Rjana gesta w adwenće
Dobra powěsć a rjane wuhlady
Hórki (JK/SN). Mało brizancy lubješe dnjowy porjad wčerawšeho posedźenja Chróšćanskeje gmejnskeje rady w Hórkach. Ale štož wjesnjanosta Marko Kliman (CDU) radźićelam we wobłuku swojich informacijow zdźěli, měješe potencial hodowneho dara. Wulce zwjeseleny Kliman informowaše, zo je Sakska natwarna banka (SAB) hišće wustejace spěchowanske srědki 329 000 eurow za nowu Chróšćansku pěstowarnju přizwoliła a na konto gmejny přepokazała. Tak je gmejnska kasa zaso stabilnje pjelnjena, a gmejna njetrjeba kasowy kredit hižo dlěje strapacěrować. Nimo toho móža skónčnje konkretnje wo tym rozmyslować, kak ma z něhdyšej pěstowarnju dale hić. Za „Chróšćan kołć“ su wot lěta 2012 cyłkownje 1,7 milionow eurow zasadźili, z toho 1,3 miliony spěchowanskich srědkow SAB. W tym zwisku wupraji wjesnjanosta Marko Kliman wšitkim, kotřiž běchu so na někajkežkuli wašnje wo spěchowanje a zwoprawdźenje projekta noweje pěstowarnje prócowali, swój wosobinski dźak.
Krótkopowěsće (08.12.17)
Dyrlich čestny čłon
Běłohród. Serbiski zwjazk spisowaćelow je serbskemu basnikej Benediktej Dyrlichej čestne čłonstwo w swojim zwjazku spožčił. Dyrlich wudźeržuje hižo mnohe lěta wuměłstwowe styki ze serbiskimi spisowaćelemi. Prawidłownje zetkawachu so serbiscy a łužiscy basnicy mjez druhim na Swjedźenju serbskeje poezije we Łužicy. Loni bě w Běłohrodźe dwurěčna zběrka Dyrlicha wušła.
Planuja ćichi protest
Zhorjelc. Dźěłarnistwo IG metal wuchodneje Sakskeje a zawodna rada Zhorjelskeje turbinoweje twornje chcetej 13. decembra ze swěčkowym rjećazom wokoło zawoda kaž tež z dohodownym spěwanjom 19. decembra před centralu Siemensa w Mnichowje a 21. decembra před zawodnymi wrotami w Zhorjelcu na ćiche wašnje za zachowanje wotnožki Siemensa nad Nysu protestować.
Třeći króć za sobu
Plahowarjo swoje lubuški pokazali
Wulki ratarski statok z nowej wobsedźerku
Njebjelčicy (aha/SN). Na Lipowym puću njeposrědnje za Njebjelčanskim kěrchowom napadnje na lěwej stronje wulki štyristronski statok z nahladnym wulkim domom. Pjećdźesathektarske Majerec kubło bě druhe najwjetše we wsy a bu před 60 lětami zestatnjene. Po přewróće přeńdźe zamóženje znowa do rukow mjeztym w zapadźe bydlaceho wobsedźerja, kotryž kubło přiwuznym přepoda. Tola Körberec swójba je hižo wobhospodarić njemóžeše a kubło bjez polow předa. Na to so w minjenych 27 lětach wobsedźer dalšej razaj změni.
Gmejnskej radźe a wjesnjanosće Tomašej Čornakej (CDU) je zachowanje burskeje struktury wsy wažne. Wón sobu pomhaše, zo móžeše Julia Wroblewski ze swojimaj staršimaj z Čorneho Chołmca štyristronski statok a k tomu třištwórć hektara pódy kupić. Dalšu pódu by gmejna po potrjebje k wotnajenju přewostajiła.
Šulerjo koncertuja
Worklecy. Serbska zakładna šula „Michał Hórnik“ přeprošuje wšitkich staršich, dźědow, wowki a dalšich zajimcow na tradicionalny adwentny koncert jutře, pjatk, we 18 hodź. do Worklečanskeje ćěłozwučowarnje. Z wjele lubosću a wosobinskim zasadźenjom su so šulerjo a wučerjo na tónle wjeršk w běhu šulskeho lěta přihotowali. Tuž so organizatorojo bohateho wopyta nadźijeja.
Za adwentničku so přizjewić
Chrósćicy. Lětuša adwentnička wuměnkarkow a wuměnkarjow Chróšćanskeje gmejny wotměje so štwórtk, 14. decembra w 15 hodź. w Chróšćanskej wjacezaměrowej hali. Při kofeju, wosušku a kulturnym programje wjesela so wjesnjanosta a jeho sobudźěłaćerjo na rjane zhromadne popołdnjo z rentnarjemi. Organizatoriskich přičin dla njech so zajimcy hač do 11. decembra na gmejnje (tel. 035796/96 210, email: ) přizjewja.
Planuja jězbu seniorow
Policija (07.12.17)
Wjele škody načinili
Wojerecy. Po wšěm zdaću z prózdnymaj rukomaj woteńdźechu paduši, kotřiž běchu so w nocy na srjedu do wobchodneho twarjenja we Wojerecach zadobyli. Tam łamachu so do dweju praksow a kenclije, hdźež wšitke kamory a pisanske blida přepytachu. Do dalšeho běrowa so zadobyć pak so jim njeporadźi. Po prěnjej kontroli drje mějićeljo zwěsćichu, zo njeznaći ničo pokradnyli njejsu, za to pak nasta dohromady něhdźe 10 000 eurow wěcneje škody.
Žadyn rozsud wo parkowanju
Měšćanscy radźićeljo njemóža so na „całtowy knefl“ dojednać
Budyšin (CK/SN). Tak mjenowany „całtowy knefl“ w Budyšinje najprjedy raz njezawjedu. Rozsud wo tym je měšćanska rada wotstorčiła. Hižo wjacore lěta so z tejle temu zaběraja. W oktobru stej frakciji FDP a CDU znowa pospytałoj, na parkowanišćach, za kotrež dyrbi so hewak płaćić, prěnje 30 mjeńšin darmotne parkowanje zmóžnić. Wikowarjo, kupcy, wobydlerjo a hosćo bychu to witali, w namjeće rěkaše. Radźićeljo wo tym nětko diskutowachu. „W Lubiju, Žitawje a dalšich městach całtowy knefl maja. Tón by tež za Budyšin derje był“, praji Mike Hauschild (FDP).
Tež bjez rewěra na hońtwu
Ralbicy (SN/MWj). Zymske tydźenje a měsacy su tradicionelnje čas, hdyž we łužiskich lěsach hońtwy přewjeduja. Tajku mějachu minjenu sobotu w Ralbicach. W běhu dweju hodźin móžachu tam jednu sornu a sydom dźiwich swini třělić. Zamołwity Měrćin Krawc so hajnikam a přihonjerjam za dobru disciplinu dźakowaše. Runočasnje tež w Konjecach hońtwu přewjedźechu. Tam běchu sorna, dańk a pjeć dźiwich swini wuslědk hajnikow.
Zo móhła so struktura hornjołužiskich lěsow wot ryzy chójnoweho na měšany lěs přetworić, je trěbne, wobstatk dźiwiny regulować, zo by so škodam na štomikach zadźěwało, rjekny sobudźěłaćer hornjołužiskeho lěsnistwoweho wobwoda Cyril Šołta. Dokelž je to z wjele dźěłom hajnikow zwjazane, poskićuja nětko tež hajnikam bjez swójskeho rewěra dowolnosć, so na hońtwje w statnym lěsu aktiwnje wobdźěleć. Rewěry statneho lěsa su we wokolinje Běłeje Wody, Łaza, Njedźichowa a Wojerec. Zajimcy měli so najpozdźišo šěsć tydźenjow do zahajenja hońtwjerskeho lěta, potajkim 1. apryla 2018 w hornjołužiskim lěsnistwowym wobwodźe pod telefonowym čisłom 03591/216 109 přizjewić.
