Při njezbožu so njezranił
Podstupim. Braniborski ministerski prezident Dietmar Woidke (SPD) je wobchadne njezbožo ze swojim słužbnym awtom w Podstupimje njezranjeny přetrał. Jězdźidło bu wobškodźene, rěčnik policije zdźěli. Šofer Woidkoweho woza bě so wčera wječor za wodźidłom zwjezł. Na to awto na kromje puća do płota zrazy. Šofera dowjezechu do chorownje.
Žadaja sej Saksku pruwować
Dissen. W zwisku z planowanym přepołoženjom produkcije mlokowych wudźěłkow předewzaća Homann do Leppersdorfa su so delnjosakscy politikarjo na komisiju EU wobroćili. Woni žadaja sej wot prezidenta Jeana-Claudea Junckera pruwować, w kotrej měrje Sakska přepołoženje pjenježnje spěchuje. W Dissenje by 1 200 městnow wotpadnyło.
Pomhaja čěskim krajanam
Alkohol pił a z awtom jěł
Budyšin. Dźakowano skóncowanemu kolesu awta lepi policija zawčerawšim wječor šofera, kiž je pod wliwom alkohola jěł. Jemu bě so při jězbje po Budyskim Židowje nadobo wobruč puknyła. 40lětny zhubi na to kontrolu nad wodźidłom a zrazy do parkowaceho awta. Při wobdźěłanju njezboža policisća pytnychu, zo muž pod wliwom alkohola steji. Kontrola wunjese jedyn promil alkohola w kreji. Wodźerjej awta tuž dalšu jězbu zakazachu a sćazachu jemu jězbnu dowolnosć.
Pančicy-Kukow (SN/MWj). Štož dołho traje, so radźi. To znajmjeńša płaći za wopon, kotryž chce sej gmejna Pančicy-Kukow spožčić. Mjez komunami zarjadniskeho zwjazka Při Klóšterskej wodźe, po wšěm zdaću pak po cyłym dwurěčnym teritoriju Hornjeje Łužicy je wona poslednja, kotraž je hišće bjez wopona. Při tym su so w zašłosći wjacore razy wo njón prócowali, njeje pak so to dotal poradźiło. Tole ma so nětko změnić.
Blunjanska dobrowólna wohnjowa wobora je k zahajenju sezony minjeny kónc tydźenja hnydom dwě wubědźowani organizowała. Tež mnozy wopytowarjo běchu přišli.
Bluń (JoS/SN). Na čłonow Blunjanskeje dobrowólneje wohnjoweje wobory čakaja lětsa wulke wužadanja. Minjenu sobotu su prěnje tajke zmištrowali, přetož jako lońši dobyćer wuhotowachu woni lětuše wubědźowanje wo jězorinowy pućowanski pokal. Nimo toho maja Blunjenjo Sakski wohnjowoborny cup zakitować. Hač so to poradźi, pokaza so hakle po štwórtym hódnoćenskim wubědźowanju w septembru. Jězorinowy pokal pak dyrbjachu sobotu kameradam z Cerkwicy wotedać. Cerkwica je měšćanski dźěl Lubnjowa w Błótach a tak steji jězorinowy pokal prěni raz na lěto w Braniborskej.
Towaršnosć wuznamjenjena
Zhorjelc/Zgorzelec. Na wčerawšim zhromadnym posedźenju měšćanskeju radow Zhorjelca a Zgorzeleca su Hornjołužisku towaršnosć wědomosćow z čestnym titulom „Za zasłužby wo europske město Zhorjelc/Zgorzelec“ wuznamjenili. Do toho běchu so zapósłancy po tradiciji wosrjedź mosta nad Nysu zetkali a schadźowachu so na to w Domje kultury na pólskej stronje rěki.
Studenća startuja w Londonje
Choćebuz/Zły Komorow. Skupina 14 studentow Braniborskeje techniskeje uniwersity Choćebuz-Zły Komorow přihotuje so tuchwilu intensiwnje na mjezynarodne wubědźowanje wo energetisce najeficientniše jězdźidło, wotměwace so kónc meje w Londonje. Tam chcedźa přećiwo 192 mustwam ze 27 krajow nastupić, uniwersita piše.
Těz w Sakskej bydlenja přepytali
Kolesowar znjezbožił
Delni Wujězd. Na statnej dróze S 108 je so wčera po připołdnju kolesowar při wobchadnym njezbožu ćežko zranił. 70lětny jědźeše z Łaza do směra na Delni Wujězd. 60lětna wodźerka wosoboweho awta chcyše jeho přesćahnyć. W tym wokomiku so rentnar rozsudźi nalěwo wotbočić, tak zo dóńdźe k zražce. Ćežko zranjeneho muža dowjezechu do chorownje. Pola njeho naměrichu 0,82 promilow alkohola w kreji. Wěcna škoda wučinja něhdźe tysac eurow.
W klubje pjenjezy kradnyli
Pěskecy. W času wot njedźele wječora hač do póndźele popołdnja běchu so njeznaći namócnje do Pěskečanskeho młodźinskeho kluba zadobyli a přepytachu w nim wšitke rumnosće. Pokradnyli su pjenježnu kasetu, w kotrejž bě třicyfrowa suma pjenjez. Wěcnu škodu powobliči jedyn ze zamołwitych na něhdźe 500 eurow. Kriminalna technikarka je na městnje slědy zawěsćiła. Policija pad nětko dale přepytuje.