Policija (30.04.18)
Motorski smjertnje znjezbožił
Biskopicy. Tragiski wukónc měješe wčera dopołdnja jězba 53lětneho muža na statnej dróze S 120 pola Biskopic. Ze swojim motorskim typa Kawasaki zajědźe wón w lěwej křiwicy na prawy bok jězdnje a zhubi kontrolu nad swojej mašinu. Při tym so wón tak ćežko zrani, zo hišće na městnje njezboža wudycha.
Při jězoru hašeć dyrbjeli
Wojerecy. Runje sobotu popołdnju, jako mnozy doma rjane wjedro wužiwachu, wołachu wohnjowych wobornikow wokoło Wojerec k hašenju. Při Šibojskim jězoru so na płoninje něhdźe jednoho hektara lěsna póda paleše. Dohromady wosom jězdźidłow wokolnych woborow bě zasadźene. Nětko pruwuja, hač je něchtó woheń zamiškrił abo hač měješe to hinaše přičiny.
Pokradnjene awto lepili
Budyšin. Na awtodróze A 4 mjez Budyšinom a Zhorjelcom lepichu policisća sobotu připołnju awto typa Mercedes, kotrež bu dźeń do toho w Goslaru pokradnjene. 29lětneho pólskeho šofera nachwilnje zajachu a pozdźišo do přepyto- wanskeje jatby tyknychu.
Zetkaja so w stolicy
Berlin. Přichodne Serbske blido w Berlinje budźe štwórtk, 3. meje, w 16 hodź. w hosćencu EINSTEIN KAFFEE na Friedrichowej 206. Štóž ma lóšt a chwile, so na měsačnych zetkanjach wobdźěleć, zo by maćeršćinu w cuzbje hajił, je stajnje lubje witany. Za Serbskim blidom w Berlinje maja zajimcy dobru składnosć, swoje rěčne kmanosće nałožować a skrućeć.
Do gratownje pohladnyć
Budyšin. Kaž kóžde lěto přeprošuje Budyska wohnjowa wobora tež jutře, 1. meje, na dźeń wotewrjenych duri do swojeje gratownje w Strowotnej studni. Wot 10 hodź. móža sej zajimcy tam techniku wobhladać a na 25 metrow wysoku treningowu wěžu zalězć. W 10.30 hodź. demonstruja hašenje wohenja w kuchni, w 11 hodź. prezentuje so młodźinska wobora. K wobjedu poskićuja hrochowu poliwku z pólneje kuchnje.
Na knižnu premjeru
Budyšin. W Ludowym nakładnistwje Domowina wušła kniha „Row w serbskej holi“ změje štwórtk, 3. meje, w 19.30 hodź. premjeru w Budyskej Smolerjec kniharni. Trudla Malinkowa je wudała znate powědančko Marje Kubašec serbsce, němsce a pólsce. Stawiznarka wěnuje so w knize tohorunja stawizniskim pozadkam powědančka.
Wažne zasadźenja zmištrował
Wjelelětny nawoda Kulowskeje wohnjoweje wobory Jurij Brösan je za čas swojeho skutkowanja wjele dožiwił. Nětko je swoje zastojnstwo do młódšich rukow přepodał.
Kulow (AK/SN). Hilbert Schultz z Kulowa je nowy nawoda wohnjoweje wobory za město Kulow a wokolne wsy. Jeho naměstnik je Thomas Werner. Wobeju je měšćanosta Markus Posch (CDU) na zašłym posedźenju měšćanskeje rady w Koćinje na pjeć lět do jeju zastojnstwow powołał. Runočasnje so wón wjelelětnemu nawodźe wobornikow Jurjej Brösanej za jeho skutkowanje dźakowaše.
Wohnjowoborny plan schwalili
Pěskecy (JK/SN). Po třoch lětach přihotow a wjacorych diskusijach ma Njebjelčanska gmejna nětko płaćiwy plan wohnjoškitneje potrjeby. Tón předstaji na zašłym posedźenju gmejnskeje rady w gratowni Pěskečanskeje wohnjoweje wobo- ry nawoda gmejnskeje wohnjoweje wobory Křesćan Matka. Při tym wěnowaše so wosebje tuchwilnemu stawej a połoženju woborow w komunje.
Žołte a čerwjene róže jako dźak
Beneficny koncert na dobro socialnych zarjadnišćow w Razgradźe
Łazk (aha/SN). Na mjeztym 13. beneficny koncert před kulisu Łazkowskeho niwoweho lěsa je wčera nimale tysac wopytowarjow přichwatało. Čłonojo Smjerdźečanskeje wohnjoweje wobory zaručichu, zo móžeše nimale 200 awtow na wot Franka Nowaka přewostajenej ležownosći parkować a nimale 300 kolesowarjow swoje koleso wotstajić. Popołdnjo organizowało je znowa Towarstwo swj. Filomeny ze swojim agilnym předsydu Geratom Róblom na čole.
Krótkopowěsće (30.04.18)
Twórba serbskeho komponista
Berlin. Berlinska Centralna kapała je minjeny pjatk nowu twórbu serbskeho komponista Sebastiana Elikowskeho-Winklera „Camper za dujarski orchester“ předstajiła. Twórba předźěła dopomnjenki komponista na camprowanje na wsach Delnjeje Łužicy. Orchester hudźeše pod nawodom Steffena Kempera w komornej žurli Berlinskeje filharmonije.
Wjace hač 200 wustajerjow
Lubij. Jeničke hišće so wotměwace přemysłowe wiki w regionje je Konventa. Minjeny kónc tydźenja su organizatorojo na mjeztym 17. přehladku w Lubiju tójšto wopytowarjow witali. Wjac hač 200 wustajerjow bě na wikach zastupjene. Nimo tójšto předewzaćow bě lětsa wjele institucijow prezentne. Lětuše partnerske město Konventy bě Lubań.
Turistisku sezonu zahajili
Zahaja sezonu
Pančicy-Kukow. We wobswětowej a wučbnej zahrodźe klóštra Marijineje hwězdy w Pančicach-Kukowje zahaja njedźelu, 29. apryla, lětušu sezonu. Wot 13 hodź. budźe zahroda přistupna, runočasnje přewjedu tam zahrodowe a nalětnje wiki. W 14.30 hodź. započnje so pisany program z livehudźbu. Tež lětsa sadźa zaso štom lěta, tónraz je to jědźna kastanija. Štom sadźitaj priorka administratorka klóštra sotra Gabriela Hesse a direktor krajneho wusyłanskeho domu MDR Sandro Viroli. Samsny dźeń wotewru tři wustajeńcy z fotografijemi a keramiskimi wudźěłkami.
Podźěłaja při pomniku
Pančicy-Kukow. Krótko do jutrow wupadnjenu dźěłowu akciju při pomniku Jakuba Barta-Ćišinskeho w Lipju chce Domowinska skupiny Pančicy-Kukow nětko nachwatać. Pomocnicy zetkaja so sobotu, 28. apryla, w 9 hodź. při pomniku. Njech sej kóždy grat sobu přinjese.
Předstaja pisany program
Policija (27.04.18)
Jastwu zadźěwał
Kinspork. 37lětnemu mužej z Kinsporka hrožeše 30 dnjow jastwa, jeli wón přećiwo njemu wuprajenu pokutu 1 500 eurow njezapłaći. Z tajkimi padami so policija časćišo zaběra. W tym padźe pak njepřijědźechu zastojnicy k skućićelej, ale wón přizjewi so sam na rewěrje a swój dołh zapłaći. Z tym wón přebywanju w jastwje zadźěwa.
Jeničke wuwzaće
Wulka Dubrawa. Při kontroli před Wulkodubrawskej pěstowarnju zawčerawšim zwěsćichu, zo mějachu starši swoje dźěći w awće porjadnje připasane, tak zo móžachu pozitiwny facit sćahnyć. Jenož jenički nan tole ignorowaše. Z warnowanskim pjenjezom 30 eurow zastojnicy muža na jeho winowatosć dopomnichu.
Předsydka přijědźe
Z prokom a kłokom třeleć
Za tydźeń wotewru w Rakecach cyle wosebity parcours
Rakecy (UM/SN). Třělenje z prokom a kłokom sej zwjetša tak předstajiš, zo měri třělc prok z wěsteho wotstawka na kulowatu tačel z barbnymi rynkami. Zo dźe to tež hinak, móža zajimcy wot 5. meje w Rakecach dožiwić. Na terenje třělnišća při Trupinjanskej dróze wotewru tam tón dźeń 3D-parcours za prokownikow. Koncipował je jón Łazowčan Andreas Mühle, pomhała je jemu Gina Adam. Wona je před lětami tajki parcours na Erlichtec dworje w Rěčicach natwariła. Mjeztym pak je jón zawrěła a za nowym započatkom pytała. Za tym rozhladowaše so tež Andreas Mühle. Wjacore lěta so wón prócowaše, třikoleskate jězdźidło trikke we łužiskej jězorinje etablěrować. Ale podarmo. Loni kónc lěća so wón swojeho projekta při Třižonjanskim jězoru wzda a pytaše za nowym wužadanjom. Namakał je wón tajke w Rakecach. Zo jedna so runje wo třělenje z prokom a kłokom njeje připad. Wšako bě Andreas Mühle dlěje hač 20 lět prokownik a wobsedźi za to trenarsku licencu. Wjacore wuchodoněmske a sakske mišterstwa je hižo dobył.
