Přichod płuwarnje zaručeny?
Kamjenska halowa kupjel wostanje wotewrjena. Wolóžaca to powěsć dohromady 38 zakładnym šulam w regionje, tež serbskim, kotrež přewjeduja tam za swojich šulerjow płuwansku wučbu.
Připóznaće a nowe zrěčenje
Budyšin/Wojerecy (SN/at). Budyski wokrjes připóznawa docpěte wuslědki Wojerowskeje hudźbneje šule a ludoweje uniwersity a wobě kubłanišći dale podpěruje. Wotpowědnemu zrěčenju krajnoradneho zarjada z městom Wojerecami je wokrjesny sejmik póndźelu přihłosował. Wone płaći wot 1. septembra na dobu wosom lět. Lětna podpěra hač do 2022 wučinja nimale 280 000 eurow a něhdźe 313 000 eurow wot 2023 do 2026. Wobsahowje so porno dotalnemu, lěta 2008 wobzamknjenemu dojednanju, ničo njezměni. Wokrjes tak zwisowace nadawki městu Wojerecam dospołnje přenjese a so kóždehožkuli wobwliwowanja wuraznje wzda.
Prěnjotny wotpohlad, Budysku wokrjesnu hudźbnu šulu kaž tež wokrjesnu ludowu uniwersitu wo Wojerowskej kubłanišći wudospołnić, bu zaćisnjeny. Tak wostanjetej hudźbna šula a ludowa uniwersita wukonitej wobstatkaj tamnišeho měšćanskeho předewzaća Coo, kultura a kubłanje Wojerecy ptzwr.
Wojerowska měšćanska rada chce so na posedźenju 24. apryla z naležnosću zaběrać, kaž bě dźensa z radnicy zhonić.
Nowe kubłanišćo ma nastać
Jedne z najwjetšich twarskich předewzaćow we Wojerecach je saněrować a přetwarić bywši Zusowy gymnazij. Za to je tamniša měšćanska rada wčera prěnje nadawki přepodała.
Wojerecy (AK/SN). Pod pomnikoškitom stejacy bywši Konrada Zusowy gymnazij w měsće nad Čornym Halštrowom ma so dale wužiwać. Tam ma nowa centralna wyša šula z trěbnymi pódlanskimi twarjenjemi nastać. Za prěni twarski wotrězk, wopřijacy energetiske saněrowanje, je Wojerowska měšćanska rada na swojim wčerawšim posedźenju prěnje nadawki přepodała. W jednotliwym dyrbja stare drjewjane wokna wutwarić a wotwozyć a nowe wokna zatwarić. Dale ma so dohromady 500 metrow woknowych wobkromow zatwarić. Připrawić chcedźa tohorunja škit před słóncom. Nadawk we wobjimje 457 000 eurow dósta předewzaće z Noweje Łuki.
Budyska deklaracija schwalena
Budyšin (SN/at). „Pola nas maja ludźo mnohich narodnosćow, kulturow a nabožinow swoju domiznu. Naše zhromadne žiwjenje złožuje so na mjezsobnu akceptancu a demokratiske, ciwilizowane mjezsobne wobchadźenje.“ Tak rěka w deklaraciji, kotruž je Budyski wokrjesny sejmik na swojim posedźenju minjenu póndźelu z dwěmaj hłosawzdaćomaj a třomi napřećiwnymi hłosami schwalił. Budyska deklaracija měri so na wokrjesnych radźićelow samych kaž tež na ludnosć we wokrjesu. Wobydlerjo, politikarjo a zarjadnistwo maja so zhromadnje wotewrjenje spřećiwjeć prawicarskemu ekstremizmej, ekstremizmej docyła, njepřećelskosći cuzym napřećo, rasizmej a antisemitizmej. Dwě sadźe we wotrězku „Žana namóc – přećiwo ekstremistiskim a nacionalsocialistiskm myslam“ poćahujetej so na naš lud: „... Pokazuje so runje tak w přesahach na přisłušnikow serbskeho ludu, w skřiwdźenju a wohroženju serbskich sobučłowjekow kaž tež w hanjenju serbskeje kultury ...“
Krótkopowěsće (28.03.18)
Přećiwo politiskemu bojkotej
Berlin. Prěnje rozmyslowanja nastupajo politiski bojkot koparskich swětowych mišterstwow w lěću w Ruskej Němska wotpokazuje. Nastali su mysle bojkota w zwisku z wuwićom po atentaće z čuwowym jědom w jendźelskim Salisburyju. Předsyda wonkowneho wuběrka zwjazkoweho sejma Norbert Röttgen (CDU) rjekny magacinej Spiegel, zo je přećiwo tajkemu postupowanju.
Dźeń tuńšo po puću być
Budyšin. Na lětušim akciskim dnju zaměroweho wobchadneho zwjazka Hornja Łužica-Delnja Šleska 6. apryla budźe móžno, z tudyšimi wobchadnymi předewzaćemi turistiske cile wopytać. Mjez nimi su města Budyšin, Zhorjelc a Žitawa, Mužakowska lěsna železnica, Oybin a kulturna kupa Einsiedel. Z potuńšenej jězdźenku 3,50 eurow budu ćah, bus a tramwajka cyły dźeń wužiwajomne.
Myto Astrid Lindgren spožčene
Policija (27.03.18)
Stare čisła njepłaćiwe
Krynhelecy. Hižo wot 1. měrca 2018 su čorne zawěsćenske čisła za mopedy z minjeneho lěta njepłaćiwe. Nowe čisła za lětsa su módre. Dokelž pak bě wodźer mopeda zawčerawšim dopołdnja w Krynhelecach w Hamorskej gmejnje hišće ze starym čisłom po puću, zadźerža jeho wobsadka policajskeho awta. 32lětny změje so nětko přeńdźenja přećiwo zakonjej wo winowatostnym zawěsćenju zamołwić. Dołhož za jeho moped žane płaćiwe zawěsćenje njewobsteji, dyrbi jón stejo wostajić.
Wuměnkarjo wustajeja na hrodźe
„Stabat mater“ zaklinči
Wšitcy debjerjo jejkow ze wsy
Brězowka (JoS/SN). 23. Brězowske wiki jutrownych jejkow su minjenu njedźelu mnohich lubowarjow filigraneho serbskeho ludoweho wuměłstwa přiwabili. Wosebitosć wikow je, zo su wšitcy debjerjo jejkow ze wsy a zo so wšitke žony a holcy narodnu drastu woblěkaja. Hinak hač druhdźe steji tu dorost w srjedźišću. Wo hudźbne wobrubjenje starachu so tónraz holcy a hólcy wjesneje pěstowarnje „Baćonjace hnězdo“, Serbski dźěćacy a młodźinski ansambl kaž tež Slepjanski folklorny ansambl.
Dohromady 20 małych a wulkich debjerjow jejkow demonstrowaše wšitke jednotliwe techniki pisanjenja. Wosebje so wopytowarjo dźiwachu, kak wušiknje hižo dźěći wóskuja, bosěruja a dalše techniki nałožuja. To někotrehožkuli pohonjowaše, sej debjene jejka k wupyšenju swójskeho bydlenja kupić a při tej składnosći debjerjow w serbskej narodnej drasće fotografować.
Na nowym městnje so zetkali
Wulka Dubrawa (CS/SN). Prěni raz we wjacezaměrowej rumnosći šulskeho centruma je so Wulkodubrawska gmejnska rada na swojim zašłym posedźenju zetkała. Hač so posedźenja parlamenta přichodnje stajnje tam wotměja, na to so najprjedy raz dojednać njemóžachu. Přetož tež dotalna městnosć posedźenjow we Wulkodubrawskej wohnjowobornej gratowni ma swoje lěpšiny, byrnjež ju za zetkanja radźićelow ekstra tepić dyrbjeli. We wjacezaměrowej rumnosći šule pak je na kóždy pad wjace městna za wopytowarjow. Tak bě na přikład zašły raz rumnosć w gratowni přepjelnjena, dokelž chcyše so šulska rjadownja wo dźěłach na šulskim dworje wobhonić.
