Konjecy (aha/SN). Hóstna stwa Konječanskeho towarstwoweho domu bě wobsadźena, jako witaše tam nawoda wohnjoweje wobory Šunow-Konjecy, wyši hašenski mišter Silvio Čórlich, minjeny pjatk kameradow na lětnu hłownu zhromadźiznu. Zhladujo na minjene lěto, jako swjećeše wobora 75. róčnicu załoženja, naliči Čórlich aktiwity wobornikow, wukonjane w dohromady 1 380 słužbnych hodźinach. Cyłkownje ma tamniša wobora 34 čłonow w přerěznej starobje 37 lět. 26 z nich wukonja aktiwnu słužbu, mjez nimi jedna žona.

Šěsć razow su kameradow delanskeje wobory loni alarmowali, z toho trójce k hašenju wohenja. Wulke wužadanje bě zasadźenje po njewjedrje 26. junija, jako bě pomoc wo­bornikow jara prašana. Nimo toho dyrbjachu Klóštersku wodu na kritiskich městnach w Konjecach a Šunowje kontrolować. K wjace hač sto zasadźenskim hodźinam dóńdźe nimo toho přez wobchadne njezbožo z dwěmaj zranjenymaj kónc nowembra. Dale skedźbni rozprawjer na dalekubłanja a zwu­čowanja kaž tež na hladanje techniki a wohnjowoborneho gratu.

Tójšto dochodow z błyskačow

wutora, 17. januara 2017 spisane wot:

Wokrjes statistiku wo wobchadnych přeńdźenjach wozjewił

Budyšin (SN/MWj). Stacionarny spěšnosć měrjacy nastroj při statnej dróze S 100 w Pančicach-Kukowje je jedyn z najwunošnišich błyskačow Budyskeho wo­krjesa. Tole wuchadźa ze statistiki, kotruž je krajnoradny zarjad dźensa wozjewił. Po njej su loni w Pančicach-Kukowje 5 346 jězdźidłow błysknyli, štož wunjese wokrjesej 104 000 eurow. „Najpilniši“ błyskač wokrjesa pak steji při zwjazkowej dróze B 6 w Błócanach (Plotzen). Tam su loni­ 10 312 přespěšnych šoferow błysknyli a dohromady 206 500 eurow kasě­rowali. Na druhim městnje steji připrawa w Póckowach ze 7 220 lepjenymi přeńdźenjemi a 137 500 eurami pokutneho pjenjeza. Błyskač w Chelnje je po informacijach wokrjesa 2 636 razow wuspěšnje dźěłał a wokrjesej 45 000 eurow dochodow wunjesł, tón w Hodźiju je 3 590 razow błysknył (58 000 eurow) a nastroj w Mučowje 3 280 razow (50 000 eurow).

Policija (17.01.17)

wutora, 17. januara 2017 spisane wot:

Pěšk policistam pomhał

Zhorjelc. Z pomocu kuražěrowaneho pěška je policija minjenu sobotu wječor w Zhorjelcu zasudźeneho młodeho muža zajała. Zastojnicy policajskeho rewěra zwěsćichu 21lětneho w nutřkownym měsće. Wuhladawši policistow wón ćekny. Sudnistwo bě jeho mjenujcy hižo w nowembru ke chłostanju poł lěta młodźinskeho jastwa zasudźiło. Te pak prosće nastupił njeje. Jako młody muž před policistami ćěkaše, njeznaty pasant do akcije zapřimny. Wón do ćěkaceho storči, tak zo so tón zakopny a do sćěny domskeho dyri. Tam jeho policisća dosa­hnychu. Ze zběhnjenym palcom pěšk signalizowaše, zo je wšitko w porjadku a so na to wotsali. Policisća so njeznatemu pomocnikej za jeho wobhladniwe jednanje dźakuja. 21lětneho pak dowjezechu do jastwa, hdźež dyrbi nětko swoje chłostanje wotsedźeć.

Drježdźanska band Soulmama & friends bě minjenu sobotu z hosćom w Chróšćanskej putniskej hospodźe. Něhdźe dwaceći připosłucharjow dožiwi tam akustiske pućowanje skupiny z gitaru, huslemi a spěwom. Paleta hudźbnych směrow sahaše wot bigband soul a modern gospel přez pop a rock hač k stilam american folk, blues a country. Foto: Feliks Haza

Nadawk njepřewozmje

póndźela, 16. januara 2017 spisane wot:
W přinošku SN „Prawy puć namakać je ćežko“ z 10. januara bě čitać, zo budźe so knjeni Hańža Bjeńšowa wo organizo­wanje a planowanje organistow za Róžeńčansku cyrkej starać. Tomu tak njeje. Konječanka njeje ženje prajiła, zo tajki nadawk přewozmje. SN

Krótkopowěsće (16.01.17)

póndźela, 16. januara 2017 spisane wot:

Za atraktiwne wjesne žra

Drježdźany. Sakske statne ministerstwo za wobswět a ratarstwo je dźensa druhu namołwu programa „witalne wjesne žra a srjedźišća“ zahajiło. Tak móža­ gmejny nětko zaso wo spěchowanske srědki prosyć. Zaměr je wjesne kónčiny zesylnić. Tak móža próstwarjo srědki za saněrowanje abo wottorhanje twarjenjow runje tak zasadźić kaž za wutworjenje atraktiwnych wjesnych žrow.

Wo reformje rěčeli

Podstupim. Braniborski ministerski prezident Dietmar Woidke (SPD) je dźensa w Podstupimje z kritikarjemi dwělomneje wokrjesneje reformy rěčał. Tež Choćebuski wyši měšćanosta Holger Kelch (CDU) reformu kategorisce wotpokazuje. W běhu zetkanja wšak njeje k žanomu rozrisanju dóšło.

Industrija z dobytkom

Kamjenc. Sakske industrijne přede­wzaća su loni po předležacej bilancy dobytk­ nadźěłali. Tole wozjewi dźensa krajny statistiski zarjad ze sydłom w Kamjencu. Tak je cyłkowny wobrot wot januara do oktobra wo 0,9 procentow na 47,7 miliardow eurow rozrostł. Produkcija jězdźidłow a jězdźidłowych dźělow pak registrowaše wulke straty.

Policija (16.01.17)

póndźela, 16. januara 2017 spisane wot:

Woheń z bydlenja sapał

Wojerecy. Wšo druhe hač měrne zymske dopołdnjo mějachu wčera wohnjowi wobornicy we Wojerecach. Tam bě něhdźe w 10.30 hodź. w jědnaćeposchodowym wysokodomje na Virchowowej woheń wudyrił. Płomjenja sapachu z bydlenja na sedmym poschodźe. 40lětny woby­dler w tym času doma njebě. Ze susodneho bydlenja dyrbjachu 82lětnu woby­dlerku ewakuować. Balkon palaceho so bydlenja docpěchu wobornicy z wjerćitym rěblom. Krótko do 11.30 hodź. běchu płomjenja zhašane. Nimo Wojerowskeje powołanskeje wobory běchu dobrowólni wobornicy z Kinajchta, Němcow a Michałkow zasadźeni. Přičina wohenja dotal znata njeje. Wohnjowoborny fachowc je wčera móžne slědy přepytował. Přećiwo 40lětnemu wobydlerjej zahajichu jednanje lochkomyslneho zapalerstwa dla. Swoje bydlenje wšak wón najprjedy raz wužiwać njemóže. Načinjenu wěcnu škodu trochuja na 10 000 eurow. Na zbožo so při wohenju a hašenju nichtó zranił njeje.

Do šule pohladnyć

póndźela, 16. januara 2017 spisane wot:

Ralbicy. Dźeń wotewrjenych duri změja jutře, wutoru, na Serbskej wyši šuli Ralbicy. Wot 17 do 19 hodź. móža sej starši a dalši zajimcy šulu wobhladać a šulerjo pokazaja, što su we wšelakich předmjetach nawuknyli. We 18 hodź. wotměje so informaciske zarjadowanje za staršich šulerjow přichodneho 5. lětnika. Wučerjo a chowancy Ralbičanskeho kubłanišća wjesela so na bohaty wopyt.

Přesadźuja awto

Grodk. Wosobowe awto zjawnje přesadźować chce město Grodk wutoru, 31. januara, w 14 hodź. na terenje měšćanskeho zawoda na Drjowkowskej dróze 7a. Jedna so wo zeleny VW Polo. Jězdźidłowe papjery, kluč kaž tež wopismo wo hłownym přepytowanju (TÜV) předleža. Minimalny poskitk měł 200 eurow wučinjeć. Štóž najwjace poskići, ma awto hnydom z pjenjezami zapłaćić. Mjenowany dźeń móža sej zajimcy awto hižo wot 13 hodź. wobhladać.

Přihotuja ponowjenje twarjenja

pjatk, 13. januara 2017 spisane wot:
Jan Friedl und Jens Pannasch (wotprawa) z drjewotwarskeje firmy Rösch z Dźěwina (Groß Düben) staj tele dny započałoj, ponowjenje Wile Schönblick w Mužakowskim kupanskim parku přihotować. Za to staj drjewjane wobhrodźenja wotšrubowałoj, zo njeby so zdźěla hišće dosć derje zdźeržana historiska balkonowa konstrukcija wobškodźiła, hdyž dźěłaćerjo twarskich firmow přichodny čas nutřkowny dźěl twarjenja­ a fasadu ponowja. Foto: Joachim Rjela

Krótkopowěsće (13.01.17)

pjatk, 13. januara 2017 spisane wot:

Mjenje wopytowarjow přišło

Drježdźany. Lěta 2016 je mjenje wopytowarjow do sakskich muzejow přišło. Statne wuměłske zběrki Drježdźany mějachu dźewjeć procentow mjenje hosći, Kamjeničanski statny muzej za archeologiju dwaceći procentow a Lipšćanski muzej tworjaceho wuměłstwa samo štwórćinu mjenje. To zdźěla sakske ministerstwo za wuměłstwo w Drježdźanach.

Wjace wukrajnikow w Čěskej

Praha. Po wuličenju Čěskeho statistiskeho zarjada přebywa w Čěskej republice tuchwilu telko wukrajnikow kaž hišće ženje. W nowembru 2016 bě jich 495 000 wosobow (4,5 procentow wobydlerstwa kraja). Mjez nimi přewažuja Słowacy, Ukrainjenjo a Vietnamjenjo. Najwjetši podźěl cuzych statnych přisłušnikow zwěsćichu w Praze (14 procentow), najmjeńši we wokrjesu Opava (jedyn procent).

LEAG wostanje sponsor FCE

Serbska debata

nowostki LND