Wubědźowanje zahajene
Miłoćicy (SN). Křesćansko-socialny kubłanski skutk (CSB) je minjeny štwórtk na Załomskej Gerharda Hauptmannowej wyšej šuli molowanske a rysowanske wubědźowanje zahajił. CSB přewjedźe je składnostnje lětušeho, 17. junija w klóštrje Marijinej hwězdźe wotměwaceho so swjedźenja w Pančicach-Kukowje. Dźěći a młodostni w starobje hač do 14 lět su namołwjeni, wobrazy, rysowanki, kolaže a dalše wuměłske dźěła na temu „Tu sym doma“ zapodać. Njech činja to z podaćom mjena, adresy a staroby pola CSB w Miłoćicach. Posledni termin zapodaća je 25. meja.
Nowa sezona při jězoru
Bjerwałd (SN). Nětko je tež wodosportowa sezona při najwjetšim jězoru Sakskeje zahajena. Wšitke planowane saněrowanske dźěła wokoło přibrjoha su zakónčene. Jenož mosćikowa płuwaca připrawa w Delnim Wujězdźe njehodźi so hišće wužiwać. W informaciskim centrumje Bjerwałdskeho jězora je nětko Regina Nickol nowa přistajena.
Keramiske dźěła widźeć
Žane problemy z konserwami kreje
Kamjenc (SN/mwe). „W Kamjenskej chorowni maltezow swj. Jana je přeco dosć konserwow kreje. Hojernju naš kooperaciski partner, krejdarjenska słužba Němskeho čerwjeneho křiža (DRK) sewjer-wuchod, přewšo derje zastaruje“, piše Ines Eifler z běrowa za zjawnoste dźěło chorownje Serbskim Nowinam. „Njeje so hišće ženje stało, zo bě pola nas žiwjenje pacienta pobrachowaceje kreje dla wohrožene.“ Hdys a hdys pak móže k problemej rezerwy krejneje skupiny 0 rhesus negatiw (0/d) dóńć. „To je jara rědka skupina kreje, kotruž jenož něhdźe šěsć procentow ludźi tež w Hornjej Łužicy ma“, Ines Eifler podšmórny.
Policija (16.04.18)
Muža pytali a namakali
Budyšin. 87lětny muž je so sobotu po připołdnju z Budyskeje starownje na Słonoboršćanskim puću zhubił. Po wobjedźe běchu tam zwěsćili, zo muž hižo w swojej stwě a tež nihdźe druhdźe w domje njebě. Kaž stajnje w tajkich padach započachu wjacore wobsadki policajskich awtow za rentnarjom pytać. Jich podpěrowaštej wosebje wukubłany psyk Zhorjelskeje policajskeje direkcije a policajski helikopter z Lipska. Ale zasadźenje štyrinohaća kaž tež „wóčko z powětra“ njewjedźeštej k tomu, staršeho muža namakać. Hakle na pózdnim wječoru móžachu zasadźeni zastojnicy kaž tež sobudźěłaćerjo w starowni wodychnyć. Wobsadka policajskeho jězdźidła wuhlada 87lětneho w Budyskej Strowotnej studni a móžeše jeho stroweho w hladarni wotedać.
Wočakuja widźomne skutki
Gmejna jeno zdźěla na loni přizjewjene njedostatki reagowała
Koslow/Njeswačidło (JK/SN). Znowa běchu Koslowčenjo na posedźenje Njeswačanskeje gmejnskeje rady přišli, zo bychu hišće raz na hižo dlěši čas znate njedostatki we wsy skedźbnili. Zdobom wočakowachu stejišćo wjesnjanosty kaž tež radźićelow k stawej wobdźěłanja hižo loni naspomnjenych problemow.
Rjany nalětni swjedźeń w parku
Prěni króć wotmě so wčera we Wochožanskim parku błudźenkow němsko-pólski nalětni swjedźeń. Mnozy běchu sej při rjanym słónčnym wjedrje z kolesom na swójbne zarjadowanje dojěli.
Wochozy (FAG/SN). „Što so pola našich susodow stawa?“ Tute prašenje steješe w srjedźišću prěnjeho dnja susodow, na kotrymž so wuměłcy, zahrodnikarjo, hosćencarjo a wuhotowarjo parkow z Němskeje a Pólskeje wčera wot 11 do 17 hodź. we Wochožanskim parku błudźenkow zetkachu. Předsyda towarstwa daloko znateho a přewšo woblubowaneho areala Ulrich Klinkert a Klaus Tschöke z jednaćelstwa ze swojimi sobudźěłaćerjemi k startej do nalěća přeprosyštaj. Přistajeni parka błudźenkow kaž tež klóšterskeje zahrody z Pančic-Kukowa sta hosćom tež z Pólskeje wo swojim skutkowanju rozprawjachu. We wopytowarskim centrumje parki a zahrody mjezynarodneje „zahrodoweje kulturneje šćežki wobeju stron Nysy“ předstajichu. Rady stej zahrodnikarce Simone Dietrich a Anita Schwitalla hosći po pućikach cyłkownje 20 hektarow wulkeho parka wodźiłoj.
Krótkopowěsće (16.04.18)
Dešno a Drjowk dobyćerjej
Lubin. Wjesny dźěl Dešno gmejny Dešno-Strjažow a město Drjowk stej dobyćerjej třećeho wubědźowanja „Rěči přichilena komuna – serbska rěč je žiwa“ w Braniborskej. Wiceprezident Krajneho sejma Braniborskeje Dieter Dombrowski (CDU) je jimaj myće na wuznamjenjenskim zarjadowanju pjatk w Lubinje přepodał. 17 městow a gmejnow a jedyn zarjad běštej so požadałoj.
„Zmij“ wospjet mytowany
Lipsk. Wojerowska filmowča Angela Schuster a kamerownik Martin Rattke buštaj wčera na wubědźowanju krótkofilma „Kurzsuechtig“ w Lipsku we wobłuku fikcija z dorostowym mytom wuznamjenaj. Wonaj běstaj so ze swojej twórbu „Zmij“ na wurisanju wobdźěliłoj. Film předstajeja mjez druhim přichodny štwórtk w Budyšinje.
Bretonojo su znowa hosćo
Policija (13.04.18)
Ćežka zražka na křižowanišću
Budyšin. Na křižowanišću Budyskeje Lubijskeje dróhi a Thomasa Münzeroweje (B 156), je wčera wječor Opel Corsa nimale frontalnje do Citroëna zrazył. Jako prěni pomocnicy k městnu njezboža přijědźechu, nańdźechu w awtowymaj wrakomaj štyrjoch zranjenych. Wjacore wuchowanske wozy z nuzowym lěkarjom, nimo policije a wohnjowych wobornikow, so wo znjezboženych starachu. Wodźerka Opela so ćežko zrani, tamnych třoch mjenje zranjenych dyrbjachu tohorunja do chorownje dowjezć. Přičiny njezboža policija přepytuje.
Bjez „papjerow“ po puću był
Chrósćicy. Patrulja Kamjenskeho policajskeho rewěra je srjedu nawječor w Chrósćicach na Cyrkwinskej horje 64lětneho wodźerja Renaulta lepiła, kiž njeměješe žanu jězbnu dowolnosć při sebi. To wón tež njemóžeše, dokelž scyła žane „papjery“ nima. Te běchu „čornojězdźerjej“ hižo před měsacami wzali.
Žana panika drapy dla
Budyšin (SN/mwe). Drapa (Krätze) njeje chorosć, kotruž maš přizjewić. Najebać to su wo njej minjene tydźenje w medijach a druhdźe wospjet rozprawjeli – ze starownjow, dźěsćownjow, pěstowarnjow, ale tež z domow požadarjow azyla. Kaž Budyski krajnoradny zarjad na naprašowanje našeho wječornika informuje, pak móžeš pady minjeneju lět „na jednej ruce wotličić. W pola nas znatych padach móžachu drapu spěšnje zamjezować. Poprawom su to jenož hygieniske naprawy, kotrež měli přewjesć. Tak kolegojo strowotniskeho zarjada hladanski personal wšelakich zarjadnišćow mjez druhim powučuja. Zdobom hygienowe plany kontroluja a medikamenty wudźěleja. Zawrěće cyłeho zarjadnišća abo někotrych wotdźělow nam dotal žane znate njeje“, Gernot Schweitzer z nowinskeho běrowa wokrjesa rozprawja.
Dobre nazhonjenja
Prěnje myto do Hodźija
Zhubi wjes wažnu městnosć?
Worklecy (aha/SN). Nowaj wobsedźerjej hosćenca „Ke kupowemu hatej“ we Worklecach, bratraj Henry a Marcus Szczepaniak, běštaj so prócowałoj jón gastronomisce dale wobhospodarjeć. Dokelž pak njenańdźeštaj za to žanoho zajimca, staj so rozsudźiłoj horni poschod ze žurlu na dwě štyristwowej bydleni přetwarić.
