Skok kwality chwalili
Krótkopowěsće (25.10.16)
Nowy album Caroliny Eyckec
New York. „Fantasias for Theremin and String Quartet“ rěka nowy album Caroliny Eyckec, kotryž je minjeny tydźeń jako winylowa tačel pola ameriskeho labela Butterscotch Records wušoł. Na nim je słyšeć šěsć kruchow, kotraž je tereministka zhromadnje z American Contemporary Music Ensemble z New Yorka natočiła.
Dan ma čěskej stolicy pomhać
Praha. Wokolina awtoweje magistrale w centrumje čěskeje stolicy, kotraž Václavske naměsto chětro nječućiwje wot Narodneho muzeja dźěli, je dotal jenož šoferam awtow přiměrjena. Tole pak ma so změnić. Wo to prosy Praski magistrat sławneho danskeho urbanista Jana Gehla, specialista za zjawne přestrjenje a žiwjenje na nich. Wón ma nadawk, centrum Prahi přijomniši sčinić.
Tilich wopory wopominał
Krótkopowěsće (24.10.16)
Woidke: Dźiw normality
Wrócław. Braniborski ministerski prezident Dietmar Woidke (SPD) ma němsko-pólske poćahi za dźiw normality. „Poměr mjez krajomaj je tak přećelski a dowěrliwy kaž nihdy do toho.“ Tole rjekny koordinator zwjazkoweho knježerstwa w narěči składnostnje 25. róčnicy němsko-pólskeho zrěčenja wo dobrym susodstwje dźensa we Wrócławju.
Měrowe myto přijała
Frankfurt n.M. Žurnalistka a publicistka Carolin Emcke je wčera w Frankfurće nad Mohanom Měrowe myto zwjazka němskich knižnych wikowarjow přijała. Wuznamjenjenje je 25 000 eurow hódne. Awtorku počesćichu za jeje přinošk k towaršnostnemu dialogej. Emcke bu hižo loni z Lessingowym mytom Sakskeje počesćena.
Wuwozny móst zaso dźěła
Wochozy. Po 13 tydźenje trajacym ponowjenju wuwozny móst F 60 wot minjeneho pjatka we Wochožanskej wuhlowej jamje zaso dźěła. Při ponowjenju hoberskeho nastroja su 550 tonow wocla zatwarili, zo bychu jón z wosebitej konstrukciju stabilizowali, kaž zamołwići energijoweho předewzaća LEAG zdźěleja. Ponowjenje bě trěbne, dokelž je wuwozny móst mjeztym starši hač 40 lět.
Serbski krosnowar nakupowansku nóc wobohaćił
Kulow (HH/SN). Z atraktiwnymi idejemi je něhdźe 20 wikowarjow, towarstwow a priwatnikow minjeny pjatk mjeztym hižo dźewjatu Kulowsku nakupowansku nóc wobohaćiło. Prěni raz je so Kulowske towarstwo wudźerjow na nakupowanskej nocy wobdźěliło a wulki akwarij z domjacymi rybami nastajiło. Nimo toho běchu čłonojo towarstwa před zawěsćernju swojeho předsydy Gerolda Kochty mobilnu sušernju rybow natwarili. Jeje wudźěłki mnozy na městnje woptachu. Hnydom w susodstwje je towarstwo Zelena garda swoju wosebitu cocktailowu baru nastajiło. Towarstwo swjećeše runje pjatk swoje dźesaćlětne wobstaće. Dalše młodźinske towarstwo je před jednym z Kulowskich wobchodow lěhwowy woheń zamiškriło, tež Sulšečanski krosnowar Achim Mič ze swojimi akordeonowymi zynkami k poradźenju nakupowanskeje nocy přinošowaše.
Naměsto nětko kaž nowe
Policija (24.10.16)
Parkowanje wjele pjenjez płaćiło
Wojerecy. Tójšto škody načini sobotu připołdnju 80lětna wodźerka Hyundaija, jako chcyše na Wojerowskej Stormowej parkowanišćo wopušćić. Dokelž po wšěm zdaću přejara na płun stłóči, zajědźe jeje awto přez łuku a zasta hakle při sćěnje bydlenskeho domu, hdźež prasny do balkona. Škoda na jězdźidle, na sćěnje kaž tež na balkonje wučinja něhdźe 10 000 eurow. Šoferka so na zbožo njezrani.
Sankowanišćo za zymu přihotowali
Na wjacorych městnach su so wobydlerjo sobotu k dźěłowym zasadźenjam zetkali. Tež w Brětni so wjele pilnych rukow gratu přimaše, zo bychu młodźinski klub a sankowanišćo za zymu přihotowali.
Brětnja (AK/SN). Tójšto njerjada a wotpadkow zezběrachu Tom Pyritz, Chris Rietscher, Thomas Petschick, Felix Franke a dalši młodostni sobotu wokoło swojeho młodźinskeho kluba. Woni sćěhowachu namołwu Brětnjanskeje wjesneje rady k nazymskemu dźěłowemu zasadźenju a přihotowachu teren wokoło swojeho kluba za zymski čas. Pozdźišo pomhachu tež na sankowanišću.
Zašo hač předwidźane su w nocy na njedźelu party w Budyskim ...
Hejsować w „Jednoće“
Chrósćicy. Na hejsowanje do Chróšćanskeje wjacezaměroweje hale „Jednota“ přeprošuje tamniši młodźinski klub pjatk a sobotu, 28. a 29. oktobra, młodostnych a wšěch tych, kotřiž so młodźi čuja abo su młodźi wostali. Pjatk budźe tam hołk a tołk za nad 30lětnych. Přeprosyli su sej k tomu jednu z najlěpšich partyjowych kapałow Sakskeje, a to skupinu Jolly Jumper z Hornjeje Łužicy, kotraž ma tež serbsku štučku w programje. Zastup za sydom eurow je wot 20 hodź., reje so w 21 hodź. započnu. Sobotu pak w „Jednoće“ mócnje šeri, dokelž wotměje so w Chrósćicach hižo tradicionala helloweenowa party. Wo dobru naladu staraja so wot 21 hodź. wjacori DJjojo. Zastup płaći kaž pjatk sydom eurow. Čłonojo młodźinskeho kluba so na hosći wjesela a so nadźijeja, zo młódši a starši hejsowarjo z bohatym wopytom jich prócu mytuja.
Předpředań za schadźowanku
Zwjazk seniorow wokrjesa z nowej předsydku
Dźěłowu rozprawu za minjenu wólbnu periodu 2013, 2014 a 2015 poda njedawno na wólbnej zhromadźiznje Njewotwisneho senioroweho zwjazka Budyskeho wokrjesa před 18 delegatami předsyda Ernst Brunner posledni raz. 83lětny chce po dźesać lětach čestnohamtsku funkciju złožić. Koncentrować chce so jenož hišće na 60 čłonow sylnu Njeswačansku skupinu, kotraž so tydźensce zetkawa. Byrnjež móžeše w rozprawje wjele pozitiwneho mjenować, je tola zludany, zo so falowacych pjenjez dla njeje móhło na twarjenju na Budyskej Löhrowej, hdźež ma seniorowy zwjazk swój domicil, nastupajo saněrowanja wjace zwoprawdźić. Annett Kluge poda wobšěrnu financnu rozprawu. W slědowacej diskusiji wuzběhny so wažnosć dźěła předsydstwa a přistajenych za seniorow a nuzne wabjenje nowych čłonow, dokelž je ličba zemrětych wulka. Jara pozitiwnje wuzběhny so tež hižo dwaceći lět trajacy kontakt do čěskeho Jabloneca k tamnišej skupinje seniorow.
