Cedlu zawostajić njedosaha
Běła Woda. Dokelž bě ze swojim awtom njewotpohladnje do druheho storčił a byrnjež jeno snadnu škodu načinił, ma 18lětny jězbny započatkar nětko mjerzanja z justicu. Wón bě při zaparkowanju na Fröbelowej do cuzeho awta załožił. Zawostajiwši na nim cedlu ze swojej adresu sej młody muž mysleše, zo je swoju winowatosć spjelnił. To pak je so mylił. Policija nětko pruwuje, hač jedna so wo ćeknjenje z městna njezboža. Lěpje by było policiju informować, na nju čakać a so z městna njewotsalić.
Budyšin (CK/SN). Wot měrca 2016 je Budyska agentura za dźěło 176 ćěkancam dźěłowe městno sposrědkowała. Při tym jedna so wo ludźi ze Syriskeje, Afghanistana, Pakistana a Eritreje. 132 z nich přistajichu předewzaća z gastronomije a hotelownistwa, z rjedźenskeho serwisa a z hladanskeho wobłuka. Někotři dźěłaja jako lěkarjo we Wojerecach a Zhorjelcu. 44 migrantow skutkuje nětko jako pomocnik. „Požadarjo azyla su naši přichodni dźěławi, tež hdyž to mnozy słyšeć nochcedźa“, rozłoži Thomas Berndt. Předewšěm pola młódšich hač 35 lět je zmysłapołne, jich za němske dźěłowe wiki kwalifikować, rjekny šef Budyskeje agentury za dźěło. Kaž wón měnješe, pak traje to něhdźe tři do pjeć lět.
Prjedy hač chór Lipa w jubilejnym lěće 2017 w Pančičansko-Kukowskej šulskej awli zaso zwučuje, běchu jeho čłonojo na hłownu wólbnu zhromadźiznu prošeni. Předsydka Franciska Zopic rozprawješe wo minjenym lěće, w kotrymž běše chór nimoměry aktiwny.
Loni mějachu Lipjenjo ze swojej dirigentku Jadwigu Kaulfürstowej 15 wustupow. Wjerški běchu druhi koncert „Lipa a přećeljo“ na kopatej połnej žurli w Haslowje, programaj w Choćebuzu a Budyšinje z dalšimi chórami k 25. róčnicy znowazałoženja Zwjazka serbskich spěwarskich towarstwow a wulkoprojekt „Serbski rekwiem“, kotryž su zhromadnje ze solistami a z Drježdźanskim orchestrom Sinfonietta pod nawodom Judith Kubicec w Chróšćanskej cyrkwi přednjesli. Tójšto připosłucharjow móžachu na nalětnim koncerće na zahrodźe klóštra Marijineje hwězdy a na tradicionalnym hodownym nyšporje w Róžeńće witać. W běhu lěta su so cyłkej tři spěwarki přidružili, tak zo ma tuchwilu 55 aktiwnych spěwarjow a spěwarkow.
Z porynskim humorom wón žiwjenje zmištruje. „Tón je mi hižo často pomhał“, měni Smjerdźečan Eduard Luhmann. Wot spočatka noweho lěta je 71lětny wuměnkar w pjeć gmejnach zarjadniskeho zwjazka Při Klóšterskej wodźe čestnohamtski změrc (Friedensrichter).
Změrc posrědkuje w padach kaženja domjaceho měra, wobškodźenja wěcow, křiwdźenja a wohroženja. Wěcownje, neutralnje a bjez předsudkow wón wustupuje. Wujednać a nic pak sudźić rěka zasada jeho dźěła. Zwjetša jedna so wo pady, w kotrychž chcetej wobdźělenej stronje radu změrca a nic hnydom jednanje, kotrež měło k wujednanju wjesć.
Najprjedy chce so Eduard Luhmann intensiwnje do swojeje noweje zamołwitosće zadźěłać a so prawidłownje na dalekubłanjach sakskeho zwjazka změrcow wobdźěleć. „Chcu wot nazhonitych změrcow wjele nawuknyć“, 71lětny wuswětla. Wažne su jemu fairnosć, česćownosć, přistojnosć a respekt, při čimž měli jemu jeho powšitkowne kubłanje a žiwjenske nazhonjenja pomhać.
Drježdźany (dpa/SN). Problematiskeho wjelka w Zhorjelskim wokrjesu smědźa nětko zatřělić. Tole wobkrući wčera sakske wobswětowe ministerstwo w Drježdźanach. Stajnje zaso je dwulětne zwěrjo w sydlišćach ludźi za cyrobu pytało. „Napadneho zadźerženja dla hrozy strach eskalacije. Wěstota čłowjeka je tule wažniša hač škit družin“, rěka w zdźělence ministerstwa. Zhorjelski krajnoradny zarjad chce nětko hajnika postajić, kiž ma wjelka zatřělić.
Po informacijach wobswětoweho ministerstwa su fachowcy identitu wjelka z pomocu genetiskich přepytowanjow zwěsćili. Tak pochadźa wón z pólskeje črjódy Ruszów, kotraž ma swój teritorij bjezposrědnje při mjezy k Sakskej. Kaž pólscy wědomostnicy zdźělichu, bu wjelk jako šćenjo wot čłowjeka picowany.
Dotal su w Sakskej dwaj wjelkaj zesparnili. Jednoho zatřělić pak njebě dowolene.
Po informacijach kontaktneho běrowa „Wjelki w Sakskej“ maja w swobodnym staće tuchwilu 15 črjódow, tři poriki a jedyn jednotliwy wjelk swoju domiznu.
Pytaja kandidatow
Sprjewiny Doł. Hač do spočatka februara móža zajimcy kandidaturu za wólby wjesnjanosty gmejny Sprjewiny Doł přizjewić. Po informacijach statistiskeho zarjada so dotal nichtó přizjewił njeje. Wólby budu 5. měrca. Njedyrbjał-li nichtó kandidować, dotalny wjesnjanosta Manfred Heine (njestronjan) hišće raz nastupi. Mjenje hač 2 000 wobydlerjow dla pak budźe zastojnstwo čestnohamtske.
Ptaču gripu zwěsćili
Zhorjelc. Pola mortweho kołpja w Zgorzelecu su wirus ptačeje gripy H5N8 zwěsćili. Tohodla su tež wjacore dźěle města Zhorjelca jako wěstotne pasmo postajili, zdźěla tamniši krajnoradny zarjad. Wěstotne pasmo, z kotrehož njesmě nichtó ptački, mjaso a jeja wuwožować, je nětko na 21 dnjow postajene.
Serbske reje wožiwić
Lipsk. Čłonojo towarstwa Serbska reja zetkachu so wčera w Lipsku ze zastupjerjom towarstwa Serbska ludowa hudźba Měrkom Šołtu. Rěčeli su wo serbskej rejowanskej kulturje a nowych idejach, kak móhli serbske reje wožiwić a je ludźom zbližić. Tak přihotuje towarstwo Serbska reja workshop, kotryž budźe 1. apryla w Choćebuzu.