Předjězbu njewobkedźbował
Rakecy. Ćežko zranił je so zawčerawšim wječor wodźer mopeda w Rakecach. Na křižowanišću Lěsna/Hermanečanska njeje 79lětny muž předjězbu wotprawa přijěduceho wosoboweho awta typa VW wobkedźbował. Jeho 38lětny šofer njemóžeše zražce hižo zadźěwać a zrazy do mopeda typa S 50. Při tym bu jeho wodźer ćežko zranjeny. Nuzoweho lěkarja dyrbjachu z helikopterom k městnu njezboža dowjezć.
Chrósćicy (SN/MWj). Při nastajenju hospodarskeho plana Chróšćanskeje gmejny za lěto 2017 pokazachu so „wěste ćeže“, etat wurunać. Takle zwurazni to wjesnjanosta Marko Kliman (CDU) na zašłym posedźenju gmejnskeje rady. To ničo druheho njewoznamjenja, hač zo dyrbja za móžnosćemi pytać, swoje komunalne dochody zwyšić. Kliman tohodla namjetowaše, ležownostny dawk A wot tuchwilu 320 na 350 procentow zwyšić. Na te wašnje móhli 1 500 eurow lětnje wjace do gmejnskeje kasy dóstać.
Čehodla runje dawk A, potajkim tón za pola a łuki, zwyša, wobkrući Chróšćanski wjesnjanosta z tym, zo nochcedźa swójby poćežować a na přikład pěstowarske přinoški zwyšić.
13. raz wotměje so swjatkowny kónc tydźenja w Sakskej akcija „Kunst offen“. Na njeličomnych městnach móža zajimcy do ateljejow pohladać, wuměłcam při dźěle přihladować, jich twórby wobdźiwać a sej při tym rjany dźeń popřeć. Jedne tajke městno budźe w Žuricach.
Njeluba překwapjenka po dowolu
Wojerecy. Njeje samozrozumliwe, zo je doma wšo w porjadku, hdyž so z dowola nawróćiš. Tole dyrbješe zawčerawšim swójba na Hasy Liselotty Herrmann we Wojerecach nazhonić. Njeznaći běchu so w času wot 7. meje hač do póndźele do bydlenja swójby zadobyli a wšitke stwy přepytali. Mjez druhim pokradnychu laptop, kompjuterowy tablet, hudźbny měšenski pult kaž tež hrajnu konsolu. Hódnotu rubizny trochuje wobsedźer na 2 000 eurow. Nimo toho nasta w bydlenju něhdźe 1 000 eurow wěcneje škody. Policija pad přepytuje.
Zamołwita za wukrajnikow Budyskeho wokrjesa Anna Piętak-Malinowska bě minjenu sobotu do Kamjentneho domu na 5. němsko-pólske zetkanje „Majówka“ přeprosyła.
Budyšin (CRM/SN). Přeprošeni běchu nimo wšěch we wokrjesu bydlacych Polakow předewšěm jich partnerojo kaž tež pólšćinu wuknjacy přećeljo. Wjele wjace zajimcow, hač běchu zarjadowarjo wočakowali, hižo dočasnje do sociokulturneho centruma dóńdźe. Na dworje domu so swjedźeń zahaji. Bórze so wujewi, zo so mnozy mjez sobu znaja a tuž njebě ćežko, starych a młodych kaž we wulkej swójbje do rozmołwy pohnuć a do zhromadneho spěwanja přeprosyć. Z přewodom keyboarda, gitary a huslow přitomni tak mócnje spěwachu, kaž to skerje ze serbskich swjedźenjow znajemy. A činjachu to jenož pólsce z pomocu wudźělenych łopjenow. „Poszła żabka po wodę“, „Za górami, za lasami“ a wězo tež pola nas jara znata pěseń „Szła dziewieczka do laseczka“ kaž tež dalše spěwy zanošowachu ludźo z wjele lóštom na rjanym mejskim wječoru. Prawa to „Majówka“.
Worklecy (JK/SN). Cyłkownje 17 pozicijow wopřiješe lisćina, kotruž bě Worklečanski wjesnjanosta Franc Brusk (CDU) gmejnskim radźićelam za rozjimanje naćiska lětušeho hospodarskeho plana na wčerawšim posedźenju předpołožił. „Njejsmy hišće ponowjenje sportoweje hale tak prawje wotličili, da žno mamy wo dalšich wudawkach rěčeć“, zahaji wjesnjanosta diskusiju. Najwažniše předewzaće gmejny lětsa budźe, ponowić třěchu zakładneje šule. Prěni krok za to wčera hižo bě, zo wobzamknychu přepodaće nadawka za róštotwar, třěchikryjerske dźěła kaž tež za izolaciju a barbjenje fasady. Přepruwowawši poskitki přepodachu nadawki firmam z regiona. W lětnich prózdninach ma so naročny projekt zwoprawdźić. Financować budu jón ze spěchowanskimi srědkami Zwjazka a kraja kaž tež ze swójskim podźělom 25 procentow.
Wojerecy. Dźěći a młodostni w starobje sydom do 15 lět móža so za cirkusowu a warjetejowu dźěłarničku přizjewić, kotruž přewjedu w prěnim tydźenju lětnich prózdnin wot 26. do 30. junija na Wojerowskej dźěćacej a młodźinskej farmje. Stajnje wot 9 do 16 hodź. móža tam wobdźělnicy do swěta cirkusa počuchać. Přizjewjenja přijimuja pod telefonowym čisłom 03571/ 979 164.
Kursaj serbšćiny
Budyšin. Zakładny kurs serbšćiny za staršich serbšćinu wuknjacych dźěći a za dalšich zajimowanych dorosćenych zahaji so 21. awgusta w Budyšinje. Wón wotměje so stajnje póndźelu wot 18 do 19.30 hodź. w Serbskej zakładnej šuli na Friedricha Listowej 8. Dalši zakładny kurs serbšćiny za staršich serbšćinu wuknjacych dźěći a dalšich zajimowanych dorosćenych zahaji so tohorunja 21. awgusta w Pančicach-Kukowje. Tón budźe stajnje póndźelu wot 19 do 20.30 hodź. w tamnišej zakładnej šuli. Přizjewjenja přijimuje Rěčny centrum WITAJ hač do 4. awgusta 2017 pod telefonowym čisłom 03591/ 550 400, e-mail: witaj.
Zabawa na nawsy