Dobrošicy (aha/SN). Po tym zo bu po politiskim přewróće 1991 nowonatwarjena kapałka w Dobrošicach Janej Křćenikej poswjećena, su tam lěto na to na česć patrona swojeho Božeho domu swjedźeń wotměli. Wot toho časa činja to kóžde lěto. Trójce – w lětach 2001, 2007 a 2012 – móžachu so samo njedźelu k patronatnemu swjedźenjej zetkać.

Tež minjenu njedźelu smědźachu zaso raz woměrje a dołho snědać, zo bychu w 11 hodź. Božu mšu z Chróšćanskim wosadnym fararjom Měrćinom Deleńkom jako hłownym celebrantom swjećili. Hromadźe z nim staj Baćoński farar Gerat Wornar, kiž w Dobrošicach stajnje srjedu Božu mšu swjeći, a młody diakon Pětr Mróz, kiž tohorunja prědowaše, swjatočne kemše swjećiłoj. K wołtarjej słužeše wosom ministrantow, a Bernadet Šołćina přewodźeše kěrluše na harmoniumje, štož kemšerjo w połnje wobsadźenej kapałce wulce připóznachu.