Policija (22.11.18)
Dom so dospołnje wupalił
Chróst. Wulku wěcnu škodu načinił je woheń, kiž bě w nocy na srjedu w jednoswójbnym domje w Chrósće pola Wulkeje Dubrawy wudyrił. Jako 38lětny krótko do połnocy domoj přińdźe, jemu płomjenja hižo napřećo sapachu. Najebać prócowanja wjace hač 70 wobornikow z dwanaće jězdźidłami so dom dospołnje wupali. 38lětny so snadnje zrani.
Spěšna pomoc młodostnym
Spěchowanske srědki a socialna dźěłaćerka zaručeja klubej nowy domicil
Chrósćicy (JK/SN). Njewšědnje sylny angažement młodeje socialneje dźěłaćerki Marije Koklineje je zmóžnił, zo móža Hórčanscy młodostni bórze zaso w krutym twarjenju młodźinske dźěło a zabawu pěstować. Sobudźěłaćerce Budyskeho Rěčneho centruma WITAJ leži dalše dźěło Hórčanskich młodostnych jara na wutrobje. Tak njeje wona jenož wosebite spěchowanske móžnosće wuslědźiła, ale tež zawod, kotryž přewostaji jim poměrnje nowej kontejneraj za přijomnu płaćiznu. Jednać pak dyrbjachu spěšnje. Spěchowanje, z kotrymž móhli za Hórčanski klub 2 000 eurow dóstać, běži jenož hač do kónca nowembra. Tak so Chróšćanska gmejna krótkodobnje rozsudźi, spěchowansku próstwu stajić a 500 eurow za nowy domicil młodostnych w Hórkach připłaćić. Kontejneraj přewostajiła je Kamjenska wotnožka Drježdźanskeho twarskeho zawoda DIW. Wona je samo transport do Hórkow přewzała a minjenu póndźelu kontejneraj na krutym fundamenće něhdyšeho jewišća při Hórčanskim stadionje nastajiła.
W Chrósćicach wudźěli Drježdźansko-Mišnjanski biskop Heinrich ...
Krótkopowěsće (22.11.18)
Pjenjezy za zhromadny projekt
Berlin. Štyri awtochtone mjeńšiny w Němskej móža 2019 wjelelětne zhromadne předewzaće, pućowansku wustajeńcu, zeskutkownić. Wona ma wo stawiznach, kulturje, identiće a rěči Danow, Frizow, Serbow, Sintow a Romow kaž tež delnjoněmskeje rěčneje skupiny informować. Kaž mjeńšinowy sekretariat w Berlinje zdźěla, změja za to 125 000 eurow z klětušeho etata Zwjazka.
Polěpšenja hišće trěbne
Drježdźany. Na dwěmaj městnomaj skedźbnja mjezyrozprawa komisije za rozrost, strukturnu změnu a dźěło na serbski lud. „Mjezystaw wuraznje witamy, polěpšenja pak su hišće trěbne“, rjekny předsyda Domowiny Dawid Statnik z widom na kónčnu rozprawu. Wón bě so na wuměnje informacijow wo tym předwčerawšim w Drježdźanskej statnej kencliji na přeprošenje statneho ministra Olivera Schenka wobdźělił.
Dwanaće kandidatow
Policija (20.11.18)
Bibliju pokradnyli
Wojerecy. Městno padustwa předwčerawšim we Wojerecach bě runje tak njewšědne kaž rubizna, kotruž skućićeljo wottam pokradnychu. Njeznaći zadobychu so mjenujcy do nowojapoštołskeje cyrkwje na Friedrichowej. Cyłe twarjenje přepytawši woni skónčnje bibliju sobu wzachu. Swjate pismo we wulkosći formata A3 bě ze złotobarbnymi debjenkami wuhotowane. Po informacijach Zhorjelskeje policajskeje direkcije trochuja hódnotu knihi na wjacore sta eurow. Wěcna škoda, kotruž skućićeljo při zadobywanju načinichu, je něhdźe sto eurow. Kriminalisća Wojerowskeho policajskeho rewěra zawěsćichu slědy a nětko za paduchami biblije pytaja.
Ponowja pomnik za padłych
Čěski chór we Łužicy spěwał
Naćisk plana wupołoženy
Kubšicy (CS/SN). Dochody z přemysłoweho a dochodoweho dawka Kubšiskeje gmejny so pozitiwnje wuwiwaja. To zdźěli wjesnjanosta Olaf Reichert (njestronjan) na zašłym posedźenju gmejnskeje rady, jako so jeje čłonojo z hospodarskim planom 2019 zaběrachu. Po wuprajenju wjesnjanosty su tež dochody z ležownostneho dawka stabilne. Najwažnišej inwesticiji přichodneho lěta budźetej ponowjenje Bošečanskeje (Baschütz) zakładneje šule a saněrowanje wodočisćernje w Hruboćicach (Grubditz). Jako škit před wulkej wodu ma w Krakecach (Kreckwitz) nasyp nastać. Gmejna Kubšicy ze swojimi 2 570 wobydlerjemi je z 30 eurami na wobydlerja zadołžena a ma tak sobu najmjenje dołha w Budyskim wokrjesu. Naćisk hospodarskeho plana je hišće hač do 26. nowembra zjawnje wupołoženy.
Wot Swobodneho stata Sakskeje přewostajenu pawšalu za skrućenje wjesneje kónčiny we wobjimje 70 000 eurow chcedźa na dwaj projektaj rozdźělić. 15 000 eurow nałoža za sanitarny kontejner za wobornikow hašenskeje skupiny w Sowrjecach (Soritz) a 55 000 eurow za Hrubočansku wodočisćernju.
Žane nowe projekty njezahajić
Radźićeljo rozmysluja, kak komunalnu pawšalu najlěpje zasadźeć
Njeswačidło (JK/SN). Z wulkomyslnym darom, dać komunam wot 2018 do 2020 kóžde lěto podpěru 70 000 eurow, je sej sakske statne knježerstwo rjanu, ale gmejny wosebje wužadacu wěc wumysliło. Podobnje druhim sakskim komunam steji tež Njeswačanska před prašenjom, kak pawšalu najlěpje zasadźeć. Móžnosćow, ju zmysłapołnje wužiwać, je w napjatym hospodarskim połoženju wjac hač dosć. Směrnica knježerstwa skedźbnja pak gmejny na to, pjenjezy wudać na dobro wobydlerjow a njespytać z nimi hospodarski plan wurunać.
Twarja nowe hrajkanišćo
Chětro zrudźacy napohlad skići tuchwilu hrajkanišćo w Běłym Chołmcu. Tam maja jeničce pěskowy kašćik, betonowu blidotenisowu platu a basketballowy korb. To ma so klětu změnić.
Běły Chołmc (AK/SN). Nowemu hrajkanišću w Běłym Chołmcu je Łazowska gmejnska rada na swojim zašłym posedźenju přihłosowała. Z třomi wzdatymi hłosami radźićeljo wobzamknychu, za to přidatne wudawki 45 500 eurow nałožić. Najwjetši dźěl toho, mjenujcy 36 400 eurow su spěchowanske srědki z programa Leader. Jeničce 20 procentow, potajkim 9 100 eurow ma gmejna ze swójskeje kasy přidać. „Nastać ma hrajkanišćo z modernymi hrajkanskimi nastrojemi, z móžnosćemi za sedźenje a z wobhrodźenjom“, rozłoži wjesnjanosta Thomas Leberecht (CDU). Wosebje dźakowaše so wón Běłochołmčanam samym. Woni wobdźělichu so na hrajkanišćowej iniciatiwje limonadoweje marki Fanta a dobychu tak tysac eurow za hrajkanski nastroj. To swědči wo tym, zo wobydlerjo nowe hrajkanišćo woprawdźe chcedźa, kaž wjesnjanosta potwjerdźi.
