Ralbicy (SN/MWj). Zymske tydźenje a měsacy su tradicionelnje čas, hdyž we łužiskich lěsach hońtwy přewjeduja. Tajku mějachu minjenu sobotu w Ralbicach. W běhu dweju hodźin móžachu tam jednu sornu a sydom dźiwich swini třělić. Zamołwity Měrćin Krawc so hajnikam a přihonjerjam za dobru disciplinu dźakowaše. Runočasnje tež w Konjecach hońtwu přewjedźechu. Tam běchu sorna, dańk a pjeć dźiwich swini wuslědk hajnikow.

Zo móhła so struktura hornjołužiskich lěsow wot ryzy chójnoweho na měšany lěs přetworić, je trěbne, wobstatk dźiwiny regulować, zo by so škodam na štomikach zadźěwało, rjekny sobudźěłaćer hornjołužiskeho lěsnistwoweho wobwoda Cyril Šołta. Dokelž je to z wjele dźěłom hajnikow zwjazane, poskićuja nětko tež hajnikam bjez swójskeho rewěra dowolnosć, so na hońtwje w statnym lěsu aktiwnje wobdźěleć. Rewěry statneho lěsa su we wokolinje Běłeje Wody, Łaza, Njedźichowa a Wojerec. Zajimcy měli so najpozdźišo šěsć tydźenjow do zahajenja hońtwjerskeho lěta, potajkim 1. apryla 2018 w hornjołužiskim lěsnistwowym wobwodźe pod telefonowym čisłom 03591/216 109 přizjewić.