Kandidat so předstaji

wutora, 21. apryla 2015 spisane wot:
Delni Wujězd (SN). Tež w Hamorskej gmejnje wola 7. junija noweho wjesnjanostu. Jako njewotwisny kandidat nastupi Frank Knobloch. Za to trjebaše wón 40 podpěranskich podpismow. Jenož dobry tydźeń je trało, zo so samo 70 wobydlerjow do Hamorskeho gmejnskeho zarjadnistwa poda a za Knoblocha podpisa. Nětko chce wón swój wólbny program zjawnje předstajić, a to štwórtk, 23. apryla, we 18 hodź. w Delnjowujězdźanskim hosćencu „Tři lipy“. Knobloch je 49 lět a skutkuje samostatnje we wobłuku financnych posłužbow a zawěsćenjow.

Wjesnjanosta skupinarjow wopytał

wutora, 21. apryla 2015 spisane wot:

K zajimawemu stawizniskemu wječorej zetkachu so minjeny pjatk čłonoje Domowinskeje skupiny Komorow/Trupin/Rakecy a dalši zajimcy w Komorowskim młodźinskim klubje. Předsydka Borbora Felberowa powita wosebje Swena Nowotneho, noweho Rakečanskeho wjesnja­nostu, kiž bu hakle tydźenja wuzwoleny. Jako witanski dar přepoda jemu dźěłowy plan skupiny. Swen Nowotny wupraji so za­ to, zo měli so kultura a nałožki na wsach­ gmejny zachować, a podšmórny wuznam towarstwow. Nadźijomnje gmejna a wjesnjanosta wobydlerjow w prócowanju wo aktiwne skupinske dźěło tež přichodnje podpěrujetaj.

„Wikowanske dróhi mjez Kamjencom a Budyšinom“ rěkaše na to přednošk Trudle Kuringoweje. Něhdyša wučerka a županka zaběra so hižo wjele lět ze stawiznami a kulturu swojeje dwurěčneje domizny wokoło Kamjenca. Jara zajimawy film wo wikowanskich pućach w srjedźowĕku a wuznam za žiwjenje našich prjedownikow, wuwiće rjemjesła a industrije – wšo to zbudźi wulki zajim mjez připo­słucharjemi.

Jutře twarja kružny wobchad

wutora, 21. apryla 2015 spisane wot:

Na Budyskim křižowanišću zahaja druhi dźěl měšćanskeho pospyta

Budyšin (SN/MWj). Po tym zo płaći wot januara na Budyskich Lawskich hrjebjach a na Kamjentnej spěšnosć 30 km/h, započnje so jutře, srjedu, druhi dźěl po­spyta, z kotrymž chcedźa nutřkowne sprjewine město wobchadnje změrować. Wot 14 hodź. twarja na křižowanišću Drježdźanska / Schliebenowa / Zetkinowa prowizoriski kružny wobchad, kaž měšćanske zarjadnistwo zdźěla.

Spočatnje bě planowane, křižowanišćo přichodny pjatk a sobotu změnić a je w tym času dospołnje zawrěć. Toho so ­nětko wzdadźa. Po wčerawšim dorěčenju mjez wysokotwarskim a porjadowym wotrjadom měšćanskeho zarjadnistwa ze zastupjerjemi wobdźělenych twarskich firmow je předwidźane, dróhu z předjězbu, potajkim statnu dróhu S 111 a Zetkinowu połojčnje zawrěć, tamnej hasy, Schliebenowu a Drježdźansku, pak hač do wječora dospołnje zawrěć. Wo­kołopuć budźe po informacijach města wupisany.

Ze Smječkečanskeje cyrkwje su sobudźěłaćerjo Gerntkec třěchikryjerskeje firmy dźens dopołdnja křiž a kulu dele wzali. Dźakowano darej we wsy křćeneho muža móža woboje restawrować a znowa pozłoćić dać, informuje farar Friedrich Prüfer z Halštrowa, kiž Smječkečansku wosadu sobu zastaruje. Restawrowanje wobstara Rjenčec firma z Dobrošic. Foto: SN/Maćij Bulank

Krótkopowěsće (21.04.15)

wutora, 21. apryla 2015 spisane wot:

Tafla za Dom biskopa Bena

Smochćicy. Turistiska tafla ma při awtodróze A 4 do směra na Zhorjelc mjez Wujězdom a Słonej Boršću na Smochčanski Dom biskopa Bena skedźbnjeć. Tole zdźěli sakski zarjad za dróhotwar a wobchad. Bruna tafla pokazuje stilizowany hłowny dom z aleju štomow. Baroknemu ansamblej twarjenjow a parka ma so tak wjetša kedźbnosć wěnować.

Studija wo projekće Witaj wušła

Budyšin. Před wjac hač 15 lětami započa so projekt Witaj ze zaměrom, serbsku­ rěč zachować a rozšěrjeć. Tola kak je so­ projekt zwoprawdźił? W runje w LND wušłej publikaciji „Bilingualer Sprach­erwerb im Witaj-Projekt“ před­staja awtorka dr. Jana Šołćina prěni raz wuslědki rěčneho přepytowanja we Witaj-skupinach a -pěstowarnjach.

Wuspěšnje wotrěznyli

Krótkopowěsće (20.04.15)

póndźela, 20. apryla 2015 spisane wot:

Wjesnjanosta pola skupinarjow

Komorow. Mjez wopytowarjemi za­rjadowanja Domowinskeje skupiny Komo­row/Trupin/Rakecy minjeny pjatk w Komorowje bě nowowuzwoleny Ra­kečanski wjesnjanosta Swen Nowotny. Skupinska předsydka Borbora Felberowa přepoda jemu skupinski plan a jeho tež na dalše zarjadowanja přeprosy. Nowotny skedźbni w tym zwisku na wuznam towarstwow a wupraji so za zachowanje kultury a nałožkow na wsach.

Přez mjezy kraja dźěłać

Drježdźany/Podstupim. Hladajo na ak­tualnu debatu w zwisku z přichodom energijoweho koncerna Vattenfall we Łužicy chcedźa zapósłancy CDU Sakskeje a Braniborskeje wušo hromadźe dźěłać. Tole wuchadźa z nowinskeje zdźělenki. Hłowny zaměr je dźěłowe městna w regionje zdźeržeć a so zaměrnje na móžne nowe hospodarske struktury nastajić.

Strach lěsnych wohenjow wulki

Za zhromadnosć a sobuzamołwitosć

póndźela, 20. apryla 2015 spisane wot:

Hórnikecy (AK/SN). Pilne ruki su so sobotu w Hórnikecach při nalětnim rjedźenju gratu přimali. Wjace hač 30 ludźi bě namołwu wjesneje rady sćěhowało. Hnydom­ na šěsć městnach woni we wsy dźěłachu.

„Z tym móžemy spokojom być“, podšmórny wjesny předstejićer Otto-Heinz Lehmann. Na Bebelowym naměsće njedaloko energijoweje fabriki wurjedźichu woni městnosć před bywšim kulturnym domom a před pomjatnym kamjenjom. Na wulkim hrajkanišću kaž tež w parku před wobydlerskim centrumom zhra­bachu lisćo a wurjedźichu žiwy płót. W samsnym času přihotowachu młodostni swój mejski štom.

Policija (20.04.15)

póndźela, 20. apryla 2015 spisane wot:

Po njezbožu so zhubiła

Budyšin. Mało sobuzamołwitosće za tamnych wobdźělnikow nadróžneho wobchada měješe sobotu rano wodźerka wosoboweho awta w Budyšinje. Krótko po wosmich chcyše wona blisko agentury za dźěło z pódlanskeje hasy na Wonkownu Lawsku wujěć. Při tym pak njewobkedźbowaše předjězbu kolesowarki. Wona dyrbješe tak jara zaborzdźić, zo z kolesom padny a so zrani. K zražce z módrym Roverom pak njedóńdźe. Město toho zo by so jeho šoferka wo njezboženu 51lětnu kolesowarku starała, wona prosće dale jědźeše a so zhubi. Na zbožo sej swědcy awtowe čisło spomjatkowachu. Wo­dźerka Rovera změje so nětko ćeknjenja z městna njezboža dla zamołwić.

70 młodostnym a někotrym dorosćenym je Drježdźansko-Mišnjanski biskop Heiner Koch (srjedźa) sobotu w Chrósćicach sakramen­t firmowan­ja wudźělił. Wjetšina holcow bě družču drastu woblečena. Serbskich firmujomnych je biskop w jich ma­ćeršćinje firmow­ał. Na farskej zahrodźe dóńdźe po kemšach k mnohim rozmołwam z Heinerom Kochom. Foto: Feliks Haza

Dobyćerjo jutrowneje křižowki

pjatk, 17. apryla 2015 spisane wot:
Tójšto dopisow z prawym wuhódanjom našeje jutrowneje křižowki „Šła je holčka po wodu“ je minjene dny do redakcije dóšło, tak zo dyrbješe znowa redakciska fortuna zwěsćić, štó jedne z třoch mytow dóstanje. Nad němskorěčnej knihu Tru­dle Malinkoweje „Marja Kubašec“, wu­šłej w Ludowym nakładnistwje Domowina, smě so Joachim Schäfer ze Zdźarkow (Särchen) we Wulko­dubrawskej gmejnje wjeselić. Mari Maccy­nej z Chrósćic připósćelemy dobropis w hódnoće 20 eurow, kotryž je nam Holešowski zahrodkar Matijas Pěčka přećelnje pře­wostajił. A zastupnej lisćikaj za koncert Matthiasa Reima 25. julija na Kamjenskej Pastwinej horje dóstanje Maria Lawowa z Poz­dec. Zastupne lisćiki za tónle koncert­ dósta­njeće w znatych před­předawar­njach abo pod telefonowym hotline-čisłom 0 18 06 / 57 00 99. Wšitkich, kotrymž tónraz zbožo kiwało njeje, chcemy namołwić, so na wuhódanju přichodneje křižowki Serbskich Nowin wobdźělić.

nawěšk

nowostki LND