Docpěje swoje hranicy
Měli za jedyn postronk ćahnyć
Budyšin (SN). Města Budyšin, Zhorjelc a Wojerecy podpěruja prócowanje, strukturnu změnu we Łužicy zhromadnje zmištrować. Kaž Budyske měšćanske zarjadnistwo zdźěla, su so wyši měšćanosća tutych třoch komunow nadcentralneho zwjazka městow na to dojednali so zamołwiće na procesu wobdźělić. Woni reaguja na mjezyrozprawu komisije za rozrost, strukturnu změnu a dźěło, wšako njesteja jenož wot kónca wudobywanja brunicy direktnje potrjechene komuny a wokrjesy w srjedźišću strukturneje změny. Ně, maja ju za cyłotne wužadanje regionej mjez Königs Wusterhausenom a Žitawu. Łužiskemu kruhej wobkrućeja wyši měšćanosća wuběrne dźěło. „Nětko měł wšón region za jedyn postronk ćahnyć“, rjekny Budyska měšćanska hłowa Alexander Ahrens (SPD). Mjez druhim móhło požadanje Žitawy wo titl kulturna stolica Europy tomu słužić, Łužicu zaso jako cyłk rozumić a zhromadnje za region a strukturnu změnu nowe a inowatiwne mysle wuwić.
Wyši měšćanosća runje tak witaja, zo po Zhorjelskim nětko tež Budyski wokrjes wotpohladuje towaršnosći Hospodarski region Łužica přistupić.
Krótkopowěsće (29.11.18)
Stabilne dźěłowe wiki
Budyšin. We wuchodnej Sakskej bě w nowembrje 17 842 bjedźěłnych, dwaceći mjenje hač w oktobrje a 1 578 mjenje hač loni w samsnym měsacu. Předstajejo aktualnu dźěłowičnu rozprawu skedźbni Ilona Winge-Paul, operatiwna jednaćelka Budyskeje dźěłoweje agentury, dźěłodawarjow dźensa na sezonowy pjenjez krótkodźěła dla, zo bychu w zymje pušćenjam zadźěwali.
Olympiada rušćiny zahajena
Aumund-Hammersbeck. Łužica je na 14. zwjazkowej olympiadźe ruskeje rěče sylnje zastupjena. Na wčera blisko Bremena zahajenym wurisanju zastupuje Saksku mjez druhim 17lětna Lejnjanka Tereza Kubicec, šulerka Kamjenskeho Lessingoweho gymnazija. Wšitcy třo wobdźělnicy Braniborskeje, Gustav Konzack, Isabel Möbus a Adam Ratica, su šulerjo Grabinskeho gymnazija.
Módroćišć kulturne herbstwo
Policija (28.11.18)
Žonam pjenjezy wulišćić spytali
Běła Woda. Njeznaći wobšudnicy su zawčerawšim popołdnju w Běłej Wodźe spytali, třom staršim žonam přez telefon pjenjezy wulišćić. W jednym padźe cuza žona rentnarce něšto wo strowotniskej nuzowej situaciji powědaše, w tamnymaj padomaj wudawaše so wona jako pozdatna wnučka, kotraž chcyła „wowku“ wo pjenjezy prosyć. Wšitke tři rentnarki w starobje 82 do 88 lět su pak prawje reagowali, telefonat přetorhnyli a policiju zazwonili.
Za adwentničku so přizjewić
Pola wobornikow a sportowcow
Pilnje wuknyli a so prócowali
Štwórty kurs serbšćiny města Wojerec so dźensa kónči
Wojerecy (AK/SN). Wot kónca awgusta je so dwaceći žonow a muži na štwórtym kursu serbšćiny we Wojerecach wobdźěliło. Pola bywšeje wučerki a wjelelětneje županki župy „Handrij Zejler“ Brigity Šramineje nawuknychu woni zakładne wopřijeća kaž tež rěčne wobroty a dóstachu dohlad do kultury, stawiznow a zakonjow Serbow. Z přepodaćom certifikatow so kurs dźensa wječor kónči.
„Chcu znajmjeńša zakładne znajomosće nawuknyć a ludźi serbsce witać a so z nimi rozžohnować chcyć“, měni Ina Züchner. 48lětna dźěła wot lońšeho jako managerka za kulturne a dźěćace młodźinske dźěło we Wojerowskej Kulturnej fabrice. W kursu zajimowaše so wona nimo rěče předewšěm za stawizny, kulturu a nabožinu Serbow. „Jako Kulturna fabrika smy dwurěčne zarjadnišćo. Serbšćina prosće k tomu słuša.“
Mjenje zajima za přesadźowanje
Hižo 23. króć je město Budyšin wčera namakanki přesadźować dało. Byrnjež zawěrno někotre hrabnjenčka pódla byli, bě tónraz poměrnje mało zajima mjez wopytowarjemi.
Budyšin (CK/SN). „K prěnjemu, k druhemu, k třećemu“ rěkaše wčera w delnim foyeru Budyskeje radnicy. Andreas Fröde, hewak wotrjadnik za wobchad w porjadowym zarjedźe měšćanskeho zarjadnistwa, měješe 23. raz obligatoriski hamor w ruce. „Z namakankami móhli hewak w běhu časa cyłu sportownju pjelnić“, Andreas Fröde rjekny.
Porjadne wuměnjenja wutworić
Pančicy-Kukow (SN/MWj). Při běrowowym twarjenju zarjadniskeho zwjazka Při Klóšterskej wodźe w Pančicach-Kukowje drje rozrisaja klětu problem, z kotrymž so tam hižo něhdźe pjeć lět zaběraja. Při wulkim dźělu woknow – dokładnje jedna so wo 25 – chcedźa wonkowne žaluzije připrawić, štož ma něhdźe 7 200 eurow płaćić. To je wjetšina zastupjerjow sobustawskich gmejnow Chrósćicy, Njebjelčicy, Pančicy-Kukow, Ralbicy-Róžant a Worklecy na swojim wčerawšim posedźenju wobzamknyła. Hižo wjacore razy bě předsyda zaměroweho zwjazka Měrko Domaška temu narěčał a na to skedźbnił, zo ma swojim sobudźěłaćerkam a sobudźěłaćerjam porjadne dźěłowe wuměnjenja zaručić. Předewšěm lětsa so tam žony a mužojo w běrowach njesmilnje poćachu. To ma so nětko změnić.
Wobydlerjow sobu zapřijeć
Budyšin (SN). Pod hesłom „Nowe puće w starych mustrach!?“ je wčera něhdźe 50 wobdźělnikow konferency wo demokratiji Budyskeho wokrjesa w krajnoradnym zarjedźe tuchwilne projekty a wuwića k spěchowanju demokratije a wobydlerskich rozmołwach rozjimało. „Dale a wjac ludźi žada sej prawo sobupostajowanja, při čimž su so strachi zarjadnistwow před zjawnym dialogom pomjeńšili“, wuswětli fachowy referent Budyskeho krajnoradneho zarjada a sobuorganizator fachoweje konferency Matthias Knaak.
Wjesnjanosta Wjazońčanskeje gmejny Jens Zeiler (CDU) rozłoži přitomnym swoje nazhonjenja lokalneho rozmołwneho projekta z młodźinskej přiradu a wobydlerskeho naprašowanja. Runje tak je so prof. dr. Udo Rudolph z Kamjeničanskeje Techniskeje uniwersity słowa jimał. W přednošku wuzběhny wón trěbnosć prewenciskeho managementa, zo móhli namocy, kriminaliće a ekstremizmej znapřećiwić.
Kaž wčerawša diskusija wujewi, so wobydlerske wobdźělenje radźi, su-li konkretne projekty dźěl žiwjenskeho ruma wobydlerjow.
