Słona Boršć (CS/SN). Na twarnišću noweje wohnjowoborneje gratownje w Słonej Boršći dźěła derje pokročuja. Minjeny pjatk swjećachu tam zběhanku. Tuž su „dobreje nadźije, zo móže so objekt něhdźe za lěto přepodać“, rjekny Budyski wyši měšćanosta Karsten Vogt (CDU).
Gratownja njeje jenož garaža za jězdźidła, ale zetkanišćo za cyłu wjes. Wudawki we wobjimje 2,9 milionow eurow, z toho 650 000 eurow wot wokrjesa, su derje inwestowane. Šef Budyskeje wohnjoweje wobory Markus Bergander mjenowaše zběhanku měznik. Žadanja na gratownju su dźensa cyle hinaše. K tomu słušeja moderna domowa technika, ćopłotna klumpa a fotowoltaikowa připrawa. W gratowni budźe městno za tři jězdźidła. Dale změja rumnosće za wukubłanje a přihoty tež při špatnym wjedrje a nimo toho předrasćernje kaž tež socialne rumnosće. Tež młodźinska wohnjowa wobora změje tu swoje městno a je so na zběhance wobdźěliła.
