Rjemjesła derje wothłosowane
Mnohe łužiske twarnišća zymy dla wotpočuja. Na němsko-serbskim šulskim kompleksu w Slepom pak dale twarja. Z aktualnym stawom su so tamniši gmejnscy radźićeljo wčera zaběrali.
Slepo (AK/SN). Twar Slepjanskeho němsko-serbskeho šulskeho kompleksa tež w zymje dale postupuje. To podšmórny Steffen Seidlich, nawoda twarskeho zarjada Slepjanskeho zarjadniskeho zjednoćenstwa na wčerawšim posedźenju gmejnskich radźićelow. „Jeničce jedyn tydźeń dyrbjachmy dźěła přetorhnyć“, wón rozłoži.
Firma Nadebor započnje 26. měrca z hłubokotwarskimi dźěłami we wobłuku zakładneje šule. Srjedź apryla pokročuja z nimi we wobłuku wyšeje šule a srjedź meje tam, hdźež ma raz sportownja stać. Tuchwilu twarja sćěny hornjeho poschoda zakładneje šule. Jako přichodny budźe wjerch na rjedźe. „Časowy plan je jara wuski. Ćim wažnišo je, zo jednotliwe rjemjesła prawje hromadźe dźěłaja a zo su mjez sobu derje wothłosowane“, Steffen Seidlich wuzběhny. Zo by twarnišćo wodnjo a w nocy wobstražowane było, je sej gmejna Slepo nětko poskitki wěstotnych firmow předpołožić dała.
Krótkopowěsće (07.03.18)
Šulske socialne dźěło rozšěrić
Drježdźany. Sakske knježerstwo je wčera změnu spěchowanskich směrnicow „šulske socialne dźěło“ wobzamknyło. Wot 2019 maja so dotal zasadźene srědki na 30,5 mio. eurow podwojić. Docpěć ma so personalna a fachowa kontinuita w poskitkach socialneho dźěła, wosebje na wyšich šulach w zjawnym nošerstwje.
Europscy ministrojo gratuluja
Lipsk. Europska syć za literaturu ze srjedźneje a južneje Europy TRADUKI zmóžnja lětsa 10. króć na Lipšćanskich knižnych wikach zetkanja mjez druhim awtorow, nakładnikow a kritikarjow. K tomu gratuluja 16. měrca zwjazkowy wonkowny minister Sigmar Gabriel (SPD) kaž tež ministrojo za kulturu z Chorwatskeje, Makedonskeje, Montenegra, Rumunskeje a Serbiskeje.
Wabja na ITB za Łužicu
Policija (06.03.18)
Płunowód wobškodźili
Budyšin. Njeměrny wječor mějachu zawčerawšim wobydlerjo wjaceswójbneho domu na Budyskej Kamjentnej hasy. Woni dyrbjachu krótko po 17 hodź. swoje bydlenje wopušćić, dokelž w pincy za płunom smjerdźeše. Přiwołani wohnjowi wobornicy zwěsćichu, zo bě něchtó płunowód wotpohladnje skóncował. Bě drje tuž wulke zbožo, zo měšeńca płuna a powětra rozbuchnyła njeje. Sobudźěłaćer energijoweho zastaraćela wšitko přepruwowaše a alarm zběhny, tak zo móžachu ludźo zaso do swojich bydlenjow. Kriminalisća pad přepytuja.
Zamjerznjene haty wabili
Nowostka změje premjeru
Budyšin. Zajutřišim, 8. měrca, w 19.30 hodź. je w Budyskej Smolerjec kniharni premjera nowostki „Módre buny“, a to z awtorku Lubinu Hajduk-Veljkovićowej. W Budyšinje je so grawoćiwy njeskutk stał. Młoda serbska komisarka Janka a jeje němski kolega Alek dyrbitaj tak skoku kaž móžno mordarja wuslědźić. Serbsko-němski miljej jednanja je wosebitosć noweje kriminalki.
Wo žiwidłach swěta
Kamjenc. Wosebita wustajeńca wo žiwidłach swěta je hač do 26. měrca w Kamjenskej ludowej uniwersiće na Macherowej 144a widźeć. Přehladka demonstruje mnohotnosć žiwidłow, ale tež, kak njesprawnje su wone rozdźělene. Jeje awtor Peter Menzel je w 24 krajach dohromady 30 swójbow wopytał a je hromadźe z mnóstwom žiwidłow fotografował, kotrež ma kóžda swójba wob tydźeń k dispoziciji. Wustajeńca je wot póndźele do pjatka stajnje wot 8 do 20 hodź. darmotnje přistupna. Šulske rjadownje njech přizjewja so pod telefonowym čisłom 03578/ 309 630.
Kofej – tykanc – politika
Wašnja a nałožki kołowokoło kwasa
Čakaja na „ćopły dešć“
Chrósćicy (JK/SN). Lětuši hospodarski plan Chróšćanskeje gmejny je tak daloko nastajeny a z aktualnymi ličbami wudospołnjeny, zo jón na gmejnskim zarjedźe zjawnje wupołoža. Nětko maja wobydlerjo składnosć, sej jón spřistupnić a, je-li trjeba, dodawki abo wudospołnjenja dodać. Na swojim posedźenju w aprylu chce gmejnska rada potom plan wobzamknyć.
W zwisku z planom poda wjesnjanosta Marko Kliman (CDU) radźićelam na zašłym posedźenju aktualne informacije k wot sakskeho ministerskeho prezidenta Michaela Kretschmera (CDU) připowědźenej pomocy 70 000 eurow kóždej sakskej komunje. Pjenjezy na kóždy pad přińdu, to bu wjesnjanostam na njedawnej zhromadźiznje pola krajneho rady hišće raz wobkrućene. Jenož modality, hdy a w kotrej formje je komuny dóstanu, njejsu hišće znate. Wěste jenož je, zo njebudu pjenjezy na někajke wuměnjenja wjazane. To wobkrući napřećo gmejnje po słowach Marka Klimana tež zapósłanc CDU w Sakskim krajnym sejmje Alojs Mikławšk. Tak wjesela so kaž we wšitkich druhich sakskich gmejnach tež w Chrósćicach na tón ćopły dešć.
„Serbja, žonop a Silbermond“
Město Budyšin proces wuwića hač do lěta 2030 oficialnje zahajiło
Budyšin (SN/mwe). „Kak dale z Budyšinom, a to znajmjeńša hač do lěta 2030?“ Tute prašenje steješe wčera w fokusu nowinarskeje konferency. Wyši měšćanosta Alexander Ahrens (SPD) bě žurnalistow na rozmołwu přeprosył. Wšako je Budyšin oficialnje zjawny proces k zdźěłanju wusměrjenja do přichoda zahajił. „Wobraz přichoda je směrnica za wuwiće města“, Ahrens nowinarjow witaše. „Tomu drje kóždy přihłosuje, wšako dźe wo faktor derjeměća.“ Wyši měšćanosta rysowaše situaciju, zo je wot lěta 2005 wjele ludźi město dźěła a druhich přičin dla wopušćiło. Mnozy pak so zaso nawróćeja a tež na wokolnych wsach swoju domiznu nadeńdu. Ličba porodow stupa. Z tysac ludźi ma něhdźe 670 dźěło. Předewzaća nadźěłuja dobre wobroty, a wšědnje jězdźi něhdźe 19 000 ludźi z wokoliny do města na dźěło. K identiće Budyšina słušeja Serbja, jich stawizny a žiwjenje dźensa. „Žiwej stej tu dwaj ludaj“, rěkaše.
