Kreditaj dale wotpłaćeć

pjatk, 14. decembera 2018
artikl hódnoćić
(0 )

Chróšćanska gmejnska rada wčera dołh a twarske nadawki rozjimała

Hórki (aha/SN). K swojej poslednjej zhromadźiznje lěta 2018 zetkachu so radźićeljo Chróšćanskeje gmejny wčera w Hórkach. Zaběrajo so z kreditowym zrěčenjom, hdźež lětsa časowe wjazanje na dań wotběži, rozłoži wjesnjanosta Marko Kliman (CDU) pozadki.

Tuchwilu ma gmejna kreditaj za přetwar bywšeje konsumoweje předawarnje na gmejnski zarjad a dale za přetwar zaměroweje hale we wobjimje nimale štwórć miliona eurow wotpłaćić. Kóždolětnje bě trjeba, za wotpłaćenje a za 3,7 procentowsku dań w hospodarskim planje 30 000 eurow za to zaplanować. Dokelž nětko po dźesać lětach wjazanska winowatosć ze Sakskej natwarnej banku (SAB) wotběži, wužiwa gmejna składnosć, dóstać poskitk k lěpšim kondicijam. Radźićeljo mějachu so rozsudźić, hač ma lětna wotpłaćowanska rata jenož 15 000 eurow, dalšej wyšej namjetowanej móžnosći abo kaž dotal 30 000 eurow być. Rozsudźichu so za to, wotpłaćić dołh po ratach 17 000 eurow pola Němskeje kreditoweje banki (DKB) Drježdźany. Tam wučinja dań w lěće 2021 snadne 0,17 procentow a so hač do zakónčenja wjazanskeho časa jeničce na 0,89 pro­centow stopnjuje.

Dale rozjimachu radźićeljo wčera přepo­daće poslednjeju nadawkow za přetwar bywšeje srjedźneje šule na gmejnske a kulturne srjedźišćo. Architekt Marko Dźisławk rozłoži, zo stej za trěb­ny twar lifta po wobmjezowanym wupisanju dwaj poskitkaj dóšłoj. Hačrunjež bě lěpši poskitk Budyskeje firmy Berndt we wobjimje 16 991 eurow wo šěsć procentow nad kalkulaciju, dokelž pak po dokładnym pruwowanju žane formalne zmylki wotwidźeć njeběchu, Chróšćanscy radźićeljo tomu přihłosowachu.

Kónčne rjedźenske dźěła po přetwarje přewostaja Budyskej posłužbowej firmje Rm TV za poskitk 1 530 eurow. Mjeztym zo su tuchwilu wšitke dźěła hrubje zakónčene, budu w nowym lěće hišće kachlicy a špundowanja kładźene. Marko Dźisławk hódnoćeše zhromadne dźěło z firmami jako spomóžne. Časowy plan móža dodźeržeć a projekt klětu w měrcu za wužiwanje přepodać.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND