Wulke nazymske rjedźenje w zwěrjencu
Wojerecy (AK/SN). Wulke mnóstwo lisća wodźěwaše łuku Wojerowskeho zwěrjenca. Heidemarie Brechling a dalši je hromadźe mjećechu a pjelnjachu z nim jednu karu po druhej. „Swoje cyłe žiwjenje sym ze zwěrjencom zwjazana“, rjekny 72lětna Wojerowčanka sobotu při nazymskim rjedźenju towarstwa přećelow zwěrjenca. Tři skupiny dachu so do dźěła: Jedna mjećeše lisćo, dalša wožeše pjeršć do klětki družiny zajacow z mjenom maras a třeća zamjetowaše dźěry a hrjebje w připrawje hrjebakow (Erdmännchen).
Policija (09.11.15)
Delnja Hórka. Njeměrny wječor mějachu wčera, njedźelu, wohnjowi wobornicy w Delnjej Hórce. Jich wołachu k njezbožu na zwjazkowej dróze B 156. Tam běštej něhdźe w 19 hodź. pućowanski bus a wosobowe awto nabóčnje do so zrazyłoj. Wobě jězdźidle drje so wobškodźištej, zranił so na zbožo nichtó njeje. Rumowanja a rjedźenja dla bě dróha přiwšěm hodźinu zawrjena.
Kulow. Po wšěm zdaću ničo swjate njebě njeznatym, kotřiž su so do Kulowskeje katolskeje cyrkwje zadobyli. Po informacijach Zhorjelskeje policajskeje direkcije bě to minjeny pjatk w času wot 15 do 20 hodź. Njeznaći měrjachu so zaměrnje na jałmožnicy, kotrež namócnje wočinichu a sej pjenjezy přiswojichu. Na te wašnje spakosćichu dwucyfrowu sumu, kotraž bě poprawom za najwšelakoriše nadawki wosady myslena. Wěcnu škodu trochuja porno tomu na něhdźe tysac eurow.
Wjesnjenjo ćěkancow zeznali
Při kofeju wo žiwjenskim dóńće sobuwobydlerjow zhonili
Njeswačidło (LR/SN). Pod hesłom „Chcemy so zeznać“ přeprosy sobotu druhi raz skupina podpěraćelow ćěkancow, kotřiž su w Holešowskim motelu zaměstnjeni, wšitkich zajimcow na zhromadny kofej na Njeswačanskej farje. Katharina Elina hosći jendźelsce a němsce postrowi. Při kofeju rozprawjachu „cuzy“ wo swojim žiwjenju. Powědachu wo tym, po kotrym puću su Němsku docpěli a čehodla su nětko pola nas. Njeswačenjo so jara dźiwachu, kak derje někotři hižo němčinu wobknježa. Běše pak tež wusłyšeć, zo maja někotři ćěkancy přeće, po skónčenju wójny so zaso domoj wróćić. W Holešowje čuja so wokomiknje jara wosamoćeni. Njedawno bě gmejna rumnosće na knježim dworje přewostajiła, zo móhli podpěraćeljo ćěkancow tam nahromadźene drasty a meble wotstajić.
Dźesaćitysacy ludźi běchu sobotu wječor w Budyšinje po puću, ...
Kreuz: Azylowy wuběrk wutworić
Byrnjež ani na dnjowym porjedźe njestała, bě tema azyl na wčerawšim posedźenju gmejnskeje rady Pančicy-Kukow najbóle diskutowany dypk. Tež dotal njeznate zynki běchu słyšeć.
Krótkopowěsće (06.11.15)
Zakónča spěchowanje
Berlin. Zwjazkowy minister za hospodarstwo Sigmar Gabriel (SPD) chcył spěchowanje składowakow solarneje energije kónc lěta zakónčić. Tole wuchadźa ze spisa hospodarskemu wuběrkej zwjazkoweho sejma. Lěta 2013 zahajeny spěchowanski program je swój nadawk spjelnił a njeje hižo trěbny, Gabriel piše. Solarne hospodarstwo a Zeleni rozsud raznje kritizuja.
Stronje AfD so spjećować
Berlin. Lěwicarske skupiny chcedźa jutřišu demonstraciju strony AfD w Berlinje z blokadami zadźeržeć. K tomu namołwja zwjazk Stopp AfD. Zhromadnje z Lěwicu tež SPD, CDU a Zeleni k napřećiwnej demonstraciji namołwjeja. AfD je něhdźe 5 000 wobdźělnikow přizjewiła, přećiwni demonstranća chcedźa runje telko ludźi mobilizować.
Synoda EKD so schadźuje
Policija (06.11.15)
Kulowc. Ćežke wobchadne njezbožo sta so wčera dopołdnja na statnej dróze S 95 mjez Němcami a Kulowcom. Z Wojerowskeho směra přijěduca 51lětna žona zhubi něhdźe 300 metrow před Kulowcom z dotal njeznateje přičiny kontrolu nad swojim Fordom, zajědźe na lěwy bok jězdnje a so zwróći. Žona so při tym ćežko zrani, tak zo dyrbjachu ju do chorownje dowjezć. Jeje awto je so při njezbožu dospołnje skóncowało.
Přewjedu dźěłarničku
Nowej ležownosći w Jaworje
Wotrow (SN/MWj). Wo dwě twarskej ležownosći ma mała wjes Jawora w gmejnje Pančicy-Kukow rozrosć. Na wčerawšim posedźenju gmejnskeje rady předstaji sobudźěłaćerka planowanskeho běrowa Panse Heike Menzel naćisk plana, po kotrymž ma cyłkowna płonina 1 375 kwadratnych metrow sewjernje wsy při Pomnikowym puću do nutřkowneho wobtwarjenskeho wobłuka přeńć.
Na kóždej z twarskeju ležownosćow móhł jednoswójbny dom nastać. K hižo wobstejacym ležownosćam wšitke trěbne roły a kable hižo wjedu, wone měli so jeničce hač k nowymaj ležownosćomaj dale wjesć. Zastaranje z wodu měło so ze swójskej studnju zaručić. Wot 23. nowembra budu podłožki zjawnje wupołožene. Po wšěm zdaću klětu w februaru móhli radźićeljo wustawki doskónčnje wobzamknyć. Po jich zjawnym wozjewjenju budu wone potom płaćiwe.
Na wčerawše naprašowanje Jaworčana, hač móhli so zajimcy za nowej ležownosći přizjewić, dyrbješe wjesnjanosta Markus Kreuz (CDU) bohužel z ně wotmołwić. Wobě ležownosći stej hižo wobsadźenej a njejstej tuž na předań.
Ćěkancow zeznać
Njeswačidło. Přećelski kruh azyl přeproša zajimowanych Njeswačanow a wobydlerjow Holešowskeho domu za požadarjow azyla na zhromadny kofej a tykanc. Jutře, sobotu, budźe wot 15 hodź. na Njeswačanskej farje składnosć k mjezsobnemu zeznaću. Mjeztym bydli w Holešowje swójba z Afghanistana z dźewjećlětnej dźowku. Za nju pytaja hišće kmane koleso (tel. 035933/ 32 553).
Spominać a so modlić
Budyšin. K spominanju a k modlitwje składnostnje pogromoweje nocy lěta 1938 přeprošeja katolscy a ewangelscy křesćenjo póndźelu, 9. nowembra, w 19 hodź. na nutrnosć w cyrkwi Budyskeho klóštra klarisow. Duwo Thoma nutrnosć hudźbnje wobrubi.
Přehladka w muzeju
Budyšin. „Migranća zeznajomjeja so ze serbskej kulturu“ rěka wustajeńca, kotruž wotewru póndźelu, 9. nowembra, w 15 hodź. w Budyskim Serbskim muzeju. W njej su mjez druhim zapřijate wuslědki projekta SLA z ćěkancami.
