W Rakojdach běše tehdyši předsyda Domowiny Pawoł Nedo do zakazanja wšeho serbstwa w lěće 1937 wučerił. Wjes blisko Barta bě hišće po Druhej swětowej wójnje serbska. Hač to towaršnostneho přewróta 1989/1990 mějachu tam Domowinsku skupinu. Přez lěta pak bě młódša generacija zwisk k serbstwu zhubiła. Zawěsće tež tohodla, dokelž w swójbach dźeń a bóle němcowachu. To je so bohužel w mnohich ewangelskich wsach wuchodneho Budyskeho wokrjesa stało. Wjele lět hižo słušeja Rakojdy za Budysku župu „Jan Arnošt Smoler“ do tak mjenowanych „přeněmčenych kónčin“. To njerěka, zo tam žane serbske słowo wjace njesłyšiš abo serbskeho ducha njezačuwaš. Rešerša za dźensniši přinošk lětnjeho seriala SN to wobkrući. Ći, kiž tam hišće serbuja, zwjetša generaciji prawowkow a pradźědow přisłušeja. Swoju rěč su sej dźě zachowali, młódšim dale dali ju pak njejsu. Axel Arlt

Jutře za šěsć tydźenjow chcedźa zakładny kamjeń noweho Slepjanskeho šulskeho centruma połožić. Tohodla je so tamniša gmejnska rada wčera k wurjadnemu posedźenju zetkała.

Slepo (AK/SN). Nowotwar Slepjanskeho němsko-serbskeho šulskeho kompleksa móže so kaž planowane 21. septembra z połoženjom zakładneho kamjenja zahajić. „Prěnje tři losy za přihotowanske dźěła su hižo wotdźěłane“, rjekny nawoda twarskeho zarjada Slepjanskeje zarjadniskeje zhromadnosće Steffen Seidlich na wčerawšim wurjadnym posedźenju gmejnskeje rady. Jeje čłonojo dalše nadawki rozdawachu.

Mjez hornjołužiskimi konjacymi dworami je Bartušec Šumjelowy na kromje něhdy serbskeje wsy Rakojdy w gmejnje Malešecy swojorazny. Wězo móžeš tu jěchać wuknyć a wšelake druhe posłužby wužiwać, kotrež lubowarjam koni na tajkich dworach poskićeja. Na jedyn wobłuk pak je mějićel Ekhard Bartuš wosebje hordy. Jězby z kuču a kursy za přichodnych wodźerjow kučow 74lětnemu wosebje na wutrobje leža.

„Stara wjesnjanka praješe, zo sym najprjedy wuknył z konjacym zapřahom jězdźić a hakle po tym běhać“, Rakojdźan měni. W ratarstwje staršeju wotrostły ma wosebity poměr ke konjam a konjacym zapřaham. Nimale 20 lět wobdźěleše so wukubłany ratar za čas NDR na wubědźowanjach jako wušikny wodźer zapřaha. Radosć nad tejle družinu konjaceho sporta bě tomu sobu polěkowała, Šumjelowy dwór wutworić a za to wot 1998 na swójskej pódźe inwestować.

„Lubowach swoje čornaki. Hdyž pak chcych jězby z běłej kwasnej kuču poskićeć, mi rjeknychu, zo so čorne konje k tomu njehodźa. Ćežkeje wutroby je předach a kupich sej šěre šumjele“, wuswětla Ekhard Bartuš mjeno swojeho konjaceho dwora.

Nowa wjednica

Njebjelčicy. Viktorija Brězanec je nowa wjednica Njebjelčanskeje pěstowarnje. To wobkrući nowinski rěčnik Křesćansko socialneho kubłanskeho skutka CSB Maik Brězan na wospjetne naprašowanje SN. Wona je zastojnstwo 1. awgusta přewzała, tak CSB jako nošer. Jeje zastupjerka je Andreja Hejdušcyna, kotraž je zdobom zamołwita za hort. Dotalna wjednica, Anke Grofina, bě kónc junija wotešła.

Ermer pola Radworskeje CDU

Radwor. Něhdźe 25 zajimcow je wčera wječor přeprošenje Radworskeho wjesneho zwjazka CDU na žurlu tamnišeho hosćenca „Meja“ sćěhowało. Jako hosća běchu sej direktneho kandidata CDU Rolanda Ermera přeprosyli. Přitomni wužichu składnosć, pjekarskeho mištra z Njedźichowa wosobinsce zeznać.

Pěši přez Čěsku w ani njedźelomaj