zbytkom pjenjez wjesne wobswětlenje na Lipowym puću. Srědki Sakskeje we wobjimje 73 000 eurow zasadźa za nakup domu twarskeho zawoda a chcedźa něhdyšu socialnu dźěłarnju saněrować. Tole je gmejnska rada na swojim wčerawšim posedźenju schwaliła.
Wjesnjanosta Tomaš Čornak (CDU) zdźěli w swojich informacijach, zo so gmejna tež lětsa zaso sylnje na kulturnym polu angažuje. Hižo zajutřišim, njedźelu, kolesowarjo na turje „Kolesować do Łužicy“ w Njebjelčicach pozastanu a dóstanu tam zajimawe informacije ke wsy a turistiskim wosebitosćam. Dalšej wjerškaj budźetej Mjezynarodny gmejnski swjedźeń w Njebjelčicach a Krabatowy swjedźeń w Kulowje. Dale podpěruja zetkanje towarstwa Kamjenjak w Miłočanskej skale spočatk junija. Tam chcedźa wandrowscy natwarić kuchnju a za wěstotu płót wokoło skały.
Suche hałzy a čorne wowcy
W nimale kóždej wsy jutře zaso na wulkich hromadach stareho drjewa chodojty pala. Poprawom z toho wuchadźeš, zo su to wšitko suche hałzy, zbytki korjenjow a kerkow. Pančičanski wjesnjanosta Markus Kreuz (CDU) chcyše to dokładnišo wědźeć a je sej hromady bliže wobhladał.
Po wjacorych njelubych nazhonjenjach zašłych lět je wjesnjanosta Pančic-Kukowa Markus Kreuz wóndano připowědźił, zo chce hromady za chodojtypalenje kontrolować. Hromadźe z předsydu zarjadniskeho zwjazka Při Klóšterskej wodźe Měrkom Domašku, kiž je w tej funkciji zdobom za porjad a wěstotu zamołwity, bě wón wčera w gmejnje po puću a je so z městnami chětro stróžił.
Prěnja stacija bě Kanečanska hromada do směra na Nowy Dwór. Tam bě samo na sebi wšitko w porjadku. Jeno čwak folije napadny, kiž pak hodźi so jednorje wućahnyć. W Časecach lětsa žanu oficialnje přizjewjenu hromadu nimaja. Móžno, zo reaguja tak na lońše chodojtypalenje, jako běchu tam ludźo samo cyłe křesła spalić chcyli. Při wobrazach, kotrež ma Markus Kreuz na swojim handyju składowane, móžeš jeno z hłowu wić.
Cirkus cyle wosebiteho razu dožiwichu přihladowarjo dźensa w ...
Krótkopowěsće (28.04.16)
Nalětnje wožiwjenje zwěsćili
Budyšin. We wuchodnej Sakskej bě w aprylu 25 307 bjezdźěłnych, 2 237 mjenje hač w měrcu. Spad zwěsća Budyska agentura za dźěło we wšěch powołanskich a starobnych skupinach. Kwota bjezdźěłnosće je 8,7 procentow. Sezonalne přistajenske efekty su hižo wšudźe pytnyć, byrnjež přeće za nalětnimi temperaturami spjelnjene njebyło.
Delegowanje přizwolił
Wojerecy. Přichodne posedźenje Zwjazkoweho předsydstwa Domowiny budźe 28. meje w Budyšinje a nic w Slepom. To je jeho prezidij wčera we Wojerecach wobzamknył. Přizwolił je próstwam wo delegowanje rejwanskeje skupiny Smjerdźaca w juliju do Awstriskeje a w oktobru do Indiskeje kaž tež kulturnej wuměnje chóra Meja z chórom z Baški na Morawje.
Sněh chaos zawinił
Celovec. Njewšědny sylny sněh je na juhu Awstriskeje wulke škody a wobchadny chaos zawinił. Něhdźe 9 000 domjacnosćow bě dźensa hišće bjez miliny. Čerwjeny křiž dyrbješe sta šoferow zastarać, kotřiž běchu na awtodróhach w Korutanskej tčacy wostali. Wčera bě so w horach hač do 80 centimetrow sněha našło. Wjacore milinowody so roztorhachu.
Policija (28.04.16)
„Dr. Doolittle“ zastojnikam pomhał
Bambruch. Dźakowano štyrinohatemu pomocnikej je so zawčerawšim pytanska akcija w Bambruchu pola Kamjenca derje skónčiła. Někajkeho rozestajenja dla bě 16lětna dopołdnja swoju šulu wopušćiła. Dokelž njewědźachu, dokal je šła, informowaše šulski nawoda policiju, kotraž najprjedy podarmo za holcu pytaše. Skónčnje zasadźichu policajskeho psa z mjenom Dr. Doolittle. Tón čuchaše na pjerowce, kotruž bě holca w šuli wostajiła. Policist na štyrjoch pacach wjedźeše swojich dwunohatych kolegow po slědach 16lětneje, doniž ju při bliskim křižowanišću njenańdźechu. Wottam dowjezechu ju zaso do šule.
Z rolatorom wěsće po puću
Serbskich zajimcow poradźuja tež w maćeršćinje
Kamjenc (JK/SN). Dźeń a wjac staršich ludźi tež w Hornjej Łužicy wužiwa město kija pomocnika na štyrjoch koleskach – rolator. Dyrbiš-li tajki nastroj wužiwać maš jón derje wobknježić, a to nic jenož doma w znatych štyrjoch sćěnach, ale tež po puću k wšelakim městnosćam wšědneho dnja. Wužiwarjam rolatora wěsty wobchad z nim zbližić a jich ze wšelakimi wobstejnosćemi konfrontować bě zaměr wčerawšeho rolatoroweho dnja w Kamjencu.
Wjace swobodnych městnow
Hornjołužiske hospodarske předewzaća pytaja dźeń a wjace fachowcow, kotrychž chcyli na swobodne dźěłowe městna přistajić. To njepłaći dawno jeno za sezonowe powołanja.
Budyšin (CK/SN). W aprylu je w Hornjej Łužicy 3 290 ludźi nowe dźěłowe městno našło, 1 221 wjace hač měsac do toho. Přistajili su jich zwjetša w sezonowych powołanjach, potajkim w twarstwje a transportnistwje, w zahrodnistwje, floristice a ratarstwje. Wuwiće na dźěłowych wikach pokazuje tak na wočakowane nalětnje wožiwjenje. Ale tež hewak su pozitiwne signale widźeć, praji Thomas Berndt. Po słowach šefa Budyskeje agentury za dźěło je woteběraca bjezdźěłnosć generelnje wuskutk pozitiwneho wuwića hospodarstwa. Dołhi čas běštej ličbje přizjewjenjow a wotzjewjenjow z bjezdźěłnosće podobnej. W aprylu bě ličba ze zawodow pušćenych z 1 700 wjele mjeńša hač ta nowych přistajenych.
Jednani zastajenej
Zhorjelc (SN). Jednanje přećiwo 18lětnemu wobskorženemu, kotremuž wumjetowachu pospytane zranjenje ćěła, je dźensa připołdnju Zhorjelske statne rěčnistwo zastajiło a wobskorženeho wuwinowało. Přičina je, zo njemóžachu jemu w zwisku z nadpadami na serbskich młodostnych w septembru 2014 wokoło 2 hodź. na wsy gmejny Ralbicy-Róžant njeskutk dopokazać. Chětro wopity bě spytał druhemu mjezwoči bić, štož pak so jemu alkoholizowanja dla njeporadźi.
Tohorunja dźensa připołdnju bu jednanje přećiwo dalšim třom njeskutka podhladnym zastajene. Zhorjelske statne rěčnistwo njemóžeše młodostnym, kotřiž běchu za čas njeskutka we Wotrowje 18 a 19 lět stari, wumjetowanje strašneho zranjenja ćěła dopokazać.
Dalši 22lětny Budyšan, kiž bě w oktobru 2014 w Konjecach zjawnje postrow Hitlera pokazał pak ma z chłostanjom ličić. Na Kamjenskim zarjadniskim sudnistwje bu přećiwo njemu chłostanski přikaz wukazany, kotryž wot dźensnišeho oficialnje płaći.
Kritiske słowa přećiwo wotedawkej
Byrnjež twarske dźěła we wobłuku zaměroweho zwjazka za wopłóčki Při Klóšterskej wodźe w dalokej měrje wotzamknjene byli, knježa tam po wšěm zdaću dale wulke napjatosće.
Porchow (AK/SN). Zaměrowy zwjazk za wopłóčki Při Klóšterskej wodźe (AZV) je dale bjez wobzamknjeneho hospodarskeho plana 2016 a bjez kalkulacije popłatkow za lětsa a klětu. Tole je wuslědk wčerawšeje zhromadźizny zaměroweho zwjazka w Porchowje. Wjetšina zastupjerjow zwjazkej přisłušacych gmejnow je dodatnu kalkulaciju za lěta 2009 do 2012 kaž tež za 2013 do 2015 wotpokazało. Tónle nadawk běchu loni w septembru firmje KOGIS přepodali. Porchow a Worklecy jeje wobličenjam přihłosowachu, Ralbicy-Róžant, Chrósćicy a Pančicy-Kukow je wotpokazachu.
Jednaćel KOGIS Jens Sterzel wčera kalkulaciju rozłoži a namjetowaše, wobchować měsačny zakładny popłatk wosom eurow na domjacnosć a 3,90 eurow na kubikny meter wopłóčkow. Radźićeljo pak mějachu wobmyslenja. Tak skedźbni Jan Wjesela z Chrósćic na kónčnu bilancu lěta 2013, hdźež bě wón diferencu wjace hač miliona eurow zwěsćił. Kak je wona nastała, njemóžeše Sterzel wčera rjec.
Krótkopowěsće (27.04.16)
Prěni stražni policisća
Drježdźany. Prěni stražni policisća w Sakskej su dźensa słužbu nastupili. Nutřkowny minister Markus Ulbig (CDU) přepoda 47 absolwentam po třoch měsacach wukubłanja wopisma. Woni maja saksku policiju podpěrać. Stražni policisća su drje wobrónjeni, maja pak mjenje kompetencow hač policija. Jich słužba je na dwě lěće wobmjezowana.
Atomowe koncerny maja płaćić
Berlin. Štyri atomowe koncerny Němskeje maja po woli knježerstwoweje komisije zhromadnje 23,34 miliardow eurow za kóšty składowanja jadrowych wotpadkow znosyć. Po tym puću ma so zakónčenje atomoweje miliny financować, kaž powěsćernja dpa piše. Wot knježerstwa powołana komisija hižo wjacore měsacy z koncernami jedna.
Próstwu wo titul přestorča
Praha/Drježdźany. Čěska republika a Sakska stej so dojednałoj, zo zhromadnu próstwu wo přiwzaće Rudnych horin do zapisa swětoweho kulturneho namrěwstwa UNESCO cofnjetej. Zamołwići UNESCO běchu poručili, podłožki dale wudospołnić. Předźěłana próstwa ma hač do 1. februara 2017 předležeć. Za dwě lěće chce UNESCO potom rozsudźić.
