Nastajnosći dyrbja so gmejnske rady z tym rozestajeć, hač staršiski popłatk za pěstowarnje přiměrja, štož zwjetša rěka, zo jón podróša. Tež Kubšiskich ­radźićelow je tema nětko zaběrała.

Kubšicy (CS/SN). Při njedawnym orkanje „Friederike“ je Kubšiska gmejna z módrym wóčkom wotešła. Tole rjekny wjesnjanosta Olaf Reichert (njestronjan) na zašłym posedźenju gmejnskeje rady. Jeničce w Bošecach bě sčasami milina wupadnyła, štož k tomu wjedźeše, zo dyrbješe tamniša zakładna šula 19. januara zawrjena wostać. Kubłanišćo je zdobom jedne z najwažnišich inwesticiskich předewzaćow gmejny. Jeho nuzne saněrowanje ma so lětsa zahajić. Dale chcedźa wjacore ležownosće kupić, dwě juchowej jamje twarić a puć wot Bošec do Jenkec ponowić. Zadołženje na wobydlerja wučinja jeničce 35,44 eurow. Ličba wobydlerjow je z nimale 2 600 minjene lěta w dalokej měrje konstantna wostała. Jedna z přičin je, zo móžeš w Kubšicach derje bydlić. Runje tohodla pak je tež nuznje trjeba šulu ponowić. Runočasnje chcedźa so prócować, zo młodym swójbam městno za swójski dom poskića.

Dalše koło na dobro wsow

Drježdźany. Třeću namołwu „Witalne wjesne jadra a městne srjedźišća we wjesnym rumje“ je sakske ministerstwo za wobswět a ratarstwo dźensa starto­wało. Z programom podpěruja projekty, wusměrjene na wuwiće wsow, a wudospołnjeja prócowanja we wobłuku regionalneho wuwića Leader. Za lěto 2018 přewostaja Sakska 15 milionow eurow spěchowanskich srědkow.

Nowa železniska karta

Budyšin. Aktualizowana kompaktna karta „Železnicy w Sakskej“ dawa přehlad wo wšěch železniskich čarach w swobodnym staće kaž tež informacije wo tarifach a móžnosće, kontakt nawjazać. Ćišćenku poskićeja wotnětka we wšěch wobchadnych zwjazkach Sakskeje, w ćahach a serwisowych zarjadnišćach, zdźěli dźensa Zaměrowy wobchadny zwjazk Hornja Łužica-Delnja Šleska ZVON.

Hódančko pječa rozłušćene

Stróža. Po zymskej přestawce je wot dźensnišeho Stróžanski wopytowarski informaciski centrum biosferoweho rezerwata Hornjołužiska hola a haty Dom tysac hatow zaso přistupny. Hižo jutře, pjatk, w 17 hodź. wotewru jednu z lětušich třoch wosebitych wustajeńcow. W njej su widźeć mólby a paslenki, nastate loni we wobłuku dźěćaceho a młodźinskeho wubědźowanja Domowinskich župow Budyšin, Kamjenc a Wojerecy pod hesłom „Krabat 2.0“. We wobłuku wotewrjenja porěči biograf a genealoga Hans-Jürgen Schröter z Kulowa wo žiwjenju Johanna von Schadowitza (1624– 1704), kiž je jako Krabat do łužiskich stawiznow­ zašoł.

Zhromadnje štomiki spalić

Chrósćicy. Swój wusłuženy hodowny štomik móža Chróšćenjo njedźelu, 4. februara, jednorje a přijomnje wotbyć. Wohnjowa wobora wšitkich wobydlerjow přeproša, wot 16 hodź. při wohnjowobornej gratowni zhromadnje hodowne štomiki spalić. Wo ćělne derjeměće je postarane. Organizatorojo nadźijeja so bohateho wopyta.