Pytaja hrajerjow za film
Budyšin. Zo bychu Budyski wokrjes jako moderny region z tradiciju zwičnili, dźěła krajnoradny zarjad hromadźe z předewzaćom DD-V Media na imageowym filmje. Za projekt pytaja hišće hrajerjow wšěch starobnych skupin. Zwjetša jedna so wo róle bjez teksta. Wšitke róle měli přirodnje, swójbnje a awtentisce skutkować. Jednotliwe sceny nastanu wot kónca meje hač do spočatka julija na rozdźělnych městnach wokrjesa. Transport a zastaranje budźetej zaručenej. Hrajerjam płaća mały honorar. Někotre róle maja serbske temy zwobraznić. Tak pytaja žonu, kotraž zamóže jutrowne jejka debić, holcu, kotraž běžnje serbsce rěči, a muža, kiž ma křižerja předstajić, wón drje njetrjeba jěchać, měł pak z konjemi wobchadźeć móc. Zajimcy za róle njech přizjewja so z wobrazom e-mailnje pod adresu .
Přidatna móžnosć
Policija (16.05.18)
Wospjet pod wliwom drogow jěł
Prěčecy. Poprawom měješe wobsadka policajskeho awta zawčerawšim popołdnju hinaši nadawk, ale po puću zetka wona při kružnym wobchadźe blisko Prěčec „stareho znateho“ w jeho BMWju. Hakle před něšto tydźenjemi běchu zastojnicy 22lětneho muža kontrolowali a zwěsćili, zo bě wón drogi brał. Tuž nětko znowa zadźeržachu. Tež tónraz steješe wón wočiwidnje pod wliwom drogow, štož wotpowědny test wobkrući. Młody muž potajkim ničo přinawuknył njeje. Dalšu jězbu jemu policisća zakazachu. Dyrbjało-li tež přepytowanje kreje drogi wobkrućić, hroža njepolěpšomnemu dwaj dypkaj w Flensburgu, tysac eurow pokuty a tři měsacy zakaz jězdźenja.
Nochcedźa ležownosće předać
Někotrych wobydlerjow dla njemóža wokrjesnu dróhu ponowić
Miłoćicy (JK/SN). Wobydlerjo Wěteńcy a Miłoćic drje změja hišće někotre lěta na to čakać dyrbjeć, zo budźe wokrjesna dróha K 9236 na wotrězku wot kružneho wobchada pola Serbskich Pazlic přez Miłoćicy do směra na statnu dróhu S 100 ponowjena. To bě tenor wčerawšeho posedźenja Njebjelčanskeje gmejnskeje rady w Miłoćicach. Inženjer Ralf Hennig z Drježdźanskeho inženjerskeho běrowa je tam radźićelam hišće raz nazornje staw planowanja k ponowjenju dróhi rozłožił. Hižo wot lěta 2014 zaběra so běrow w nadawku gmejny z planowanskimi dźěłami, mjenowany wotrězk K 9236 wobšěrnje ponowić.
Wopytowarjow zaměrnje wodźić
Hamor (AK/SN). Z wobchadnym konceptom chce gmejna Hamor přichodnje turistow a wopytowarjow při Bjerwałdskim jězoru zaměrnje wodźić. Tole podšmórny nawodnica twarskeho zarjada gmejny Cortina Kokles na póndźelnym posedźenju Hamorskeje gmejnskeje rady. Jeje čłonojo tam jednohłósnje wobzamknychu, zo ma Rěčičanski inženjerski běrow za nimale 50 000 eurow tajki koncept zdźěłać.
Swjatkowničku dožiwi Chróšćanska wosada po wjele lětach zaso ...
Grodk znowa jako serbskej rěči přichilena komuna wuznamjenjeny
Město Grodk je we wubědźowanju „Rěči přichilena komuna – serbska rěč je žiwa 2017/2018“ znowa druhe městno docpěło. Bě to třeće wobdźělenje po lětach 2004/2005 (2. městno) a 2010/ 2011 (1. městno). Hižo nětko je jasne, zo so město tež na móžnym štwórtym wurisanju wobdźěli.
Lětarjo maja stajnje přiležnosće swjećić
Kamjenc (UM/SN). 2. a 3. junija swjeća na Kamjenskim lětanišću „zaso raz“ stolětny jubilej. W srjedźišću steja tónkróć tam zasydlene firmy. To zdźělištaj wčera Kamjenski wyši měšćanosta Roland Dantz (njestronjan) a jednaćel wobhospodarjenskeje towaršnosće lětanišća Richard Pötschke na nowinarskej konferency w Lessingowym měsće.
Witaj-skupina wohrožena
Radwor (SN/MkWj). Pěstowarnja Dźěłaćerskeho dobroćelskeho skutka (AWO) „Marja Kubašec“ w Radworju pyta nowu serbsku maćernorěčnu kubłarku abo serbskeho kubłarja. Dalewobstaće tamnišeje Witaj-skupiny je wohrožene, dokelž je dotalny kubłar wupowědźił, kaž na wčerawšim posedźenju Radworskeje gmejnskeje rady zdźělichu.
Wjesnjanosta Wincenc Baberška (CDU) móžeše AWO-pěstowarni dobre wuwiće wobswědčić, wšako je jeje Witaj-skupina tež wažny zakład za Radworsku šulu. Na přichodnym zjawnym posedźenju gmejnskeje rady chcedźa wo tym wuradźować. Nawodnica pěstowarnje Birgit Quint je chětro zludana, kaž Serbskim Nowinam potwjerdźi. Wona dyrbi nětko najspěšnišo jednać, njewě pak sej pobrachowaceho serbskeho personala dla žiweje rady.
Jedna z dalšich temow bě debata wo tym, kak měło so z wonymi 70 000 eurami wobchadźeć, kotrež chce Sakska lětsa a přichodnej lěće kóždej komunje přewostajić. Wjesnjanosta namjety za móžne přidatne projekty wotpokaza: Gmejna je w procesu konsolidowanja a pjenjezy nuznje w etaće trjeba.
Projektaj za tolerancu mytowanej
Drježdźany (SN/at). Z projektom „Budyske rozmołwy“ je dźewjeć wobydlerjow sprjewineho města lěta 2015 nadstronsku a generacije přesahowacu wuměnu wo towaršnostnych prašenjach a aktualnych problemach w měsće a wokrjesu zmóžniło. Runje w času, hdyž přińdźechu tysacy ćěkancow do Němskeje a tak tež do Hornjeje Łužicy, bě iniciatorej Christianej Kämpfe tajka wuměna wažna. Fachowe přednoški, zetkanja, čitanja a diskusijne koła pomhachu ludźom sej měnjenje wutworić. Za swój angažement bu projekt „Budyske rozmołwy“ wčera w sakskej stolicy z mytom wubědźowanja „Aktiwnje za demokratiju a tolerancu 2017“ počesćeny.
Krótkopowěsće (16.05.18)
Wo wjelku wuradźowali
Drježdźany. Zapósłancy Sakskeho krajneho sejma su wčera wo wjelčej problematice wuradźowali. Na słyšenju wuběrka za přirodu a ratarstwo dźěše wo wotpowědnu próstwu frakcije CDU zhromadnje z SPD a frakcije Zelenych. Stejišći wšak stej po słyšenju dale rozdźělnej. Mjeztym zo njewidźa Zeleni potrjebu, wobstatk wjelkow wobmjezować, je CDU hinašeho měnjenja.
Přichodnje powšitkowny tarif
Zhorjelc. Po pjatnaće lětach chce Gerharta Hauptmannowe dźiwadło Žitawa-Zhorjelc swój ansambl zaso po powšitkownym tarifje płaćić. Kritiskeho financneho połoženja domu dla bu w lěće 2003 nišu mzdu wopřijacy domjacy tarif z wuměłcami wujednany. Na iniciatiwu sakskeho ministerskeho prezidenta Michaela Kretschmera (CDU), kiž bě so za „přistojne zasłužby“ wuprajił, chce jewišćo tomu wot klětušeho wotpowědować.
Filmowy festiwal zahajeny
