W Kulowskej pěstowarni w nošerstwje Křesćansko-socialneho ...
Wužiwać prawo naprašowanja
Budyšin (SN/at). Z nastorkami z rozprawy społnomócnjeneje Reginy Krawcoweje loni 12. decembra Budyskemu wokrjesnemu sejmikej zaběrachu so čłonojo wokrjesneho dźěłoweho kruha za serbske naležnosće na wuradźowanju wčera w Budyskim krajnoradnym zarjedźe.
Podpěru nazhoni społnomócnjena w kritice, zo je so městno kuratorki Christiny Boguszoweje přeměniło. Po tym zo bě wona zastojnstwo direktorki Serbskeho muzeja přewzała, bu z toho městno muzejoweho pedagogi. Tajkeho nuznje trjebaja, wšako bu wotpowědne městno lěta 2008 šmórnjene. Pozitiwnje hódnoći dźěłowy kruh nowe městno za wolontarku. Zo bychu zhonili, kak móhł gremij Serbski muzej zaměrnišo podpěrać, chcedźa z Christinu Boguszowej rěčeć.
Přez serbskich wěcywustojnych wobydlerjow we wuběrkach Budyskeho wokrjesneho sejmika měło so serbskim, ale tež dalšim wokrjesnym radźićelam přidźěłać, zo bychu so woni nastupajo konkretne serbske předmjety z prašenjemi na wokrjesne zarjadnistwo wobroćili. „Prawo naprašowanja ma so bóle wužiwać“, rjekny społnomócnjena.
Žitnych wikow dla bydlenja přepytali
Podawki 14. septembra kaž tež w nocy wot 1. na 2. nowember 2016 na Budyskich Žitnych wikach stejachu dźensa w fokusu Zhorjelskeje policajskeje direkcije a operatiwneho wotwobaranskeho centruma sakskeje policije.
Budyšin (SN/MWj). Zhromadna přepytowanska skupina „Platte“, wobstejaca ze zastojnikow Zhorjelskeje policajskeje direkcije a wotwobaranskeho centruma sakskeje policije je dźensa w Budyšinje, Wojerecach, Schönteichenje a Hnašecach wjacore bydlenja přepytała. Kaž w zhromadnym nowinskim wozjewjenju policajskeje direkcije a statneho rěčnistwa rěka, je tele naprawy Zhorjelske hamtske sudnistwo na namjet tamnišeho statneho rěčnistwa přikazało. „Naprawy stejachu w zwisku z přepytowanjom podawkow 14. septembra 2016 kaž tež w nocy wot 1. na 2. nowember w Budyskim nutřkownym měsće. Mjez druhim přepytujemy spjećowanja přećiwo policajskim zastojnikam a nuzowanja dla“, steji w nowinskim wozjewjenju.
Krótkopowěsće (11.01.17)
Internat ma praktikanta
Choćebuz. Vincent Lukas skutkuje wotnětka w internaće Delnjoserbskeho gymnazija Choćebuz jako praktikant. Młodźenc je w druhim wukubłanskim lěće na kubłarja. Jako bywši šuler gymnazija měješe wón dobre wuměnjenja za wupisane městno. Žadanej běštej dwurěčnosć a zajim, w serbskich institucijach skutkować chcyć.
Wadźa so wojakow USA dla
Podstupim. Zaměr USA, swoje wojerske jednotki do srjedźneje a wuchodneje Europy přepołožić, je w Braniborskej protesty a raznu politisku debatu zbudźił. Zastupnicy Lěwicy a AfD šwikaja akciju jako „wójnsku hrožacu politiku“. Rěčnicy CDU transport wojakow porno tomu zakituja. Ministerski prezident Dietmar Woidke (SPD) bě debatu z kritiskimi wuprajenjemi wo wojakach nastorčił.
Hendricks: Wjelki njetřěleć
Hodowne předstajenje z diskutowacymi teeniejemi
Budyšin (CRM/SN). Lětdźesatki swjeća Serbja Budyskeje katolskeje tachantskeje wosady wokoło Třoch kralow swoju wosadnu hodowničku, a to kóždy raz z bjesadu při kofeju a wosušku a ze zhromadnym spěwanjom. Přetož mnohe lěta hižo stara so wučerka na wuměnku Ludmiła Bizoldowa tež wo mały kulturny program, kotryž wosadni sami wuhotuja.
Policija (11.01.17)
Cuze pakety wočinjeli
Kamjenc. Póstowy zarjad na Andreasa Güntherowej w Kamjencu bě cil paduchow, kotřiž so tam w nocy na póndźelu zadobychu. Kaž policija rozprawja, su njeznaći wšitke rumnosće přepytali a wjacore pakety zwočinjeli. Nimo toho pokradnychu trezor z pjenjezami a kołkami, telewizor a mikrožołmu. Hódnota rubizny dotal znata njeje. Na twarjenju nasta něhdźe 300 eurow škody. Policija pad nětko přepytuje.
Prěni wothłós wjele lubjacy
Nowy kuchar w Ralbicach dobry zazběh měł
Ralbicy (JK/SN). Prěnje połdra tydźenja w Ralbičanskej šulskej kuchni je Alarcon Cardenas-Hančik ze swojim mustwom derje zmištrował, a jeho rezimej po prěnich dnjach je přewšo pozitiwny. Wón dotal słód šulerjow runje tak trjechi kaž wšěch tych, kotřiž sej wobjed z Ralbic skazaja. Za to ma wšak dosć nazhonjenja. Do Ralbičanskeho časa bě hižo we wšelakich Drježdźanskich hotelach warił, mjez druhim w Steigenbergeru a Hiltonje. Tam bě zamołwity za wšitke jědźe z bohateho poskitka mjezynarodneje gastronomije. Wot solotjow přez juški hač k pječenjam a desertam móžeše so wupruwować a wukmanić. Tež zymne bifeje a wulke wobjedy z wjacorymi jědźemi je přihotował a warił. Samo patiseriju, krónu warjenja po swójskich słowach, wón wobknježi a runje tak móže słódne wudźěłki z muki pjec.
W februaru započnu šulu twarić
Poprawom měješe Slepjanski němsko-serbski šulski centrum hižo dawno hotowy być. Planowanskich změnow a njejasnosćow financowanja dla pak so projekt dliješe. Nětko drje jón skónčnje zwoprawdźa.
Slepo (AK/SN). Na kromje Slepoho započnu bórze němsko-serbski šulski centrum twarić. „Po tym zo smy wšitke móžnosće zalutowanja zadźěłali, wučinjeja cyłkowne kóšty nětko 24,37 milionow eurow. Tak smy swojemu zaměrej, twarske kóšty na maksimalnje 24 milionow eurow wobmjezować, cyły čwak bliže přišli“, rjekny Steffen Seidlich, nawoda twarskeho wotrjada zarjadniskeho zjednoćenstwa Slepo na wčerawšim posedźenju tamnišeje gmejnskeje rady. Jednohłósnje radźićeljo rozsudźichu, zo ma Nišćanske hłubokotwarske předewzaće za nimale 300 000 eurow twarnišćo medijam přizamknyć. Budyska elektroinstalaciska firma ma za nimale 80 000 eurow trafostaciju natwarić.
Zarjadaj swobodneho stata matej přichodnje z Kamjenca na cyłu Saksku ...
Swobodny stat Sakska zaměstni w Lessingowym měsće dalše institucije w krajnym nošerstwje. Po dołhim „sparje Ćernjawki“ ma so bywše wokrjesne město stać z kubłanskim srjedźišćom na polu pedagogiki a informatiki.
Kamjenc (JK/SN). Po politiskej změnje steješe Lessingowe město zboka Budyšina a Zhorjelca. Jako nabywaštej susodnej měsće Kamjenca přiběrajcy na hospodarskim a politiskim wuznamje, popušći jeho zjawny a zarjadniski zajim. Jenički zarjad, ale přiwšěm dosć wuznamny, bě sakski statistiski, kotryž 1992 w Kamjencu zaměstnichu, tam hač do dźensnišeho skutkuje.
Dwurěčnosć zaručić wotwisuje wot wšědneje politiki
Falowace statne rjadowanja haća prócu gmejnow, serbskosć zwuraznjeć
Sakski Serbski zakoń zaruča runohódne wužiwanje serbšćiny na zarjadach a w zjawnym žiwjenju. Wulki dźěl komunalneje politiki serbskich gmejnow a na zarjadach dwurěčneje Łužicy ma so po móžnosći tež serbsce abo znajmjeńša dwurěčnje zwoprawdźić. Posedźenja gmejnskich radow w komunach zarjadniskeho zwjazka Při Klóšterskej wodźe su přewažnje serbske. We wuwzaćnych padach a po zestawje radow so wěste dnjowe dypki lěpšeho zrozumjenja dla tež němsce wobjednawaja. W tym padźe je radźomne a z organizatoriskeho a zarjadniskeho wida zmysłapołne měć fachowy přełožk, štož wězo wukubłany tołmačer najlěpje zamóže. „Po zakonju ma to bjezporočne być, ale sakske knježerstwo njepřewostaja gmejnam trěbne pjenjezy, zo bychu předpisy tež zwoprawdźić móhli“, praji předsyda zarjadniskeho zwjazka Měrko Domaška.
