W Radworju hotuja so na wulki twarski projekt
Radwor (SN/MkWj). Tójšto ludźi je so minjeny štwórtk na žurli Radworskeho hosćenca „Meja“ za to zajimowało, štož přichodny čas na nich přińdźe: dołho připowědźeny a planowany dróhotwarski projekt při kěrchowje. Zamołwići běchu w prěnim rjedźe direktnje potrjechenych wobydlerjow přeprosyli. Informaciske zarjadowanje bě pak tež wšitkim druhim zajimcam přistupne.
Ludźom napřećo sedźachu zamołwići wokrjesa runje tak kaž zastupnicy planowanskeho běrowa, wopłóčkoweho zaměroweho zwjazka a wukonjaceho twarskeho zawoda.
Wšitkim wobdźělenym bě jasne, zo su twarske naprawy z tójšto wobćežnosćemi zwjazane, wšako je křižowanišćo, kotrež nic mjenje hač pjeć dróhow zwjazuje, wažne wobchadne ćežišćo. Wotpowědnje intensiwnje su so na twarske předewzaće přihotowali. Tak su mjeztym tajke něšto kaž wjesnu wobjězdku natwarili, zo by běžny nadróžny wobchad ludźi, nakładnych awtow a busow zaručeny był. Čornohodlerske ratarske předewzaće je wotpowědne ležownosće nachwilnje přewostajiło. Wobjězdku chcedźa nětko hišće asfaltować.
Solidnje hospodarić móžno
Delanska gmejna ma wulke šansy, docpěć kónc lěta wurunany etat
Róžant (JK/SN). To radźićeljo wšitkich gmejnow rady słyša, hdyž jim komornica zdźěli, zo dochody wudawki kryja a za dźěło komuny dosahaja. Tak bě to tež na minjenym posedźenju radźićelow gmejny Ralbicy-Róžant. Komornica Franciska Čapikowa předstaji jim tuchwilny staw hospodarskeho plana, po kotrymž wot julija dźěłaja.
Dźakowano wobšěrnym spěchowanskim programam hodźi so gmejnski podźěl na wšelakich projektach poměrnje snadny dźeržeć. Nimale 20 000 eurow wjace přemysłoweho dawka móžachu registrować, runje tak kaž nimale 27 000 eurow mjenje gmejnskeho podźěla za wobhospodarjenske kóšty Ralbičanskeje pěstowarnje. Zalutowane pjenjezy wšak budu zaso trěbne za zarjadowanje přidatnych žłobikowych městnow w Smjerdźacej.
Byrnjež so sezona w Małowjelkowskim prazwěrjencu nachilała, ...
Přemało radźićelow přitomnych
W Miłorazu měješe Trjebinska gmejnska rada na swojim wčerawšim posedźenju wo zakładnym zrěčenju za přesydlenje wsy rozsudźić. Ale k tomu bohužel njedóńdźe.
Miłoraz (CK/SN). Poprawom so to lědma stawa, a runje wčera w Miłorazu njeby so to scyła stać směło: Posedźenje Trjebinskeje gmejnskeje rady dyrbjachu skónčić, prjedy hač so wone prawje započa. Z jědnaće radźićelow běchu štyrjo přitomni, třo běchu zamołwjeni. Tamni prosće přišli njeběchu. Při tym steješe daloko sahacy rozsud na dnjowym porjedźe. Trjebinscy gmejnscy radźićeljo mějachu wo zakładnym zrěčenju za přesydlenje Miłoraza rozsudźić. Te wobsahuje wotrunanje priwatnych wobsedźerjow kaž tež gmejny, kotraž zhubi wotbagrowanja dla towarstwowy dom, kupjel, wojerski pomnik, puće a wjele dalšeho. Wjacore měsacy běštej Trjebinska a Slepjanska gmejna z energijowym koncernom LEAG jednałoj. Skónčnje dojednachu so na kompromis. Tón wopřijima přidatne pjenjezy za wuwiće Trjebinskeje gmejny a spěchowanje Slepjanskeje, zo móhli Miłoražanam na nowym městnje towaršnostne žiwjenje zaručić.
Krótkopowěsće (23.10.18)
Prezident Duda w Němskej
Berlin. Pólski prezident Andrzej Duda je dźensa do Berlina přilećał, zo by ze zwjazkowym prezidentom Frankom-Walterom Steinmeierom kaž tež ze zwjazkowej kanclerku Angelu Merkel (CDU) zwadne temy kaž twar płunowoda na dnje Baltiskeho morja Nord Stream 2, justicnu reformu a pensionowanje najwyšich sudnikow w Pólskej rozjimał.
Što je Thespis-centrum?
Budyšin. Transkulturny Budyski Thespis-centrum poskića wotnětka nowe kursy kołowokoło lajskeho dźiwadła. W tym zwisku chcedźa sobudźěłaćerjo jutře wot 19.30 hodź. na informaciskim zarjadowanju swoje aktiwity rozłožić a na prašenja wotmołwjeć. Zaměr je, „centrum a jeho nadawki bóle do wědomja wobydlerjow zakótwić“, praji za zjawnostne dźěło zamołwita Denise Knorr.
Wojuja přećiwo ambroziji
Hakle dwaj dnjej dowolnosć měła
Wo poradźene wjesne swjedźenje so starałoj
Přijědźeš-li z Konjec do Koćiny, wuhladaš wot dźensnišeho w nahladnym a rjenje hladanym prěnim statoku wokoło zachoda pletwu z zbožopřećom w złotych pismikach. Tam mataj dźensa Franc Langa a jeho mandźelska Maria złoty kwas. Ćělnje a duchownje strowaj zhladujetaj wonaj na pjeć lětdźesatkow zbožowneje zhromadnosće.
Ze złotej krónu pyšena jubilarka narodźi so we wójnskim lěće 1943 Njekelic swójbje w Koćinje. Zhromadnje ze sotru hižo za čas dźěćatstwa bě jej kazane – mějachu 15 hektarow wulke ratarstwo – dźěło widźeć a so gratu přimać. W ródnej wsy chodźeše wona wosom lět do šule a na to słužeše tři lěta pola Lajdrec w Nuknicy. Wróćiwši so domoj dźěłaše krótki čas w domjacym ratarstwje a wot lěta 1964 w Rakečanskich mechaniskich zawodach (muna).
Policija (22.10.18)
Tójšto škody při parkowanju
Budyšin. Wodźerka Škody Fabia chcyše zawčerawšim popołdnju na parkowanišću Budyskeho Centera na Žitnych wikach poprawom jenož wróćo zajěć a wuparkować. To pak so jej scyła poradźiło njeje, kaž Zhorjelska policajska direkcija zdźěli. 66lětna zhubi kontrolu nad jězdźidłom a so wo 180 stopnjow zwjertny. Při tym zrazy do dalšeje Škody a skónčnje do Renaulta. Njesławna bilanca tohole wuparkowanskeho pospyta: skóncowany Renault a dohromady 11 000 eurow škody.
Přednošk nam Słowaksku zbližił
Wo serbskej putniskej jězbje wot 5. do 9. pražnika do wuchodneje Słowakskeje rozprawješe njedawno Baćoński farar Gerat Wornar serbskim senioram Budyskeje tachantskeje wosady. K tomu pokazowaše wón wideja a fota, kotrež bě Bosćij Handrik z Radworja zhotowił.
Hłowny zaměr jězby bě wobdźělenje na sobu najwjetšim putnikowanju w Słowakskej na Marijanskej horje blisko města Levoča. 8. julija je so tam na putniskej łuce něhdźe 80 000 kemšerjow zhromadźiło. Z bamžowskim zastupnikom a dalšimi duchownymi swjećeše swjatočne kemše tohorunja Baćoński farar. Za njeho bě wosebite dožiwjenje, zo smědźeše hromadźe z metropolitom grjekskokatolskeje cyrkwje Janom Bablakom, kotrehož hižo z młodych lět znaje, za wołtarjom stać.
W lětach 1950 do 1968 bě grjekskokatolska cyrkej kruće zakazana. Nětko pak dožiwja wona wulki rozmach. Tón začuwachu Serbja tohorunja na grjeksko-katolskich kemšach po wuchodnym ritusu na dalšim putniskim městnje, na horje Zvir blisko wsy Litmanov. Tam rozprawješe jim Jan Bablak wosobinsce wo přesćěhanjach w socialistiskej dobje.
Zelena swěca za solarny park
Po spočatnych wobmyslenjach wobydlerjow nětko kompromis našli
Hodźij (CK/SN). Solarnu připrawu na swobodnej płoninje při awtodróze A 4 pola Prěčec smědźa twarić. Za to trěbny twarski plan „Wosebita kónčina za alternatiwnu energiju Prěčecy“ je Hodźijska gmejnska rada na swojim zašłym posedźenju z jednym wzdatym hłosom wobzamknyła.
Po prěnim zjawnym wupołoženju plana mějachu wobydlerjo wulke wobmyslenja. Na to je so inwestor Hermann Dreesbeimdieke z Gütersloha z nimi rozmołwjał. Při tym dojednachu so na kompromis. Tak njenastaji wón kaž spočatnje předwidźane solarne module na cyłych třoch hektarach, ale jenož na třećinje płoniny, a to z maksimalnej wysokosću 2,50 metrow. Hižo w lěće 2015 běchu wobličili, w kotrej měrje móhli solarne module słónco do směra na susodnu bydlensku štwórć reflektować. Nětko nochce inwestor jenož twarsku městnosć pomjeńšić, ale zdobom tež štomy a kerki nasadźeć. Nimo toho mějachu wobydlerjo wobmyslenja, zo móhła solarna připrawa haru z awtodróhi zesylnić. Posudk z lěta 2015 pak je dopokazał, zo tomu tak njeje.
