Krótkopowěsće (23.07.18)
Hudźbne lěćo zahajene
Budyšin. Z koncertom „Nadźija wěčnje. Wěčnje!“ z Drježdźanskim komornym orchestrom Sinfonietta w Budyskej tachantskej cyrkwi su pjatk wječor lětuše hudźbne lěćo zahajili. Z koncertom su so lětušej róčnicy 1000 lět Budyski měr wěnowali. Hač do 5. awgusta steji cyłkownje 15 zarjadowanjow ze 180 sobuskutkowacymi na programje, mjez kotrymiž su tež wjacori serbscy wuměłcy.
Na Brigittu Reimann spominali
Wojerecy. Na 85. posmjertne narodniny Brigitty Reimann je Wojerowske wuměłstwowe towarstwo sobotu spominało. Předstajili su nowej publikaciji. „Post vom schwarzen Schaf“ je kniha, w kotrejž su listy z jeje sotru a bratromaj wozjewjene, „Ich möchte so gern ein Held sein“ wěnuje so listowanju z awtorom Wolfgangom Schreyerom. Brigitte Reimann je wot 1960 do 1968 we Wojerecach skutkowała.
Testuja přidatne naprawy
Policija (20.07.18)
Štó je na kocora třělał?
Chróst. Wobsedźerka kocora w Chrósće pola Wulkeje Dubrawy je kónc junija swojeho lubuška ćežko zranjeneho wuhladała. Skótny lěkar zwěsći, zo bě něchtó po wšěm zdaću z powětrowku na njeho třělał. Z operaciju dyrbješe lěkar kocorej projektil wotstronić. Mjeztym so Maxlej zaso lěpje dźe. Kriminalna policija pad přepytuje a pyta swědkow. Štóž wě, štó je na kocora třělał, abo štóž je to snano samo wobkedźbował, njech so pola policije přizjewi. Nimo toho pyta policija informacije, hač su so w Chrósće a wokolinje minjeny čas podobne pady stali. Pokiwy přijimuja na Budyskim policajskim rewěrje pod telefonowym čisłom 0 35 91 / 35 60.
Wuhódanje dowoloweje křižowki
Tež wosrjedź prózdnin je tójšto ludźi našu dowolowu křižowku wuhódało a nam prawu wotmołwu „Lěćo je tak lubozne“ připósłało. Redakciska fortuna měješe tuž zaso raz njelochki nadawk, z wulkeho mnóstwa dopisow a mejlkow mjena dobyćerjow wućahnyć.
Zastupnej lisćikaj za koncert Rolanda Kaisera 31. awgusta na Kamjenskej Pastwinej horje doby Angela Šołćina z Prawoćic. Nad swójbnym zastupnym lisćikom za Małowjelkowski prazwěrjenc smě so swójba Pólkec z Budyšina wjeselić. A zastupny lisćik za Budyske kino dóstanu Bernd Kretschmar z Budyšina, Pětr Suchy z Chrósćic, Jurij Nuk z Budyšina, Hans-Eberhard Kaulfürst ze Załomja a Lenka Zopina z Haja. Wšitkim dobyćerjam přejemy wjele zboža a wjele wjesela.
Nowe jězdźidło Konječanam
Awtomatizmej w nastajenju hospodarskeho plana zadźěwać
Ralbicy (SN/JaW). Gmejnska rada Ralbicy-Róžant je swój lětuši hospodarski plan wobzamknyła. W nim zakótwjene su předewzaća komuny, kaž mjez druhim ponowjenje Jitkowskeje dróhi w Ralbicach a tamniše nowe hrajkanišćo. W zwisku z hrajkanišćom, kotrež su hakle njedawno zjawnosći přepodali, wupraji wjesnjanosta Hubertus Ryćer (CDU) staršim, nošerjej kubłanišća a wšitkim dalšim pomocnikam a podpěraćelam dźak za dźěło, kotrež běchu wukonjeli. „Ze swojim zasadźenjom su zaměrnje k mjeńšemu financnemu podźělej gmejny přinošowali“, Ryćer wuzběhny. Tak su wšitcy něšto wjac hač 20 000 eurow nadźěłali.
Diversity Festival pola Frizow
Budyšin. Pod hesłom „Terp of Tales“ přeproša Młodźina europskich narodnych mjeńšin wšitkich młodostnych w starobje 16 do 30 lět wot 5. do 12. awgusta do friziskeje wsy Grou w Nižozemskej. Zhromadnje chcedźa so tam wo bajkach a legendach mjeńšin wuměnjeć a je w kreatiwnych dźěłarničkach fotografije a dźiwadła kaž tež do projektneho chóra zapřijeć. Swójski přinošk za jězbu wučinja 80 eurow. Wšitcy, kotřiž maja lóšt zeznać młodostnych z cyłeje Europy a dožiwić tydźeń połny zajimawych wulětow, so njech přizjewja pola Serbskeho młodźinskeho towarstwa Pawk přez Facebook abo e-mailnje pod adresu .
Pytaja namjety za skupiny
Po slědach křižerjow do Radworja
Wuměłske rjemjesło před hrodom
Njeswačanski barokny hród skići w běhu lěta za najwšelakoriše zarjadowanja wulkotnu kulisu. Jutře a njedźelu steji teren před bywšej lětnjej rezidencu za čas Awgusta Sylneho cyle w znamjenju wuměłskeho rjemjesła.
Njeswačidło (SN). Mjeztym třeći raz wuhotuje agentura MARKT-WERT z durinskeho městačka Berga jutře a njedźelu w parku Njeswačanskeho barokneho hrodu wuměłske rjemjeslniske wiki. Sobotu wot 11 do 18 hodź. a zajutřišim wot 10 do 18 hodź. chce so tam wjace hač 60 wuměłcow a rjemjeslnikow z mnohich kónčin Němskeje předstajić. Mjez nimi budu zhotowjerjo debjenkow a drasty, košeplećerjo, knihiwjazarjo, rězbarjo, florisća, kłobukarjo, keramikarjo a mnozy dalši. Wjacori z nich w Njeswačidle hižo su, zo bychu swoje stejnišćo z wjele lubosću při- a wuhotowali.
