Šoferojo z Prěčec do směra Budyšina a nawopak móža zaso bjez ...
Krótkopowěsće (11.04.18)
Za wjace serbskosće w cyrkwi
Podstupim. Rada za serbske naležnosće Braniborskeje je so wčera w Podstupimskim krajnym sejmje schadźowała. Mjez hosćimi bě dr. Hartmut Leipner, předsyda Spěchowanskeho towarstwa za serbsku rěč w cyrkwi, kaž předsyda rady Torsten Mak SN zdźěli. Leipner sej přeješe, zo by so serbskosć w cyrkwjach sylnišo jewiła.
Skruća financnu móc komunow
Drježdźany. Wokrjesam přisłušne komuny maja za lěta 2018 do 2020 stajnje 70 eurow za prěnje tysac wobydlerjow dóstać, maksimalnje 70 000 eurow. To předwidźi naćisk zakonja wo přizwolenju pawšalnych připokazankow k skrućenju wjesneho ruma, kotryž je sakski kabinet wčera schwalił. Hač do lěta 2020 podpěruja financnu móc sakskich komunow dohromady z 90 milionami eurow.
Romojo so sami ličili
Z jejkakulenjom nalěćo witali
Nowe Město (JoS/SN). Na nalěćo dyrbjachu tež wobydlerjo Noweho Města dołho čakać. Njedźelu po jutrach zetkachu so woni k prěnjemu zhromadnemu zarjadowanju pod hołym njebjom. Domizniske towarstwo je na swjedźenišću při Sprjewi jejkakulenje za dźěći přihotowało, štož tam kóžde lěto młode jutry činja. Najwjetši dźěl jejkow běchu dźěći wot doma sobu přinjesli, domizniske towarstwo měješe dalše přihotowane. Inge Biederowa a Beatrix Krawcowa w narodnej drasće kedźbowaštej, zo so stajnje jenož jedne jejko po skłoninje kuleše. Tež starši, dźědojo a wowki mějachu při tym swoje wjeselo.
Jako družki prěni raz k wołtarjej
Policija (10.04.18)
Awće so paliłoj
Biskopicy. Wohnjowa wobora dyrbješe dźensa w nocy w Biskopicach hnydom dwójce woheń hašeć. Krótko po jednej wołachu wobornikow na Cyrkwinsku hasu, hdźež steješe Renault cyle blisko domskeho w płomjenjach. Hodźinje pozdźišo Biskopičanskich kameradow znowa alarmowachu. Jenož něšto stow metrow wot prěnjeho městna zasadźenja zdaleny paleše so tam wotstajeny Opel. We woběmaj padomaj běchu wobydlerjo woheń pytnyli a woboru wołali. Policija trochuje cyłkownu škodu na 30 000 eurow. Zastojnicy nětko móžneho zamiškrjenja wohenja dla přepytuja.
Fachowy dźeń w dźiwadle
Budyšin. Fachowy dźeń „Lubosć k blišemu – policija – towaršnosć“ wotměje so jutře, srjedu, wot 9 do 16 hodź. w Budyskim Němsko-Serbskim ludowym dźiwadle. Na nje přeprošuje dźěłowe zjednoćenstwo Cyrkej za demokratiju a čłowjeske prawa. Zarjadowanje wotměje so w kooperaciji z mnohimi cyrkwinskimi a towaršnostnymi zarjadnišćemi, mjez druhim ze Smochčanskim Domom biskopa Bena a ze zwjazkom Carity. Dalše informacije nadeńdu zajimcy internetnje pod www.kirche-fuer-demokratie.de. We hłownym přednošku póńdźe wo prašenje, kotre wužadanja ma policija zmištrować w městach, hdźež rozdźělne narodnosće bydla.
Zetkaja so w stolicy
Berlin. Přichodne Serbske blido w Berlinje budźe štwórtk, 12. apryla, w 16 hodź. w hosćencu EINSTEIN KAFFEE na Friedrichowej 206. Štóž ma lóšt a chwile, so na měsačnych zetkanjach wobdźěleć, zo by maćeršćinu w cuzbje hajił, je stajnje lubje witany. Za Serbskim blidom w Berlinje maja zajimcy dobru składnosć, swoje rěčne kmanosće nałožować a skrućeć.
Zběraja za swjedźeń
Mocy skutkownišo wjazać
Gmejna Hamor spěchuje hospodarstwo Łužicy
Hamor (AK/SN). Gmejna Hamor chce so z čłonom hospodarskeje iniciatiwy Łužica stać. To podšmórny wjesnjanosta Achim Junker (CDU) wčera na wuradźowanju gmejnskeje rady. Tak chcedźa regionalne mocy při strukturnej změnje we Łužicy skutkownišo wjazać. „Zaměr je, zajimy komuny na kraje a branše přesahowacej akciskej platformje zastupować a projekty k spěchowanju hospodarstwa podpěrać“, wón rozłoži. Hamor so hižo angažuje a wuwiwa Bjerwałdski jězor we łužiskej jězorinje. Nimo toho chce zdobom stare stejnišća brunicoweje industrije wožiwić. Wotpowědna projektna skica za to předleži. Ju je gmejna hižo we wobłuku regionalneho wuwićoweho koncepta zapodała.
Wobydlerjo čuja so kaž zajeći
Kołowokoło Wochoz skedźbnjeja taflički na to, zo je přistup do lěsa zakazany. Njedawno nastajachu tam tójšto dalšich tajkich tafličkow. Wobydlerjow to chětro hněwa.
Wochozy (CK/SN). 85 eurow plus kóšty za wobdźěłanje. Telko by płaćiło, bychu-li někoho na wojerskim zwučowanišću Hornja Łužica podłu zwjazkoweje dróhi B 156 pola Wochoz lepili. Kołowokoło wsy taflički zakazuja do lěsa stupić, dokelž jedna so wo wojerski wěstotny wobłuk. Nimo někotrych eksistowacych tafličkow su nětko tójšto dalšich nastajeli. „Wochozy maja jedyn přijězd a wujězd, wjace nic“, praji wjesny předstejićer Mario Weier. Wochoženjo čuja so zajeći a wobhladuja to jako wobmjezowanje swojeje žiwjenskeje kwality. Jim bu jedna móžnosć wočerstwjenja rubjena. To ludźi jara hněwa, wšako su wot lěta 1994 nimale 3 000 hektarow rekultiwowaneje płoniny zalěsnili. Zo bychu naležnosć rozrisali, bě wjesna rada njedawno zastupjerjow Zwjazkoweje wobory, lěsnistwa a koncerna LEAG přeprosyła.
Tydźeń do skónčenja wosebiteje wustajeńcy „Krabat – Muž – ...
Nimale wšitko zwoprawdźene
Wojerecy (SN/JaW). Dwurěčnosć na internetnych stronach města Wojerec je mjeztym jasnje spóznajomna. Nimale štwórć lěta po tym zo bě tamniša zamołwita za serbske naležnosće Gabriela Linakowa připowědźiła, podźěl serbskosće widźomnje powjetšić, je město nad Čornym Halštrowom plany zdźěla hižo zwoprawdźiło. To je wospjetne přepytowanje našeho wječornika wunjesło.
Hnydom na startowej stronje su wjacore nadpisma dwurěčne. Dale su wšitke dalše nad- a mjezynadpisma dalšich wobłukow webstrony, na kotrež móža wužiwarjo kliknyć, kaž na přikład „Radnica“, „Hospodarstwo“ abo „Měšćanske žiwjenje“, dwurěčnje zapołožene. Tež witanje wyšeho měšćanosty Stefana Skory (CDU) móža zajimcy serbsce čitać.
Wjacore teksty, kotrež wěnuja so serbskim temam, su tohorunja hižo w našej maćeršćinje přistupne. Tu pak ma město hišće tójšto dźěła nałožić, chce-li swoje připrajenje – wšitke nastawki ze serbskej tematiku tež w serbskej rěči spřistupnić – dodźeržeć. Tež na přidatnych stronach k 750. róčnicy wobstaća Wojerec ze serbskosću hišće chětro klaca.
