Znajemy swoju domiznu?

srjeda, 22. julija 2015 spisane wot:

Na swojim tradicionalnym połdnjowskim kubłanskim wulěće poby Domowinska skupina „Budyšin město“ lětsa w Njebjelčicach a Kamjencu.

Hižo před lětami běchmy w Njebjelčicach serbskeho wuměłca Jana Buka wopytali a sej čistu, rjanu wjes wobhladali. Lětsa dźěše nam wo nowu pěstowarnju a nowy pomnik. Hibićiwy wjesnjanosta Tomaš Čornak nas w pěstowarni přećelnje powita a ju nam zhromadnje z wjednicu knjeni Hejdušcynej po­kaza. Je to wulkomyslny twar ze škleńcy a drjewa, z rjanym dworom a krasnej zahrodu. Zo so dźěćom w nowym přebywanišću lubi, bě widźeć a słyšeć. Ze zapalom zanje­sechu nam wone spěwčk ze serbskimi a němskimi štučkami.

Hnujacy je pomnik za nućenych dźěłaćerjow, kotřiž dyrbjachu za čas Druheje swětoweje wójny w Němskej dźěłać. Gerat­ Korjeńk rozłoži nam zrudny dóńt nućeneje dźěłaćerki Nadje. Sylza ze zornowca połoženje wbohich zawlečenych přeswědčiwje rysuje.

Swójbam wotewrjeni być

srjeda, 22. julija 2015 spisane wot:

Radwor (SN/MkWj). Młodym swójbam, kotřiž chcedźa w Radworju twarić, chcedźa tole přichodnje tež zmóžnić. To bě jedna z diskusijnych temow wčerawšeho posedźenja gmejnskeje rady. Radźićel Tomaš­ Rječka z Kamjeneje rozprawješe wo wjacorych naprašowanjach zajimcow. Dokelž pak gmejna ani swójske ležownosće ani plan wužiwanja płonin nima, chcedźa w kóždym jednotliwym padźe za rozrisanjemi pytać, kaž wjesnjanosta Wincenc Baberška (CDU) připowědźi. Přiwšěm wón w tym zwisku před „euforiju“ warnowaše. Pječa pak maja někotrych wobydlerjow, kotřiž bychu ležownosće priwatnje předać chcyli.

Wustupiła je gmejna Radwor z wčerawšim dnjom ze sakskeho komunalneho zaměroweho zwjazka za předźěłanje informacijow KISA. Lěta 1990 załoženy zwjazk ma pjenježne problemy, kotrež mjeztym samo statne rěčnistwo pře­py­tuje. Gmejna zalutuje sej nětko kóžde lěto přinošk 3 800 eurow.

Towarstwo ma dalšej čłonce

srjeda, 22. julija 2015 spisane wot:

Nowe informaciske łopjeno Serbskeho kulturneho turizma wušło

Slepo (SN/mwe). Prawidłownje wudawa towarstwo Serbski kulturny turizm, kotrehož sydło je w Slepom, swojim čłonam kaž tež dalšim zajimcam informaciske łopjeno „newsletter“. W najnowšim wudaću steji, zo je ministerstwo za wědomosć, slědźenje a wuměłstwo Kraja Braniborskeje swoje internetne strony wo Łužiskich Serbach znowa předźěłało a aktualizowało. Zajimcy móža so tuž nětko hišće wobšěrnišo wobhonić mjez druhim wo rěči, stawiznach, sydlenskim rumje, kubłanju, medijach, adresatach a institucijach. Pod hesłom „Sorben/Wenden in Brandenburg – Serbja w Braniborskej“ podawaja wězo tež informa­cije a adresy k Serbam w Sakskej.

W aktualnym „newsletteru“ informuja čłonow Serbskeho kulturneho turizma kaž Budyska Serbska kulturna informa­cija, Choćebuska Lodka, Dešnjanski domizniski muzej a Slepjanski Serbski kulturny­ centrum, ale tež hosćencarjo a dalši wo tym, zo poskića nowina Lausitzer Rundschau w swojim dowolowym portalu pućowanske tematiske tury za pěškow a kolesowarjow.

40 dźěći a młodostnych němskeje narodneje mjeńšiny z pólskeho Opola a wokoliny přebywa tuchwilu ze swojimi přewodźerjemi w Budyšinje. Na próstwu je z nimi Rěčny centrum WITAJ wčera „serbski dźeń“ organizował. Projektowa nawodnica RCW Michaela­ Hrjehorjowa bě za nich wopyt w serbskich institucijach, kaž w Smolerjec kniharni, wotrěčała. Foto: Axel Arlt

Chcedźa skónčnje twarić započeć

srjeda, 22. julija 2015 spisane wot:

Hladanska słužba advita je Njeswačanskej gmejnje před štyrjomi lětami zawrjenu­ šulu wotkupiła, zo by ju na dom­ z bydlenjemi z wobstajnym hladanjom přetwariła.

Njeswačidło (SN/mwe). Poprawom chcyše advita přetwarjenu Njeswačansku šulu jako hladanski domicil lětsa přepo­dać. Kaž jednaćel hladanskeje słužby z hłownym sydłom w Berlinje, dr. med. dipl.-psych. Matthias Faensen, Serbskim Nowinam zdźěli, je advita hakle nětko twarsku dowolnosć dóstała. „Z dowolnosću je so dlijiło, dokelž měješe pomni­koškit znapřećiwjenja“, Faensen rjekny. Te wšak wopokazachu so jako njewažne a hodźachu so spěšnje a ze skromnymi naprawami rozrisać. „Tak smy wjele drohotneho časa zhubili. Runje nětko dyr­bimy hišće jedne dobrozdaće za kóšty pomnikoškitej předpołožić“, Faensen doda.­ W nim ma advita wobkrućić, zo w něhdyšej a hižo njewužiwanej Njeswačanskej šuli žane wot wotemrěća wohrožene zwěrjata žiwe njejsu a zo tam žane ptački njehnězdźa. „Hdyž budźe tež to wotbyte, móžemy z twarom nadźijomnje skónčnje započeć. Z našeje strony bychmy to hižo před měsacami móhli“, jednaćel advita­ podšmórny.

Serbske kemše a Bjesada chwalobne

srjeda, 22. julija 2015 spisane wot:

Gmejna Hodźij a mjeno jeje wjesnja­nosty Petera Beera (Swobodni wolerjo) běštej z popřewrótowym wuwićom komu­ny njedźělomnje zwjazanej. To pak so nětko změni, hdyž Peter Beer po 25 lětach zastojnstwo młódšemu přewostaji. Marian Wjeńka je so z nim wo tymle času rozmołwjał.

Z kelko płakacym a kelko so smějacym wóčkom z Hodźijskeho gmejnskeho zarjadnistwa woteńdźeće?

P. Beer: Pobrachować budźe mi přećelska zhromadnosć w zarjadnistwje ze sobudźěłaćerjemi runje tak kaž z wobydlerjemi, kotřiž su tule swoje naležnosće přednjesli. Pobrachować pak budu mi tež zajimawe rozmołwy z wuměnkarjemi, hdyž sym jich k narodninam wopytał. Słódne snědanje při tychle składnosćach wostanu mi w pomjatku. Ze smějacym wóčkom pak wotedam zamołwitosć předewšěm za te temy, za kotrež scyła zamołwity njeběch, štož pak je so mi dru­hdy z njewědy, druhdy pak tež jednorosće dla přibasniło.

Što wobhladujeće wosobinsce jako wjerški swojeho 25lětneho słužbneho časa?

Krótkopowěsće (21.07.15)

wutora, 21. julija 2015 spisane wot:

Vattenfall hłubšo w minusu

Stockholm. Šwedski energijowy koncern Vattenfall bědźi so dale z wuskutkami energijoweje změny. Wobšěrne wot­pi­sanja běchu hłowna přičina, zo je předewzaće w druhim kwartalu čerwjene ličby pisało. Pod smužku dyrbješe wone stratu 3,1 miliardy eurow wupokazać. Šef Vattenfalla Magnus Hall rěčeše w Stockholmje wo „jara negatiwnym wuwiću“.

Přiwuzni roznjemdrjeni

Haltern. Po znjezboženju lětadła předewzaća Germanwings ze 150 woporami su so starši a přiwuzni smjertnje znje­zboženych šulerjow a wučerjow z Halterna z raznym listom na šefa Lufthansy Carstena Spohra roznjemdrili. Tak jemu wumjetuja, zo njeje so dotal ze žarowacymi přiwuznymi skontaktował a zo njebě tež na pohrjebje šulerjow. Poskićene wotnamakanje maja woni za „ranjace“.

Sto milionow za Müllera?

Manchester/Mnichow. Koparski klub Manchester United poskića po infor­macijach medijow hač do sto milionow eurow za Thomasa Müllera, koparja FC Bayerna Mnichow. Trenar Louis van Gaal pak to dotal njewobkrući. Müller ma pola Bayerow zrěčenje hač do lěta 2019.

Policija (21.07.15)

wutora, 21. julija 2015 spisane wot:

Słona Boršć. W Słonej Boršći je wčera popołdnju 72lětna wodźerka Opela z Wjesneje na Handrija Zejlerjowu zajěła, zo by křižowanišćo přeprěčiła. Při tym zrazy do VWja, kotryž měješe předjězbu. Wotmacha zražki dla so Opel přećisny. 72lětna a sobujěduca so při njezbožu ćežko zraništej, 34lětna šoferka Golfa poćerpje lochke zranjenja.

Budyšin. Policija pyta paduchow, kotřiž su ludźom w Budyšinje ec-kartki z móšnjow kradnyli a z nimi při awtomatach dohromady 3 800 eurow wot­zběhnyli, a to wot decembra 2014 hač do lětušeho měrca. Njeskutki stachu so předewšěm w kupnicach a na parkowanišćach.

Na swójbny swjedźeń

wutora, 21. julija 2015 spisane wot:
Wojerecy (SN). Na Wojerowskej dźěćacej a młodźinskej farmje knježi tež w lětnich prózdninach wšědnje čiłe žiwjenje. Zajutřišim, 23. julija, pak budźe tam wosebity dźeń. Nimo holcow a hólcow, kotřiž prawidłownje na farmu přichadźeja, su tež dowolnicy a dnjowi turisća łužiskeje jězoriny na swójbny swjedźeń přeprošeni. W času wot 10 do 13 hodź. čaka na wšitkich pod hesłom „Dźěći – kulinariske dobroty – kultura“ tójšto překwapjenkow, mjez druhim z Pančičanskeho zeloweho a zežiwjenskeho centruma.

Heiko Harig wjetu přěhrał

wutora, 21. julija 2015 spisane wot:

Sulšecy (UH/SN). Minjeny kónc tydźenja wotměchu Sulšečenjo swój 19. wjesny swjedźeń. Wjeršk bě njedźelny program, kotryž je wjace hač 400 wopytowarjow tež z wokolnych wsow a z bliskeho Kulowa dožiwiło. Organizatorojo swjedźenja wokoło wjesneho předstejićela Jurja Brösana­ běchu so z moderatorom programa Heikom Harigom wo to sadźili, zo přijědźe znajmjeńša 28 ludźi z někajkim wozydłom z NDRskeho časa spon­tanje na swjedźenišćo. Na kóncu bě jich wjace tajkich mopedow a motorskich hač wu­činjene. Harig wjetu přěhra a dyrbješe tuž dobyćerjam fasku limonady kupić.

Hižo pjatk přewjedźechu na swjedźenišću tradicionalne wubědźowanje wohnjowych woborow z hašenjom, na čimž so jědnaće mustwow wobdźěli. Najlěpši běchu Mučowčenjo (Maukendorfer) před Salowčanami a Sulšečanami.

słowo lěta 2022

nawěšk

nowostki LND