Po tym zo je minjene dny nimale po cyłej wsy Pančicach-Kukowje nadróžne wobswětlenje wupadnyło, tam najwjetši dźěl lampow nětko zaso funguje. Móžu derje zrozumić, zo někotremužkuli prawje derje njeje, hdyž ma wječor we wsy hišće něšto wobstarać, jenička swěca po puću pak swěći přez wokna domow a hewak je wšo ćma. Ja sym to minjene dny cyle hinak začuwał­. Takle swoju wjes scyła hišće widźał njejsym, zo je wječor tež woprawdźe ćma. Haj, sym so samo hišće raz ekstra na puć podał a hewak zwučene wobrazy na nowe wašnje na sebje skutkować dał. Smy so mjeztym dawno na to zwučili, zo nadróžne lampy wječor wšudźe wšitko wobswětleja. Wězo ma čłowjek swětło radšo hač ćmu. Znajmjeńša pak móže wupadnjene nadróžne wobswětlenje raz k tomu wjesć, zo swoju wokolinu wě­domišo a na cyle njezwučene wašnje zapřimnješ. Marian Wjeńka

Budyšin (SN/at). Budyski wokrjes, měsće Kamjenc a Wojerecy kaž tež gmejna Sprjewiny Doł poskićeja informaciski system nastupajo dźěło wokrjesneho sejmika kaž tež měšćanskeju a gmejnskeje rady. We wobłuku jich internetneje prezentacije maja wobydlerjo a radźićeljo stajnje swójski přistup. Z tajkim systemom na přikład njezhoni zajimc jenož dnjowy porjad zjawneho dźěla posedźenjow gremijow, ale ma zdobom dohlad do wšitkich z podatymi dypkami dnjoweho porjada zwisowacych dokumentow a předłohow k wobzamknjenju. Informaciski sys­tem je zdobom archiw. Štož w interneće njewidźiš, to potwjerdźi Sabine Spiering z gmejnskeho zarjadnistwa Sprjewiny Doł: „Tajki system wolóža dźěło zarjadnistwa nastupajo přihot, wuhódnoćenje a wotličenje posedźenjow našeje gmejnskeje rady.“

Město Budyšin chce informaciski system po móžnosći lětsa zawjesć, na čimž hižo zaměrnje dźěła. W Běłej Wodźe a w Zhorjelskim krajnoradnym zarjedźe tajku spomóžnu inwesticiju přihotuja.

Rozprawu přepodali

Drježdźany. W padźe terorizma podhladneho Dshabara al-Bakra je komisija fachowcow dźensa swoju rozprawu předpołožiła. Předsyda gremija, něhdyši wustawowy sudnik Herbert Landau, je 200stronski dokument sakskemu ministerskemu prezidentej Stanisławej Tilichej (CDU) přepodał. Zjawnosć chcychu popołdnju nadrobnje informować.

Wočakuje stabilne wobdźělenje

Lipsk. Direktor Lipšćanskich knižnych wikow Oliver Zille wočakuje tež lětsa stabilne wobdźělenje na přehladce, kotraž wotměje so wot 23. do 28. měrca. Najebać hoberske změny na medialnym polu maja knižne wiki dale dobry wothłós, wón rjekny. Loni bě so 2 250 nakładnistwow a posłužbnikow wobdźěliło. Tež LND chce lětsa zaso pódla być.

Pruwuja nowu formu transporta

Čorny Chołmc (UH/SN). Tež we Wojerowskim regionje so tele dny w mnohich pěstowarnjach a zakładnych šula z połnej paru na ptači kwas hotuja. Dźěći zhromadnje za njón pasla, lěpja a šija a wězo ptačokwasne pěsnje zwučuja. Tak je tomu tež w Čornochołmčanskej pěstowarni „Krabat“. Wot lěta 2008 tam kubłarka Silvia Stephanowa stajnje dwulětnje z holcami a hólcami něhdźe połhodźinski ptačokwasny program za zjawne předstajenje nazwučuje. Jeho wjeršk je serbski kwasny ćah w drasće Wojerowskich ewangelskich Serbow. 25. januara su hosćo tuž na žurlu Čornochołmčanskeho towarstwoweho domu přeprošeni, hdźež jim wot 15.30 hodź. kulturny program předstaja.