Serbski profesor a serbskej temje na 18. Budyskej akademiji

Budyšin (SN/MiR). Dźeń a husćišo poskićuja uniwersity a wysoke šule nimo regularnych čitanjow a seminarow za studowacych tež zarjadowanja za zjawnosć. Mjeztym 18. Budyska akademija wuhotuje w běhu přichodnych měsacow přednoški na wšelke temy. Zymski semester akademije, kotruž město Budyšin a campus Dualneje wysokeje šule Sakska wuhotujetej, zapřija aktualne towaršnostne, hospodarske a wědomostne temy kaž tež regionalne wosebitosće a kulturne tradicije. Mjez lětušim nowembrom a klětušim aprylom budźe jich w cyłku šěsć přednoškow. Tam njezměja wopytowarjo jenož składnosć, sej temy z noweje perspektiwy wotkryć, ale tež so z referentku resp. referentom rozmołwjeć. W srjedźišću steja mjez druhim wosobinske prewentiwne zastaranje, zasadźenje kumštneje inteligency we předewzaćach, načasne nawjedowanje jednoho předewzaća a transformacija Łužicy. Mjez poskitkami su wjacore z poćahom k žiwjenju łužiskich Serbow.