Policija (04.03.19)
Spěšnišo hač dowolene
Kulow. Dobre wóčko mějachu sobotu wječor policisća w Kulowje. Jim napadny tak mjenowane lochke jězdźidło z nalěpkom 45 km/h. Dokelž pak bě awtko wočiwidnje spěšnišo po puću, kontrolowachu je a prošachu wo jězbnu dowolnosć 15lětneje wodźerki. Wona měješe swojej starobje wotpowědnje dowolnosć klasy AM. Za awto, spěšniše hač 45 km/h, pak by klasu B trjebała. Nětko chcedźa zwěsćić, hač bu jězdźidło manipulowane.
Podhladneho zajeli
Budyšin. K hašenju wołali su wohnjowych wobornikow w nocy na sobotu na Budysku Sukelnsku. Tam so w pincy bydlenskeho domu wjacore składowane wobruče palachu. Cyły dom dyrbjachu ewakuować. 45lětny muž je podhladny, zo bě woheń zamiškrił. Jeho policisća nachwilnje zajachu.
Na fararja Jakuba Žura spominali
Tři kategorije za zahrodki
Prěni raz po lěće 1996 bě město Budyšin hromadźe z teritorialnym zwjazkom zahrodkarstwa zestajiło statistiski material wo małych zahrodkach na swojim teritoriju a je z toho koncepciju za přichod zdźěłało. Měšćanscy radźićeljo su ju na swojim zašłym posedźenju schwalili.
Budyšin (SN/MWj). W sprjewinym měsće Budyšinje je tuchwilu 48 małozahrodkowych připrawow z cyłkownje 3 008 parcelemi. Po informacijach z měšćanskeho zarjadnistwa su wone derje wućežene. Jeno 3,3 procenty z nich tuchwilu wobsadźene njejsu. Tónle niwow chcedźa tež přichodnje zachować, za čož pak trjebaja zajimcow. Hač jich přichodnje dosć budźe, wotwisuje sobu wot ličby wobydlerjow. W koncepciji wuchadźeja w najhóršim padźe z toho, zo ličba wobydlerjow hač do lěta 2032 dale woteběra a na 35 000 spadnje. W najlěpšim padźe so dźensniša ličba zachowa.
Karnewal w znamjenju orienta
Žonjacy póstniski ćah magisku ličbu wobdźělenych skupin docpěł
Kulow (aha/SN). Wot lěta 1988 je w Kulowje z tradiciju, zo wuhotuja žony a młodostne sobotu do róžoweje póndźele swój wosebity póstniski ćah. Tón wopokaza so zawčerawšim jako přiwabliwa tradicija, k čemuž je poměrnje rjane wjedro přinošowało. Irena Nowakowa a Birgit Šimanowa stej na torhošću jednotliwe wobrazy na temu „Orient“ připowědźiłoj. Wonej zwěsćištej, zo su lětsa w Kulowje ze sto wobdźělenymi skupinami magisku ličbu docpěli. Wjace hač 1 500 žonow a holcow bě do ćaha zapřijatych. Wone su tydźenje do toho wjele dźěła na so wzali, zo bychu ze swojimi přewšo pisanymi a kreatiwnymi kostimami lóštnu naladu přisporjeli. Dwójce su nory na połtřeća kilometrow dołhej čarje, kotraž z wobdźělenej ličbu skupin runje tak dosahaše, tysacy ludźi zbliska a zdaloka zawjeselili. Napadnyło je, zo bě mjez wopytowarjemi wjele předrasćenych.
Rěč k tomu słuša
Dypkownje w 13.11 hodź. je so wčera w Choćebuzu „ćah wjesołych ...
Krótkopowěsće (04.03.19)
Dobre wuchadźišćo njedocpěł
Połčnica. Serbski kandidat za lětuše wólby Sakskeho krajneho sejma Hajko Kozel njeje za nastajenje krajneje lisćiny sakskeje Lěwicy 13./14. apryla w Lipsku dobre wuchadźišćo docpěł. W rozsudnych wólbach wo druhe preferowanje kandidata z Budyskeho wokrjesa přesadźi so Felix Muster na zhromadźiznje bazowych zastupjerjow Lěwicy sobotu w Połčnicy přećiwo Kozelej.
Nowy hotel wotewrěli
Lubnjow. Błóta su mjez turistami jara woblubowane. Po ličbje přenocowanjow leži region po cyłej Němskej na 3. městnje. Tuž tam přenocowanske poskitki turistam rozšěrja. Minjeny pjatk su w Lubnjowje nowy hotel „Při Błótowskej termje“ wotewrěli. Za cyłkownje 60 stwow je so tam hač do měrca hižo něhdźe 4 400 hosći přizjewiło.
Polak je kandidat Europy
Klanki zhotowić
Stróža. Praktiski seminar wo zhotowjenju powěsćowych figurow w formje klankow wotměje so jutře, sobotu, wot 10 do 16 hodź. w Stróžanskim Domje tysac hatow. Designerka Regina Herrmann wobdźělnikam demonstruje, kak móža z jednorymi srědkami z tekstilijow klanki zhotowić a je po swójskich předstawach wuhotować. Wobdźělenje płaći 11,50 eurow a pjeć eurow za material.
Jens Spahn porěči
Budyšin. Na politisku popjelnu srjedu přeprosy Budyski zapósłanc Marko Šiman srjedu, 6. měrca. To budźe zjawne zarjadowanje w sportowni na Budyskim Třělnišću. Wot 19 hodź. porěčitaj tam zwjazkowy strowotniski minister Jens Spahn a sakski europski zapósłanc Herrmann Winkler (wšitcy CDU). Zajimcy su wutrobnje witani.
Serbske blido w muzeju
Policija (01.03.19)
Darmotnje tankował
Běła Woda. Na parkowanišću na Budyskej dróze w Běłej Wodźe je swědk zawčerawšim popołdnju młodeho muža wobkedźbował, kiž bě čisle swojeho VWja wuměnił. Na to jědźeše k tankowni, je tam swoje awto połne natankował a na to bjez zapłaćenja wotjěł. Přiwołani policisća 25lětneho pozdźišo w měsće zadźeržachu a přidatnje zwěsćichu, zo steješe wón pod wliwom drogow.
Wo prawach zahrodkarjow
Budyšin (SN). Z přichodnym zarjadowanjom w rjedźe Budyska akademija wotpowěduja přichodnu póndźelu, 4. měrca, přeću z publikuma a poskića přednošk wo prawach zahrodkarjow. Referent Lothar Fritsch, narodźeny 1951, je wot lěta 1982 přeswědčeny zahrodkar. Jako wiceprezident sakskeho krajneho zwjazka zahrodkarjow nawjeduje wón mjez druhim dźěłowu skupinu za prawo. W swojim přednošku wot 18 hodź. wěnuje so stawizniskemu wuwiću małozahrodkarstwa. Pod hesłom „Informacije wo prawniskich prašenjach z małozahrodkarstwa“ porěči Fritsch tohorunja wo aktualnym prawniskim połoženju. Paralelnje k čitanju je planowana wustajeńca teritorialneho zwjazka zahrodkowych přećelow. W njej zhladuje towarstwo na 100lětne organizowane małozahrodkarstwo w Budyšinje. 19. měrca 1919 běchu w sprjewinym měsće prěnje drustwo zahrodkarjow załožili.
Wot lěta 2005 poskića město Budyšin wot nowembra do apryla kóždu prěnju póndźelu měsaca čitanje wo rozdźělnych temach. Partner je statna studijna akademija na Lubijskej, hdźež zarjadowanja w čitarni na 1. poschodźe přewjedu. Zastup je darmotny.
