Policija (08.10.18)
Z motorskim znjezbožił
Róžant. Zły wukónc měješe sobotu popołdnju probowa jězba 47lětneho muža z motorskim w Róžeńće. Po swójskich wuprajenjach so při jězbje nadobo zadnje koleso mašiny wotsuny. Na to zhubi wodźer kontrolu nad wodźidłom a zajědźe přez płót priwatneje ležownosće. Při wobdźěłanju njezboža pak so wukopa, zo měješe wón 1,64 promilow alkohola w kreji. Nimo toho motorske zawěsćene njebě. Zranjenjow dla dowjezechu muža do chorownje.
Połdra tony rybow wućahnyli
Sta wopytowarjow so za karpy, oldtimery, kisykał a smjetanu zajimowali
Bóšicy (aha/SN). Lětsa je tomu 20 lět, zo je Stanij Ryćer kupanski hat kupił, kotryž běštaj za čas NDR Bóščanska gmejna a Wětrowska šamotownja twariłoj. Wot toho časa wón tam ryby plahuje. Wčera je hibićiwy Jasčan šěsnaty raz na zjawne wułójenje rybow z hata přeprosył.
Hižo dopołdnja witachu tam sta ludźi, jako Bóščanscy dujerjo k zazběhej zahudźichu. Rybarjo na to syć wupołožichu a předstajichu zajimcam, kak z małym kranom stajnje 75 kilogramow rybow ze syće do bazenka pušća. Wopytowarjo móžachu so wo dobrym słodźe karpow na městnje přeswědčić. Za to běštaj Mike Mißbach a Jan Ryćer do toho něhdźe sto karpow zarězałoj. Najćeši wažeše šěsć kilogramow. Tež wšelake dźiwinowe jědźe, pražene kołbaski a steaki sy sej k wobjedu we wulkim stanje popřeć móhł.
Z dźěłom zarjadnistwa njespokojom
Hižo dlěši čas Ćišćanska wjesna rada spyta hrajkanišćo na tamnišej nawsy ponowić. Dotal so to poradźiło njeje, čehoždla we wsy njespokojnosć wobydlerjow přiběra.
Wojerecy (AK/SN). Swoje starosće rozłoži Ćišćanski wjesny předstejićer Jens Zahrodnik na zašłym posedźenju Wojerowskeje měšćanskeje rady. „Wjesna rada je nastupajo zhromadne dźěło z městom přewšo njespokojom“, wón rjekny. Hižo dołho wojuja čłonojo rady wo nowy nastroj za hrajkanišćo. Te dźeń a bóle rozpaduje. W zašłosći su hižo wjacore dźěle wotstronili. „Lisćina njedostatkow je při přepruwowanju lěto wob lěto wjetša. Jeno dźakowano reparaturam měšćanskeho twarskeho zawoda tu hrajkanišćo scyła hišće je“, Jens Zahrodnik rozłoži.
Duwo Canapé Cowboys je wčera na Budyskim Hłownym torhošću ...
Tójšto kreatiwneho dožiwili
Wo narodnej identiće rěčeli
Interkulturny tydźeń we Wojerecach so z mjeńšinami zaběrał
Wojerecy (AK/SN). Wuznaće k maćernej rěči a k swójskej identiće žada sej zmužitosć, kuražu a wutrajnosć. To je facit diskusijneho wječorka, kotryž wotmě so minjeny štwórtk we wobydlerskim centrumje na Piwarskej hasy we Wojerecach. Zhromadnje ze Serbskim institutom w Budyšinje a Choćebuzu a z Choćebuskej wotnožku rěčneho centruma WITAJ bě Kulturna fabrika na zarjadowanje pod hesłom „Mjeńšiny w nacionalsocializmje“ přeprosyła. Wjace hač dwaceći zajimcow je přichwatało. Rozmołwny wječork bě jedna z cyłkownje 13 akcijow interkulturneho tydźenja we Wojerecach.
Na nim pokazachu tež lěta 2016 nastaty krótkofilm „Zmij“ Angele Schusteroweje, kotryž rozestaja so z ćežkim połoženjom Serbow w nacionalsocialistiskej diktaturje. Wot lěta 1937 bě serbska rěč w šulach a zjawnym žiwjenju zakazana. „Chcemy k filmej nětko wučbne materialije zdźěłać, kotrež móžemy dołhodobnje za projekty wužiwać. Kónc lěta maja wone hotowe być“, Angela Schusterowa rozłoži.
Krótkopowěsće (08.10.18)
Zlět chórow w čěskej stolicy
Praha. Unija čěskich spěwarskich towarstwow je po 80 lětach zaso zlět chórow w Praze přewjedła. Něhdźe 350 spěwarjow zanjese sej zhromadnje pěsnje mjez druhim na Naměsće Václava Havela. Mjez hosćimi běchu tež zastupnicy Zwjazka serbskich spěwarskich towarstwow, Jadwiga Kaulfürstowa přednjese postrowy. Jědnaće chórow wuhotowa koncertaj na žurli Praskeho chóra Hlahol.
Pegel Sprjewje konstantny
Choćebuz. Najebać dlěje trajacu suchotu wostanje pegel Sprjewje w Berlinje a Braniborskej hač do kónca oktobra konstantny. To zmóžnja přitok wody z jězorow bywšich brunicowych jamow a rěčnych zawěrow. Wjacore wokrjesy kaž tež město Choćebuz běchu suchoty dla zakazali wodu ze Sprjewje klumpać.
Ministerka Stange w Israelu
Policija (05.10.18)
Pos hólca do nohi kusnył
Budyšin. Hižo minjenu póńdźelu je na Budyskej Kamjentnej pos njeznateje žony 14lětneho hólca do nohi kusnył. Psa wjedźeše starša žona při rolatoru. Swoje mjeno a adresu pak wona młodostnemu přeradźić nochcyše. Nětko policija za žonu pyta. Wona je 65 do 70 lět a ma čerwjeno-brune krótke włosy.
Wjes a fabriku zaso zwjazać
Za wuwiće Hórnikec planuja tójšto twarskich naprawow
Hórnikecy (AK/SN). Doskónčny twarski wuwićowy koncept za Hórnikecy je Wojerowska měšćanska rada na swojim zašłym posedźenju schwaliła. „W nim su wažne a trěbne rozsudy zapisane, kak ma so srjedźišćo Hórnikec dale wuwić. Tele předewzaća steja w zwisku z inwesticijemi Budyskeho wokrjesa do Energijoweje fabriki“, rjekny wyši měšćanosta Stefan Skora (CDU).
Twarski wuwićowy koncept je na to wusměrjeny, zwjazać wjes Hórnikecy a energijowu fabriku. Bywša briketownja a sydlišćo dźěłaćerjow tworještej něhdy jednotu, dokelž bě Thälmannowa hasa wušo wobtwarjena. Tónle poćah chcedźa nětko z nowotwarami a zelenišćemi zaso wutworić. Do swojich rozmyslowanjow su planowarjo wobydlerjow sobu zapřijeli. Na dźěłarničce móžachu wjesnjenjo swoje předstawy přednjesć, a te su w planje zdźěla sobu wobkedźbowane. Tak ma so dźěl zawodoweho kulturneho domu spotorhać. Zbytk chcedźa saněrować a jako wjacegeneraciski dom wužiwać. Při tym mysla na młodźinski centrum, na bydlenja za staršich ludźi a na historiske hóstne bydlenja.
Dokelž je kisykał strowy
Poslednju njedźelu požnjenca swjećachmy w našich katolskich wosadach domchowanku. Dźěći su w korbikach płody z polow, zahrodow a zahrodkow sobu přinjesli a před wołtar stajili, zo móhł je měšnik na Božej mši požohnować. Běchu to mnohe družiny zeleniny a sadu. Wuhladali su tam kemšerjo mjez druhim tež kałowe hłójčki. W zašłosći wšak je kał w burskim žiwjenju wažnu rólu hrał.
Mnozy tróšku starši so zawěsće hišće na to dopominaja, zo bě w NDRskim času w zymje kał nimo morcheje nimale jenička zelenina, kotruž sy sej we wobchodźe kupić móhł. Kał pak ludźo tež dźensa rady wužiwaja, a to wosebje jako kisały. Tohodla je so 25 lubowarjow kisykała lětsa znowa a mjeztym hižo 15. raz w Rynčec bróžni w Jaseńcy zetkało, zo bychu zaso zhromadnje kał tołkali. A činjachtu to, kaž dotal nimale přeco, 3. winowca, na Dnju němskeje jednoty.
