Třeći raz zhromadnje psyče zawostajenki rumuja
Wojerecy (SiR/SN). Štóž je hižo raz do psyčeho howna stupił, wě, kak njepřijomnje to je a kak ćežko smjerd zaso wotbudźeš. Scyła zda so stajna tema być, zo někotryžkuli wobsedźer psa jeho zawostajenki prosće ležo wostaji. Mnozy sej mysla, zo měli so z psyčim dawkom wotpadkowe sudobja a wotpowědne titki financować. Runje to pak je wopak, znapřećiwi Budyski psyči wučer Torsten Kurz. „Štóž ma psa, měł samozrozumliwje tež jeho howna rumować. Město abo gmejna njejstej k tomu winowatej, byrnjež wobydler psyči dawk płaćił.“
Nimo toho Kurz na to skedźbnja, zo móža so přez psyče kołbaski tež parazity přenošować, hdyž na přikład cuzy psyk na hownu čucha. Někotre parazity tež při ekstremnych temperaturach wjacore měsacy přežiwja. Tohodla je 51lětny we Wojerecach wosebitu akciju do žiwjenja zwołał, kotruž zajutřišim, srjedu, mjeztym hižo třeći raz přewjedu. Tam su wobsedźerjo psow, ale tež wšitcy dalši zajimcy namołwjeni, w měsće psyče howna zběrać a we wosebitych sudobjach zrumować. Akciju podpěrujetej bydlenjotwarskej towaršnosći města z tym, zo přewostajitej trěbne titki.
Wjace městna za dźěći
Zakładny kamjeń za nowu katolsku pěstowarnju połožili
Kulow (AK/SN). Blisko Krabatoweje zakładneje šule w Kulowje nastawa nowa katolska pěstowarnja. Tam su minjeny pjatk zakładny kamjeń połožili. Nošer budźe kaž dotal katolska wosada. Nowotwar płaći něhdźe štyri miliony eurow. Třećinu toho zapłaći město Kulow, tamnej třećinje dóstanu jako spěchowanske srědki. Kónc lěta 2019 ma nowe dźěćace dnjowe přebywanišćo hotowe być. Kapacita rozšěri so potom wot dotal dohromady 140 městnow na cyłkownje 215. W přizemju budźetej žłobik a pěstowarnja zaměstnjenej, na hornim poschodźe hort.
Policija (01.10.18)
Sornomaj so wuwinyła a znjezbožiła
Hamor. Dospołnje skóncowane je nětko awto 58lětneje žony, kotraž bě sobotu rano na zwjazkowej dróze B 156 mjez Hamorom a Delnim Wujězdom po puću. Jako nadobo sornje na puć stupištej, chcyše so wona jimaj wuwinyć. Při tym zajědźe z jězdnje a z awtom zwróći. Šoferka so při tym snadnje zrani. Sornje so njezranjenej do lěsa zhubištej.
Inwesticija do přichoda města
W přichodnymaj lětomaj nastanje we Wojerecach nowa centralna wyša šula, do kotrejež zaćahnu šulerjo tuchwilu wobstejaceju kubłanišćow w starym a nowym měsće.
Wojerecy (KD/SN). Za nowu Wojerowsku wyšu šulu su tele dny zakładny kamjeń połožili. Je to tuchwilu najwjetši twarski objekt města, kotryž płaći něhdźe 13 milionow eurow. Tam přetwarja nětko 1959 natwarjenu prěnju polytechnisku wyšu šulu noweho města. W njej bě po přewróće něšto lět Konrada Zusowy gymnazij zaměstnjeny. Nimo toho nastanje wulki moderny přitwar, rjekny wyši měšćanosta Stefan Skora (CDU). Wón mjenowaše nastawace třičarowe kubłanišćo „inwesticiju do přichoda našeho města“. Zaćahnyć maja tule wot šulskeho lěta 2020/2021 chowancy wobstejaceju wyšeju šulow w nowym a starym měsće.
Wjace hač 30 zapřahow jědźeše wčera w Chrósćicach wot Fulkec ...
Krótkopowěsće (01.10.18)
190 započatkarjow witali
Budyšin. Budyska powołanska akademija je dźensa nimale 190 studentow imatrikulowała. Zarjadowanje wotmě so po tradiciji w Budyskim Němsko-Serbskim ludowym dźiwadle. Direktorka akademije prof. dr. Barbara Wuttke a Budyski měšćanosta za financy, kubłanje a socialne dr. Robert Böhmer staj swjatočnosć wotewrěłoj.
Wuspěšna we wubědźowanju
Drježdźany. Na Drježdźanskej Techniskej uniwersiće móža tři wědomostne projekty jako tak mjenowane ekscelence clustery přewjesć. Tomu su Zwjazk a kraje we wobłuku ekscelencneje strategije přizwolili, kaž Němske slědźenske zhromadźenstwo wčera zdźěli. Slědźić budu na temy „fyzika je žiwjenje“, „kompleksita a topologija w kwantowych materialijach“ kaž tež „centrum za taktilny internet“.
Změnja strukturu lěsow
Na serbski wječor
Pančicy-Kukow. Zastupjerki a zastupjerjo Domowiny, Sakskeje serbskeje rady a Załožby za serbski lud přeproša wšitkich zajimcow na zhromadny diskusijny wječor. Wón wotměje so wutoru, 2. oktobra, w 19 hodź. w hosćencu „Karstenowa piwowa stwička“ w Pančicach-Kukowje. Přeprošeni njejsu jenož aktiwni čłonojo najwšelakorišich serbskich towarstwow, ale tež jednotliwcy, serbscy młodostni a starši kaž tež politisce zajimowani. Z nimi chcedźa so wo tym rozmołwjeć, hdźe derje běži, hdźe klaca a kak móhli jich skutkowanje podpěrać. W srjedźišću steja prašenja wopytowarjow. Organizatorojo wjesela so na čiłu diskusiju.
Požohnuja zapřahi
Chrósćicy. Na wosebity nyšpor domchowanki přeproša Towarstwo Cyrila a Metoda njedźelu, 30. septembra, w 14 hodź. na łuku při Chróšćanskich Hatkach. Chróšćanski cyrkwinski chór a wosadni dujerjo nyšpor wuhotuja.
Dlěje do muzeja
Jězdźerjo samo z Baltikuma
21. mjezynarodna łužiska rallye pokaza motorsport na wysokim niwowje
Hamor (AK/SN). Na lětušej łužiskej rallye wobdźěli so znajmjeńša 80 mustwow. Wone přijědu samo z Norwegskeje, Finskeje, Šwedskeje a z Baltikuma. Tole podšmórny Wolfgang Rasper, předsyda wubědźowanskeho a wodosportoweho kluba Łužica, wčera w Hamorje. Hromadźe z policiju, wohnjowej woboru, Hamorskej gmejnu a mnohimi předewzaćemi towarstwo rallye organizuje. Wona wotměje so wot 1. do 3. nowembra. Hižo něšto měsacow tónle podawk přihotuja.
Policija (28.09.18)
Pos přepławjenje zawinił
Biskopicy. Z njewšědnym padom přepławjenja dyrbještej so wohnjowa wobora a policija wčera w Biskopicach zaběrać. Z bydlenja w druhim poschodźe ćečeše woda do delnich bydlenjow. Kaž so wukopa, pak mějićel hornjeho bydlenja scyła doma njebě, za to pak jeho wulki pos. Po wšěm zdaću bě dogga lačna, so při honaču napi, ale ručicu zaso dele njestłóči, tak zo myjadło bórze přeběža. Wobornicy we wjacorych bydlenjach wodu wuklumpachu. Wo nastatej škodźe dyrbi mějićel psa nětko ze swojej zawěsćernju porěčeć.
