Debjenje jejkow zajimčam zbližiła
Policija (07.03.18)
Ćežke mašiny kradnyli
Pomorcy. Njeprošeny wopyt mějachu minjeny kónc tydźenja w jednym Pomorčanskim zawodźe. Zawčerawšim rano dyrbjachu sobudźěłaćerjo zwěsćić, zo běchu so tam njeznaći zadobyli. Z dźěłarnje pokradnychu paduši pjeć ćežkich mašinow za wobdźěłanje drjewa. Jich hódnotu trochuje wobsedźer na něhdźe 8 000 eurow. Kaž policija zdźěli, su skućićeljo lědma slědy zawostajili, štož wobdźěłanje pada poćežuje.
Pomhaja twarcam
Město Kulow podpěruje projekty na wsach
Kulow (AK/SN). W Mučowje, Salowje a Koćinje podpěruje město Kulow twarske předewzaća. Z nimi su so měšćanscy radźićeljo tele dny na swojim posedźenju zaběrali. W Mučowje jedna so wo wobtwarjenski plan „Při jamowej železnicy“. K njemu měještej wodowy zarjad Budyskeho krajnoradneho zarjada a Sakske krajne zarjadnistwo rěčnych zawěrow kritiske přispomnjenja. Te pak móžeše architekturny běrow rozrisać wotwažujo zapodate stejišća.
W Salowje zdźěłuje město wobtwarjenski plan za Cyhelerski puć. „Tam je so nam poradźiło tři twarske ležownosće wutworić“, rozłoži nawoda měšćanskeho twarskeho wotrjada Stephen Rachel. Po jeho słowach je we wsy jara ćežko, twarske ležownosće namakać. Swobodne městna mjez statokami jich wobsedźerjo často njepředadźa, dokelž rezerwuja je za swoje wnučki a prawnučki.
Wotewrjenske časy změnjene
Budyšin. Nachwilnje změnjene su wotewrjenske časy Budyskeho Serbskeho domu. Wón je wot póndźele do štwórtka stajnje wot 6.30 do 16 hodź. a pjatk wot 6.30 do 14 hodź. přistupny. Wustajeńca „Domizna“ je dale přistupna přez Serbsku kulturnu informaciju wot póndźele do pjatka stajnje wot 10 do 16.30 hodź.
Mosćik na mału kupu
Worklecy (SN). Wulku a mału kupu Worklečanskeho kupoweho hata ma bórze drjewjany mosćik zwjazać. Tuchwilu steji wón w Sprjejcach w gmejnje Sprjewiny Doł. Dokelž tam dwanaće metrow dołhu a 2,6 metrow šěroku drjewjanu konstrukciju hižo njetrjebaja, móže ju Worklečanska gmejna darmotnje přewzać. Jeničce wo transport dyrbja so sami starać, rěkaše na posedźenju gmejnskeje rady. Z mostom na mału kupu chcedźa płoninu hata turistisce wožiwić.
Swobodni wolerjo so zetkali
Starosć wo měr dale jara trěbna
Póndźelny třeći a zdobom posledni wječor lětušeho ekumeniskeho póstneho seminara w Smochčanskim Domje biskopa Bena steješe pod hesłom „Brónjenje šwikać – dosaha to?“.
Smochćicy (CRM/SN). Za rozjimanje dosć sensibelneje tematiki běchu zarjadowarjo, do kotrychž słuša tohorunja Towarstwo Cyrila a Metoda, katolskeho wojerskeho dekana Bernda Schallera z Berlina a Annemariju Müller z Ekumeniskeho informaciskeho centruma w Drježdźanach zdobyli.
Po wobstajnych krutych zmjerzkach minjeny tydźeń so Hornja Łužica ...
Rjemjesła derje wothłosowane
Mnohe łužiske twarnišća zymy dla wotpočuja. Na němsko-serbskim šulskim kompleksu w Slepom pak dale twarja. Z aktualnym stawom su so tamniši gmejnscy radźićeljo wčera zaběrali.
Slepo (AK/SN). Twar Slepjanskeho němsko-serbskeho šulskeho kompleksa tež w zymje dale postupuje. To podšmórny Steffen Seidlich, nawoda twarskeho zarjada Slepjanskeho zarjadniskeho zjednoćenstwa na wčerawšim posedźenju gmejnskich radźićelow. „Jeničce jedyn tydźeń dyrbjachmy dźěła přetorhnyć“, wón rozłoži.
Firma Nadebor započnje 26. měrca z hłubokotwarskimi dźěłami we wobłuku zakładneje šule. Srjedź apryla pokročuja z nimi we wobłuku wyšeje šule a srjedź meje tam, hdźež ma raz sportownja stać. Tuchwilu twarja sćěny hornjeho poschoda zakładneje šule. Jako přichodny budźe wjerch na rjedźe. „Časowy plan je jara wuski. Ćim wažnišo je, zo jednotliwe rjemjesła prawje hromadźe dźěłaja a zo su mjez sobu derje wothłosowane“, Steffen Seidlich wuzběhny. Zo by twarnišćo wodnjo a w nocy wobstražowane było, je sej gmejna Slepo nětko poskitki wěstotnych firmow předpołožić dała.
Krótkopowěsće (07.03.18)
Šulske socialne dźěło rozšěrić
Drježdźany. Sakske knježerstwo je wčera změnu spěchowanskich směrnicow „šulske socialne dźěło“ wobzamknyło. Wot 2019 maja so dotal zasadźene srědki na 30,5 mio. eurow podwojić. Docpěć ma so personalna a fachowa kontinuita w poskitkach socialneho dźěła, wosebje na wyšich šulach w zjawnym nošerstwje.
Europscy ministrojo gratuluja
Lipsk. Europska syć za literaturu ze srjedźneje a južneje Europy TRADUKI zmóžnja lětsa 10. króć na Lipšćanskich knižnych wikach zetkanja mjez druhim awtorow, nakładnikow a kritikarjow. K tomu gratuluja 16. měrca zwjazkowy wonkowny minister Sigmar Gabriel (SPD) kaž tež ministrojo za kulturu z Chorwatskeje, Makedonskeje, Montenegra, Rumunskeje a Serbiskeje.
Wabja na ITB za Łužicu
Policija (06.03.18)
Płunowód wobškodźili
Budyšin. Njeměrny wječor mějachu zawčerawšim wobydlerjo wjaceswójbneho domu na Budyskej Kamjentnej hasy. Woni dyrbjachu krótko po 17 hodź. swoje bydlenje wopušćić, dokelž w pincy za płunom smjerdźeše. Přiwołani wohnjowi wobornicy zwěsćichu, zo bě něchtó płunowód wotpohladnje skóncował. Bě drje tuž wulke zbožo, zo měšeńca płuna a powětra rozbuchnyła njeje. Sobudźěłaćer energijoweho zastaraćela wšitko přepruwowaše a alarm zběhny, tak zo móžachu ludźo zaso do swojich bydlenjow. Kriminalisća pad přepytuja.
