Přinoški zwyšene
Nowe postajenja za žłobik, pěstowarnju a hort
Pančicy-Kukow (SN/mwe). Z dwěmaj napřećiwnymaj hłosomaj je gmejnska rada Pančicy-Kukow na swojim wčerawšim posedźenju w Lejnje zwyšenje staršiskich přinoškow za žłobik a pěstowarnju we Wotrowje a Pančicach-Kukowje kaž tež za hort Šule Ćišinskeho wobzamknyła. Hižo w lěće 2013 běchu so tamniši radźićeljo k tutym zwyšenjam na zakładźe za gmejnu płaćiwych postajenjow Sakskeje zawjazali.
Wot 1. oktobra změja starši za swoje prěnje dźěćo w žłobiku na dźewjeć hodźin hladanskeho časa měsačnje 183,51 eurow płaćić, dotal 160 eurow. Tohorunja za prěnje dźěćo a dźewjeć hodźin hladanskeho časa płaći přebytk we Wotrowskej a Pančičanskej pěstowarni město dotal 90,95 wot oktobra měsačnje 110,48 eurow. Za hort su přinošk na 64,63 eurow zběhnyli, dotal płaćeše wšědnje šěsćhodźinski přebytk prěnjeho dźěsća w horće na měsac 53,21 eurow.
W Budyskim rewěrje awtodróhoweje policije zakónčichu dźensa ...
Młodostni w Radworju stanowali
Krótkopowěsće (30.07.15)
Bjezdźěłnosć snadnje wjetša
Nürnberg. Lětnjeje přestawki w mnohich zawodach a mnohich šulskich wotchadnikow dla je so ličba bjezdźěłnych w Němskej w juliju wo 61 000 na nětko 2,773 milionow powjetšiła. To je přiwšěm 99 000 mjenje hač loni w juliju, kaž Zwjazkowa agentura za dźěło dźensa zdźěli. Kwota bjezdźěłnosće rozrosće wo 0,1 dypk na 6,3 procenty.
Łódź njemóže dale jěć
Drježdźany. Dale trajacy niski staw wody Łobja je dowolowu łódź „Clara Schumann“ w Mišnje zadźeržał. Łódź chcyše poprawom do čěskeho Mělníka jěć, kaž jeje kapitan zdźěli. Z Mišna pak dyrbjachu pasažěrojo z busami zaso domoj jěć. Łódź trjeba znajmjeńša 1,60 metrow wody pod sobu. Mišnjanski pegel pokazowaše dźensa rano runje 1,16 metrow.
Indianski hosćenc w Čěskej
Praha. Zastupnicy indianskeho splaha seminolow, pochadźacy z Floridy w USA, su tež w čěskej stolicy aktiwni. Hižo štyri lěta wobsteji w centrumje Prahi wot indianskich předewzaćelow nawjedowany hosćenc Hard Rock Cafe. Nětko chcył mějićel James Billie tam tež hišće hotel wotewrěć. Seminolojo su wot lěta 1979 w Čěskej jako hosćencarjo aktiwni.
Kofejownja woblubowana
Mały Wjelkow (SN). Wotsrjedź julija wotwěra Małowjelkowska sotrownja kóždu njedźelu wot 14 hodź. tak mjenowanu lětnju kofejownju. Nimo słódneje swačiny z kofejom a tykancom poskićeja tam hosćom tež hudźbne delikatesy. Tuž je lětnja kofejownja jara woblubowana. Přichodnu njedźelu přeproša wobhospodarjer sotrownje Mike Salomon wopytowarjow na „hudźbu na štyrjoch kolesach“ – na powětroćišćowy orchester.
Party z DJjom Romanom
Jitro (SN). Romano Meinert je dobyćer wubědźowanja Sputnik DJ-Battle 2015. Jeho móža lubowarjo elektroniskich zynkow jutře, pjatk, wot 22 hodź. w Jitru pola Wóslinka dožiwić. Tam organizuje mjez druhim wjesna młodźina party.
K łukam kolesować
Policija (30.07.15)
Załom. Patrulja Habrachčanskeje (Ebersbach) policajskeje inspekcije je wčera popołdnju w Załomju transporter typa VW kontrolowała. Z nim po puću bě 49lětny němski staćan. Jako zastojnicy awto přepytachu, namakachu tak mjenowany butterflyjowy nóž, kotryž měješe šofer při sebi. Mjenowany nóž słuša k zakazanym brónjam. Tajki sej kupić a wobsedźeć njeje tuž dowolene. Dokelž muž wobkrući, zo nóž jemu słuša, dyrbi wón nětko z wotpowědnym chłostanjom ličić.
Loni we Wojerecach nichtó njezboža dla njezemrěł
Wojerecy (SN/mwe). W měsće Wojerecach a na wsach je policija loni 933 njezbožow registrowała. Cyłkowna wěcna škoda wučinješe dohromady 1,6 milionow eurow. Na parkowanišćach dóńdźe k 423 njezbožam z něhdźe 530 000 eurami škody. 68 njezbožow sta so dźiwiny dla, 53 z nich mjez 22 a 6 hodź. ze škodu 86 000 eurow. 751 wobchadnych njezbožow zličichu wot 6 do 18 hodź., přewažnje póndźelu, wutoru a pjatk. K najmjenje njezbožam dóńdźe njedźelu. Smjertne pady wobchadneho njezboža dla loni we Wojerecach žane njeběchu. Přiwšěm so 36 wosobow ćežko zrani, 69 lochko, mjez nimi 32 wodźerjow awta a 48 kolesowarjow. Mjez zranjenymi bě dźesać dźěći do štyrnaće lět. 214 zawinowarjow njezboža ćekny, 82 z nich je policija lepiła. Ekstremne njezbožowe ćežišća loni zwěsćili njejsu. Wot pjeć podobnych njezbožow so hakle scyła wo tajkich ćežišćach rěči.
W septembru 1813 Napoleon w farskim domje přenocował
Nimo cyrkwjow su tež farske domy něme swědki stawiznow. Ze swojej lětnjej seriju so po serbskich a dwurěčnych katolskich a ewangelskich wosadach rozhladujemy a předstajamy někotre fary – dźensa Bukečansku.
Někotryžkuli šofer móhł runje tak zadwělować kaž wobydlerjo ...
Krótkopowěsće (29.07.15)
Kozel měł mandat přewzać
Budyšin. Krajne dźěłowe zjednoćenstwo Serbska lěwica Hajkej Kozelej poruča, móžny mandat Sakskeho krajneho sejma jako naslědnik přiwzać. Na wčerawšim wuradźowanju Serbskeje lěwicy w Budyšinje přesahowachu podpěrace aspekty porno haćacym. Naslědny mandat budźe móžny, wuzwola-li zapósłanču Annekathrin Klepsch za kulturnu měšćanostku Drježdźan a złoži-li wona na to swój mandat w krajnym sejmje.
Přichod brunicy njewěsty
Praha. Čěski industrijowy minister Jan Mládek je na wopyće sewjeročěskeju městow Litvínov a Horní Jiřetín zdźělił, zo rozsud wo dalewjedźenju tamnišeje brunicoweje jamy wo pjeć lět wotstorči. Při tej składnosći wón zdobom dwělowaše, hač budźe brunica potom hišće w samsnej měrje trěbna kaž dźensa.
Dorost pobrachuje
