Rozmysluja wo wustawkach
Chrósćicy (JK/SN). W kóždej legislaturnej periodźe gmejnskich radow maja so komunalne wustawki přepruwować a na potrjebu a dźěławosć gmejnskeje rady wusměrić. Na njedawnym posedźenju Chróšćanskich gmejnskich radźićelow wjesnjanosta Marko Kliman (CDU) na to skedźbni, zo je při čitanju wustawkow namakał někotre pasaže, kiž načasnym postajenjam hižo njewotpowěduja abo kotrež měli jasnišo sfomulowane być.
Nadawki wjesnjanosty njejsu we wustawkach hižo tak zapisane, kaž je tuchwilne zarjadniske předpisy rjaduja. Wulki dźěl zarjadniskeho dźěła wjesnjanostow wukonja hižo tójšto lět zarjadniski zwjazk Při Klóšterskej wodźe. Jenož hišće cyle konkretnje na gmejnu wusměrjene nadawki a rozsudy zamołwja wjesnjanosta. Běžne zarjadnistwo kaž knihowanje a statistiske rozprawnistwo přewozmje za gmejny centrala w Pančicach-Kukowje. Wažne je, zo so we wustawkach rjaduje, w kotrej měrje wobydlerjo w komunalnym dźěle sobu skutkuja. Wopřijeća kaž wobydler abo wjesnjan maja so we wustawkach jasnje zakótwić.
Policija (24.08.17)
Bungalowaj so wotpaliłoj
Wojerecy. Wohnjowych wobornikow a policiju su wčera wječor we Wojerecach wołali, dokelž so w jednym zahrodnišću dwaj bungalowaj paleštej. Jako kameradojo přijědźechu, běchu so płomjenja we woběmaj, něhdźe 400 metrow wot so zdalenymaj bungalowomaj połnje rozpřestrěli. Byrnjež hnydom hašeć započeli, stej so domčkaj dospołnje wotpaliłoj. Zranił so nichtó njeje. Za přičinami wohenja tam dźensa slědźachu.
Na bjesadźe zhromadnje spěwali
Drježdźanscy Serbja su so minjenu njedźelu zaso raz k bjesadźe zetkali. Wona wšak bě jenož dodawk. Prawidłownje jězdźi farar Gabriš Nawka k nam do sakskeje stolicy, zo móhli serbsku Božu mšu swjećić. Smy jemu jara dźakowni, zo wón słužbu swěrnje pola nas w Drježdźanach wukonja. Tónraz běchmy nimale 50 ludźi, telko kaž hišće ženje. Po kemšach dachmy sej we wosadnicy kofej, samopječeny tykanc a pomazki zesłodźeć. Wězo sej tež zaspěwachmy. Towaršne spěwniki bě farar Nawka sobu přiwjezł. Přichodna serbska Boža mša w Drježdźanach budźe 5. nowembra w 15 hodź. we wosadźe swj. Antoniusa.
Ekumeniski nyšpor ze superintendentom Janom Malinkom swjećimy potom 2. decembra w 15 hodź. w cyrkwi swj. Józefa. Tež tónle nyšpor do prěnjeho adwenta je rjana, wjelelětna a woblubowana tradicija. Jadwiga Nawka
Dołh zaměrnje pomjeńšeja
Połlětna rozprawa města Kulowa swědči wo solidnym hospodarjenju
Kulow (AK/SN). W prěnim połlěće 2017 je město Kulow solidnje a disciplinowanje hospodariło. Tole podšmórny komornik Thomas Woelke na wčerawšim posedźenju měšćanskeje rady w Dubrjenskim kulturnym domje w swojej połlětnej rozprawje k hospodarskemu planej 2017. „W zarjadniskim wobłuku so dochody a wudawki nimale runaja“, wón rozłoži. „Hinak je při inwesticijach. Te najprjedy raz jako město financujemy. Štož bě planowane, je so tež zwoprawdźiło a dyrbi so nětko refinancować.“
Při saněrowanju Krabatoweje zakładneje šule su třěchu, tepjensku připrawu a elektriku ponowili. Po słowach komornika su twarske firmy za čas prózdnin pilnje dźěłali. Kaž planowane su spočatk awgusta hort na přetwarjenym Starym dwórnišću přepodali. Minjeny pjatk, tak rozprawješe měšćanosta Markus Posch (CDU), zatwarichu w sportowni nowu přewětrjensku připrawu. „Wšitko je derje fungowało.“
Změja kupjel pod hołym njebjom?
Město Kamjenc intensiwnje pruwuje, hač hodźi so teren při halowej kupjeli za to wužiwać, tam kupjel pod hołym njebjom twarić. Woprawdźe nowa wšak tale ideja njeje.
Kamjenc (UM/SN). Město Kamjenc chce sej móžnosć wobchować, halowu kupjel na Macherowej z wonkownymi připrawami rozšěrić. Tole wuchadźa z naćiska twarskeho plana za sewjerny dźěl zarjadniskeho centruma. Srjedźo- abo dołhodobnje móžne rozšěrjenje móhło „łuki za hrajkanje, dźěćacy basenk, sawnowu krajinu a přidatne parkowanišća wopřijeć“, w naćisku rěka. Na druhim městnje je samo wo kupjeli pod hołym njebjom rěč. Wuchadźišćo je „přeće mnohich Kamjenčanow, z kupjelu wólnočasny poskitk w měsće wudospołnić“.
Edit Pjenkowa w Rownom je hospoza z ćěłom a dušu a chwali sej ...
Čerstwe witaminy potrěbnym
Hosćo waža sej měrnu městnosć na kromje Budyšina (9)
Dowol kaž na wsy, to je zasada Třělanskeho (Strehlaer) dwora swójby Gottlöber na Čornobóskej, na juhowuchodźe města Budyšina. A što k dowolej na wsy k tomu słuša? Wězo skót, a tón w bohatej ličbje. Kudźerjowe hołbje, kokoše, husy, kozy, nukle a wězo konje móža hosćo tule dožiwić. W měsće być a so přiwšěm čuć kaž na wsy, to hosći Třělanskeho dwora wabi. Často, nic pak jenož, pochadźeja woni z wulkoměstow kaž z Berlina, Kamjenicy abo Drježdźan. Móžachu pak tam tež hižo dowolnikow ze Šwicarskeje, Awstriskeje, Čěskeje, Nižozemskeje a z krajow za oceanom witać.
Třělanski dwór skići we hłownym twarjenju a w prjedawšim čeladnym domje dźewjeć prózdninskich bydlenjow rozdźělneje wulkosće. Najmjeńše su za jednu wosobu abo dwě. We wjetšich móža hač do šěsć ludźi zaměstnić. Wo snědań staraja so dowolnicy sami, ma dźě kóžde prózdninske bydlenje tež kuchnju. „Hdyž pak přizjewi so wjace hač wosom wosobow tři dny za sobu k snědani, da ju pensija přihotuje. Hewak njeby so to wudaniło“, Sabine Gottlöber tónle serwis rozłožuje.
Krótkopowěsće (23.08.17)
Serbski institut zahaji blog
Budyšin. „Lausitz – Łužica – Łužyca“ rěka blog, z kotrymž kroči Serbski institut po nowych pućach, posrědkować regionalne stawizny a regionalnu kulturu. W swobodnym slědźe chcedźa tam přinoški z aktualneho krajowědno-sorabistiskeho slědźenja šěrokemu publikumej spřistupnić. Internetna adresa bloga je www.lausitz.hypotheses.org.
Serbski klasikar znowa wušoł
Budyšin. W rjedźe „Die sorbische Bibliothek“ je LND nětko 1976 wušłu knihu Jurja Brězana „Krabat oder Die Verwandlung der Welt“ znowa wudało. Roman słuša bjezdwěla k najwuznamnišim twórbam serbskeje literatury docyła. Brězan rozestaja so w nim jako jedyn z prěnich awtorow w Němskej literarnje z rizikami biologije a genetiki.
Młodostnych za wučerstwo zdobyć
Tři dny 700lětne wobstaće delnjołužiskeje wsy swjećili
Rubyn (HA/SN). Domowinska skupina Rubyn w Delnjej Łužicy bě minjeny kónc tydźenja hłowna organizatorka wulkeho wjesneho swjedźenja. Němsko-serbska wjes we wokrjesu Sprjewja-Nysa ze swojimi něhdźe 250 wobydlerjemi je tři dny dołho 700lětne wobstaće swjećiła. Wona bu w awgusće 1317 prěni raz pisomnje naspomnjena.
Wjeršk wulkeho kónctydźenskeho jubileja běše swjedźenski ćah po Rubynje sobotu popołdnju. W nim je nimale 150 ludźi w cyłkownje 30 wobrazach předstajiło stawizny něhdy ryzy serbskeje burskeje wsy kaž tež dźensniše žiwjenje w njej. Mjez druhim pokazachu burske dźěło, wšelake wjesne rjemjesła kaž tež serbske tradicije. Mjez wobdźělnikami bě něhdźe 60 žonow a holcow w swjedźenskej abo dźěłanskej drasće Delnich Serbow. Někotre žony a holcy ze susodnych wsow běchu sej ju tohorunja za jubilejny swjedźeń zwoblěkali.
