Policija (30.03.17)
Swoje koleso spóznała
Budyšin. Jako chcyše swoje koleso wróćene měć, bu zawčerawšim w Budyšinje 27lětna samodruha žona zranjena. Wona wuhlada je při płoće pěstowarnje na Paulijowej. Jako chcyše cuzy muž z nim wotjěć, žona jeho narěča. Tón pak 27lětnu storči, tak zo wona padny. Njeznaty so z kolesom zminy. Kriminalna policija pad pokradnjeneho kolesa nětko runje tak přepytuje kaž podawk před pěstowarnju.
Mysle do praweho směra
Drježdźanscy studenća projekt z klóšterskej pjekarnju předstajili
Kamjenc (JK/SN). Studenća Drježdźanskeje fachoweje wysokeje šule (FHD) zaběrachu so w studijne směry přesahowacym projekće z móžnosćemi, wožiwić a wužiwać prózdne wobchody w Kamjencu. Hižo loni běchu so naprašowali, što wobydlerjo w měsće nastupajo nakupowanje paruja a što sej přeja. Wuslědk bě, zo bychu w Lessingowym měsće rady měli zaso wobchod za wuběrane produkty (Feinkost). A po móžnosći měł so tón zwjazać z přijomnym přebytkom hnydom na městnje. Měšćenjo wuprajichu hižo dosć konkretne předstawy, kak móhło to wšo wupadać. Studenća su wčera w rumnosćach pódla předawarnje Pančičanskeje klóšterskeje pjekarnje na Budyskej dróze projekt předstajili.
Nowačkow w měsće z tobołu witaja
Runja druhim městam abo gmejnam so tež we Wojerecach nad kóždym nowym wobydlerjom wjesela. Tele swoje wjeselo tam nětko na wosebite wašnje zwuraznjeja.
Wojerecy (SN/MWj). Štóž wot přichodneho měsaca we Wojerecach swoju prěnju bydlensku adresu přizjewi, dóstanje we wobydlerskim zarjedźe tak mjenowanu postrownu tobołu, z kotrejž noweho wobydlerja w měsće witaja. Tak chcedźa pokazać, zo je kóždy nowy wobydler witany, rěka w nowinskim wozjewjenju měšćanskeho zarjadnistwa.
Zhorjelske stejnišćo wutwarja
Krajnoradny zarjad w Zhorjelcu chcedźa hač do lěta 2022 rozšěrić. Wokrjesny sejmik je wčera zasadnje tomu přihłosował, zo powjetša zarjadnistwo blisko Zhorjelskeho dwórnišća wo nimale 350 nowych dźěłowych městnow.
Zhorjelc (AnB/SN). Z 48 přihłosowanjemi a 19 hłosawzdaćemi su radźićeljo Zhorjelskemu wokrjesnemu zarjadnistwu nadawk dali, zo by wubědźowanske jednanje za milionowe předewzaće přewjedło a architekta zwěsćiło. Dale ma so po wupisanju planowanje do nadawka dać, zo bychu spušćomne ličby dóstali.
Žadaja sej cofnjenje naćiska
16 000 ludźi online-peticiju přećiwo wobmjezowanju serbšćiny podpisało
Choćebuz (HA/SN). Do šěrokeje fronty, kotraž wobara so přećiwo předwidźanym špatnišim wuměnjenjam za wučbu serbšćiny na braniborskich šulach, je so wčera tohorunja měšćanska rada Choćebuza zarjadowała. Wšitcy čłonojo přihłosowachu wobzamknjenju, kotrež bě zapodał wyši měšćanosta Holger Kelch (CDU), podpěrany wot třoch wuběrkow. Te běchu so hižo do toho z tematiku rozestajeli.
We wobzamknjenju napomina město Choćebuz braniborske ministerstwo za kubłanje, młodźinu a sport, swoje předewzaće cofnyć. Po planach ministerstwa měło přichodnje za wučbu serbšćiny w jednej skupinje znajmjeńša dwanaće wobdźělnikow być. To by na přikład jeno za město Choćebuz rěkało, zo je wučba serbšćiny na wšitkich sydom zakładnych a na jednej wyšej šuli wohrožena.
Wikowarjo štwórtk na Žitnych wikach
Z nowymi wustawkami chce město Budyšin swoje tydźenske wiki wožiwić. Nowosć je, zo přewjedu wiki sadu a zeleniny přichodnje štwórtk na Žitnych wikach. Planowane su w sprjewinym měsće tohorunja jutrowne wiki.
Budyšin (CK/SN). Zeleny štwórtk budu tak mjenowane zelene a měšane wiki w Budyšinje prěni raz na Žitnych wikach. To je měšćanska rada wčera rozsudźiła a tak lěta trajace prócowanja wo přepołoženje městnosće skónčiła.
Wiki pod Bohatej wěžu běchu sej předewšěm starši wobydlerjo přeli, dokelž jim historiske plesternaki před a za radnicu ćeže načinjeja. W škałbach mjez kamjenjemi je něchtóžkuli z rolatorom tčacy wostał a młode žony ze swojimi wysokimi črijemi. Wikowarjo nadźijeja so wjetšeho wobrota, dokelž so na Žitnych wikach wjacore puće pěškow křižuja. Nimo toho tule hłowny puć ze Zhorjelca do Drježdźan nimo wjedźe. Tak budu tež ći wopytowarjo města, kotřiž chcedźa do Centera na Žitnych wikach, na tydźenske wiki skedźbnjeni.
Krótkopowěsće (30.03.17)
Manfred Hermaš rozžohnowany
Zhorjelc. Zhorjelski wokrjesny sejmik je swojeho społnomócnjeneho za serbske naležnosće Manfreda Hermaša wčera oficialnje rozžohnował. Jeho angažowane skutkowanje hódnoćeše krajny rada Bernd Lange (CDU). Hermaš bě so wosebje za Slepjanskich Serbow zasadźał. Wěste financowanje Serbskeho kulturneho centruma Slepo je sobu jeho zasłužba. Naslědnika hišće nimaja.
Kriminalita přiběrała
Drježdźany. Kriminalita w Sakskej je loni porno lětu 2015 zaso přiběrała. Wosebje ličba namócnosćow a zadobywanjow je rozrostła, wuchadźa z wčera w Drježdźanach předstajeneje policajskeje kriminalneje statistiki. Loni zwěsćichu statistikarjo cyłkownje 324 736 přeńdźenjow, štož je 9 875 padow wjace hač w lěće 2015.
Na strachi wjelka dla skedźbnjeć
Podstupim. Na dźesać městnach w Braniborskej chcedźa ratarjo, wowčerjo, hajnicy a wobydlerjo jutře wječor na strachi wjelka dla skedźbnjeć. Akcija njeměri so přećiwo rubježnemu zwěrjeću, ma pak na problemy w zwisku z dźerženjom skotu na pastwach pokazać. Lěto wob lěto wjelk wjetše škody zawinuje.
Stara lokomotiwa zaso jězdźi
Z twarnišćom přińdu změny
Budyšin (SN/MWj). Po prěnim twarskim wotrězku na tak mjenowanej Hammerec horje wot wčerawšeho Budyske Schillerowe zelenišća tež mjez Dwórnišćowej a Seminarskej wutwarjeja. Tam kładu mjez druhim nowe roły za dalnoćopłotu a wodu kaž tež milinowe a datowe kable, zdźěli měšćanske zarjadnistwo w nowinskim wozjewjenju.
Něšto stow metrow dołhi puć, kotrehož parkowanske městna su tež mjez wopytowarjemi Němsko-Serbskeho ludoweho dźiwadła woblubowane, ma přichodnje wěsćiši być. To budźe na dobro šulerjow wobeju gymnazijow, hudźbneje šule a noweho powołanskošulskeho centruma. Tam płaći potom spěšnosć 30 km/h. Dotal křiwje k jězdni připrawjene parkowanske městna budu potom paralelnje k njej. Tak so jich ličba wot 47 na 24 pomjeńši. Za to natwarja na šulskim boku přidatny chódnik. Na křižowanišću na Seminarskej so chódnik rozšěri. Za awta wostanu Schillerowe zelenišća jednosměrowa dróha, kolesowarjo smědźa do wobeju bokow jězdźić.
Policija (29.03.17)
Mortwa žona w rěce
Budyšin. 26lětnu mortwu žonu su wčera ze Sprjewje w Budyšinje wućahnyli. Pasanća běchu připołdnju zdźělili, zo blisko spušćadła ćěło na wodźe płuwa. Wohnjowi wobornicy je na to z rěki wućahnychu. Přiwołany lěkar móžeše jenož hišće smjerć młodeje žony zwěsćić. Policija nětko pruwuje, kak je wona žiwjenje přisadźiła a hač so snano wo njeskutk jedna, zdźěli Zhorjelska policija.
Wjace hač 100 km/h spěšnišo
Njeznarowy. Najskerje słónčne nalětnje wjedro je póndźelu popołdnju motorskeho na zwjazkowej dróze B 6 w Njeznarowach (Eiserode) pola Lubija zawjedło, swojej mašinje tójšto wjace płuna dać. Při dowolenych 60 kilometrach na hodźinu błyskny jeho měrjenska připrawa, natwarjena pódla busoweho zastanišća z nahladnymi 173 km/h. Smalak změje nětko 680 eurow pokuty płaćić, dyrbi tři měsacy nóžkować a dóstanje nimo toho dwaj dypkaj w Flensburgu.
