Jedyn z najwjetšich twarskich projektow Budyskeho wokrjesa předstajili
Bart (CS/SN). Něhdźe 70 Barćanow je tele dny do jědźernje tamnišeje zakładneje šule přišło, zo bychu zhonili, kajki přichod wona změje. Na wšě dźesać lět je gmejna wo to wojowała, ju na wyšu šulu přetwarić móc. Mjeztym su plany hižo poměrnje konkretne. Tuž móžeštaj zastupowacy krajny rada Udo Wićaz kaž tež architekt Carsten Ehrlich dokładne ličby předpołožić.
Kaž Udo Wićaz rozłoži, ma nowa šula jako jedyn z najwjetšich twarskich projektow wokrjesa, dwanaće milionow eurow płaćić. W kultusowym ministerstwje je projekt dobry wothłós žnjał. Tam liča ze 40procentowskim spěchowanjom, štož by 4,8 milionam eurow wotpowědowało. Po tym zo předplanowanja předleža, chcedźa 2019 próstwu wo spěchowanske srědki stajić a runočasnje planowanske dźěła wupisać. Projekt chcedźa do dwójneho etata wokrjesa 2019/2020 zapřijeć. W lěće 2020 maja so twarske dźěła wupisać, zo móhli 2021/22 twarić. „Poběhnje-li wšitko po planje, móhł pře- a wutwar 2023 dokónčeny być“, hlada Udo Wićaz doprědka.