Město Wojerecy zapołoži prěni wobydlerski etat. W nim zjimaja lětnu pawšalu Swobodneho stata Sakskeje we wobjimje 70 000 eurow za lěta 2018 do 2020.
Wojerecy (AK/SN). Lětušu a klětušu sumu, dohromady 140 000 eurow, chcedźa 2019 wudać. Zbywace 70 000 eurow ma potom za dwě lěće k dispoziciji być. To je Wojerowska měšćanska rada wčera na swojim posedźenju jednohłósnje wobzamknyła.
Nastupajo wobydlerski etat prócuja so wo diferencowanje mjez jadrowym městom Wojerecami a měšćanskimi dźělemi Ćiskom, Brětnju-Michałkami, Čornym Chołmcom, Němcami a Hórnikecami. Kóždemu měšćanskemu dźělej chcedźa na lěto 4 000 eurow z noweho pjenježneho hornca přewostajić. Za jadro Wojerec ze starym a nowym městom ma to lětnje 50 000 eurow być.