Kapałku na kromje Kanec do směra na Swinjarnju tuchwilu ponowjeja. ...
Cyrkwinsku za 750. jubilej wožiwić
Wojerowske stare město chce ludźi z „bulwarom Cyrkwinska“ wot 4. junija do 1. julija přeprosyć, zo bychu tam flaněrowali a chłóšćili. Z projektom wobdźěli so přemysłowy kruh Město-přichod na jubileju „750 lět Wojerecy“.
Wojerecy (AK/SN). „Chcemy žiwu městnosć přebytka a dožiwjenja tworić, zapřijejo wikowanje, gastronomiju a posłužby.“ Tak předstaji cityjowa managerka a architektka Dorit Baumeister koncept wčera we wobydlerskim centrumje Piwarska hasa 1. „Z hrodom, coowom, wobydlerskim centrumom a kinom mamy kompaktnje štyrjoch sylnych partnerow w starym měsće.“ Wotpohladane je areal kwalitatiwnje nahódnoćić, zjawne rumy zapřijeć a poskitki rozšěrić.
Krótkopowěsće (14.02.18)
Předstaja digitalnu wučbnicu
Drježdźany. Rěčny centrum WITAJ chce 29. měrca w Drježdźanskej statnej kencliji prěnju serbsku digitalnu wučbnicu předstajić. Za prezentaciju programa „Serbšćinu DIGITALNJE krok po kroku wuknyć – prawopis a gramatiku“ staj so mjez druhim sakskaj statnaj ministraj za wědomosć a wuměłstwo kaž tež kultus dr. Eva-Maria Stange (SPD) a Christian Piwarz (CDU) přizjewiłoj.
Wupisaja stipendij
Biskopicy. Zhromadna załožba města Biskopic wupisa stipendij za wobdarjenych młodych muzeologow a wuměłskich wědomostnikow. Po zakónčenju studija ma so stipendiatej na šěsć měsacow swobodne dźěło bjez wjetšich financnych starosćow zmóžnić. Požadanja pod hesłom „stipendij“ přijimuje Biskopičanske měšćanske zarjadnistwo.
Hładźina morja spěšnišo stupa
Basnje a spěwy wokřewjace a wobohaćace
Chrósćicy (MG/SN). „Ja was wšitkich witać mam, lubje witajće dźens k nam. Hdyž so z nami schadźujeće, wěmy, zo so radujeće: Před 55 lětami so naš kružk załoži. Z tołsteje mapy smy wubrali tu za was někotre přinoški.“ Takle witaše Monika Kochowa minjenu sobotu wopytowarjow literarno-hudźbneho wječora w Chróšćanskej putniskej hospodźe. Wona a dalši čłonojo Róžeńčanskeo kružka pisacych – wuměłski nawoda Beno Budar, Katrin Domašcyna a Marko Rab – čitachu basnje a krótke powědki. Marija Šołćina postara so wo hudźbne wobrubjenje na gitarje a ze swójskimi spěwami. Na wulkotne wašnje zastupjenej běštej dalšej čłonce kružka, kotrejž njemóžeštej wosobinsce přitomnej być – Borbora Mikławškowa a Blandina Ledźborjowa: Pjeć holcow, wnučki Borbory Mikławškoweje, čitaše wotměnjejo jeju teksty. To bě wokřewjace a wobohaćace. Je dźě to znamjo, zo hižo młoda generacija so započina za basnjenje zajimować. Nimo toho zawjeselichu wone wopytowarjow póstnisku sobotu w póstniskich kostimach.
Policija (13.02.18)
Młodej žonje znjezbožiłoj
Zejicy. Ćežke wobchadne njezbožo sta so wčera dopołdnja na statnej dróze S 101 mjez Zejicami a Hornim Wujězdom. 28lětna wodźerka Mitsubishija zajědźe w lěwej křiwicy na napřećiwnu jězdnju a šmórny so Hyundaija 29lětneje. Wobě jězdźidle wostaštej hakle na polu stejo. Jeju wodźerce so ćežko zraništej. Młódšu je helikopter do chorownje dowjezł, tamnu zranjenu wuchowanske awto. Škoda wučinja 4 000 eurow.
Woheń wosrjedź nocy
Halštrow. Wšo druhe hač měrnu nóc mějachu dźensa w nocy w Halštrowje. Tam kaž tež w Rušicy, Krěpjecach, Protecach, Kamjencu a Brězni wołaše něhdźe w 2.30 hodź. sirena wobornikow k hašenju. Na Talpenbergskej bě woheń w garaži wudyrił. Něhdźe 70 wobornikow tomu zadźěwa, zo płomjenja na bydlenski dom w bjezposrědnim susodstwje přeskočichu. Wobydlerjo běchu woheń sčasom pytnyli a swój dom wopušćili, tak zo so nichtó njezrani. Něhdźe w 5 hodź. běchu płomjenja zhašane.
Zbrašenym póstnicy wuhotowali
Hłownu zhromadźiznu přewjedli
Domowinska skupina Komorow/Trupin/Rakecy přewjedźe minjeny pjatk w Komorowje swoju lětnu hłownu zhromadźiznu, a to pod nawodom čłonki skupinskeho předsydstwa Alenki Hageroweje. Wona zwěsći w rozprawje, zo je skupina wšitke předewzaća, kotrež bě loni 10. februara wobzamknyła, spjelniła. To běchu na přikład přednošk Sonje Hrjehorjoweje wo strowym zežiwjenju, wulět do Kamjenca z wopytom Muzeja zapadneje Łužicy a wodźenjom po sakralnym muzeju Haninej cyrkwi, grilowanski wječork, přednošk wo Israelu a hodownička, kotruž wobrubichu dujerjo pod nawodom čłonki skupiny Andreje Langneroweje.
Trabi ze serbskej chorhojčku
Wjace hač 20 wulkich wozow a 100 wobrazow w póstniskim ćahu
Kulow (SN/MWj). Z Radworja, Hórkow, Pančic-Kukowa, Njebjelčic a dalšich kónčin dwurěčneje Hornjeje Łužicy dojědźechu sej nory wčera do Kulowa, zo bychu tam róžowopóndźelny póstniski ćah dožiwili. Po měnjenju wjacorych přihladowarjow bě wón jedyn z najdlěšich zašłych lět, přetož ručež bě posledni wóz prěni raz nimo radnicy jěł, jewješe so hižo zaso čoło ćaha. Na torhošću a na wokolnych hasach tysacy ludźi noram na wjetšich a mjeńšich wozach přikiwachu a jich ideje wobdźiwachu.
Lokalne politiske naležnosće su wčera lědma rólu hrali, za to pak „wulka“ politika. Tak zaběrachu so Kobličenjo z wuchowanskej hasku po njezbožach, Němčenjo mějachu cirkus za temu, a wóz z Rachlowa zaběraše so z łužiskej brunicu. Koćinska młodźina je na swojim wozu wuchowanski helikopter zwobrazniła, Kulowski VW-klub šwikaše dwuklasowu towaršnosć we wobłuku strowotniskeho systema.
Ludowe póstnicy
Krótkopowěsće (13.02.18)
Znamjo wujednanja
Drježdźany. Z kilometry dołhim rjećazom ludźi chcedźa Drježdźanjenjo dźensa wot 17.30 hodź. na róčnicu zničenja swojeho města přez aliěrowane bombowcy w Druhej swětowej wójnje dopominać. Rjećaz ma jako znamjo wujednanja a dorozumjenja w měšćanskim centrumje ludźi na woběmaj pobrjohomaj Łobja mjez sobu zwjazać.
Minister pola FSJnikow
Ochranow. Sakski statny minister za kultus Christian Piwarz (CDU) wopyta jutře w Ochranowje 40 młodostnych, kotřiž wukonjeja tuchwilu dobrowólne socialne lěto (FSJ) na šulach. Woni přebywaja tam w Domje Komenskeho na seminarnym tydźenju. Po słowach Piwarza „skići FSJ wobdźělnikam hódne nazhonjenja a pomha jim, swójsku powołansku perspektiwu wuwiwać“.
Pomoc firmow prašana
