Tysacy hosći wjele dožiwiło
Jutrowny nawal na prazwěrjenc, železnicu a park błudźenkow
Budyšin (SN/mwe). Nic jenož w hosćencach, hotelach a pensijach běchu jich mějićeljo na jutrownych swjatych dnjach z wobrotom spokojom, tež w parkach a druhdźe registruja jich wudźeržowarjo dosć spokojace wopytowarske ličby.
W Małowjelkowskim prazwěrjencu móžachu přez jutry něhdźe 10 000 hosći witać. Awtowe znamješka pokazachu, zo běchu sej přewažnje swójby z cyłeje Němskeje kaž tež z Čěskeje a Pólskeje do tohole njewšědneho areala z hakle njedawno přepodatym Mitozejom wulećeli. „Wjeselimy so přez wulkotny kónc tydźenja. Najebać njerjane wjedrowe prognozy, móžachmy w prazwěrjencu wjele ludźi witać“, nam Diana Liebsch z Budyskeje wobdźělenskeje a zawodneje towaršnosće BBB zdźěli.
Tójšto wo křižerjach zhonili
Z nowosću je Serbska kulturna informacija w Budyskim Serbskim domje ćichu sobotu wopytowarjow wabiła. Prěni raz je křižer – Bjarnat Cyž z Noweje Jaseńcy – wo tymle nabožnym nałožku informował a při tym wo swojich dožiwjenjach jako tajki powědał.
Budyšin (CS/SN). Normalnje je, zo wuhladaš křižerja jenož na konju. W Budyšinje pak mějachu nowosć: Ćichu sobotu je Bjarnat Cyž wopytowarjam wo tym powědał a na jich prašenja wotmołwjał. Nazhonity křižer bě sobu přinjesł, štož křižer a kóń trjebataj, kaž su to šabraka, graty, wopušna sekla, suknja a cylinder.
Sta křižerjow ze wšitkich dźewjeć křižerskich procesionow ...
Krótkopowěsće (19.04.17)
Minister Baaske přijědźe
Podstupim/Bórkowy. Braniborski minister za kubłanje, młodźinu a sport Günter Baaske (SPD) chce so na městnje wo połoženju wučby serbšćiny wobhonić. Kaž rozprawja delnjoserbski rozhłós, je minister za 5. meju wopyt w Bórkowskej šuli „Mina Witkojc“ připowědźił. Wopyt je reakcija na protesty přećiwo planam wučbu serbšćiny wobmjezować.
Komplikowany termin
Flensburg. 4. europeada w lěće 2020 móhła so w juniju abo spočatk julija přewjesć. To namjetujetej móžnej wuhotowarjej, Korutanscy Słowjency a zwjazk mjeńšin namjezneho regiona w sewjernej Němskej. Na łužiskej koparskej wokrjesnej runinje su w tym času hišće winowatostne hry a na regionalnej běža hižo přihoty na nowu sezonu. Zamołwići wuradźuja tuž hižo wo móžnych změnach.
Mjenje njezbožow z dźiwinu
Policija (18.04.17)
Nurjaka mortweho namakali
Kamjenc. Přičina, čehodla je 58lětny nurjak z Drježdźan při nurjenju w Kamjenskej skale kónc tydźenja swoje žiwjenje přisadźił, dotal jasna njeje. Slědźenja kriminalneje policije dale traja a rjec so njehodźi, hač bě so nurjak w 60 metrow hłubokej wodźiznje ćělnje přenapinał.
Palacy so traktor zhašeli
Lubnjow. W Lubnjowje (Liebenau) pola Kamjenca su wohnjowi wobornicy z Brunowa (Brauna), Hlinka (Cunnersdorf) a Kamjenca sobotu nawječor palacy so traktor zhašeli. Čehodla pak bě so jězdźidło na łuce stejo nimale dospołnje wupaliło, dotal hišće jasne njeje.
Kontejner w płomjenjach
Mały Wosyk. W Małym Wosyku pola Porchowa je wčera w nocy něchtó drastu w drastowym kontejneru zapalił. Wěcna škoda wučinja něhdźe 1 500 eurow.
Dźěći na Kasperec statoku jejka wóskowali
Wulka sława křižerjam
Ralbicy (aha/SN). 286 křižerjow, jeničce šěsć mjenje hač minjene lěto, wužohnowa farar Šćěpan Delan do Kulowa. Třeći raz nawjedowaše Daniel Wjesela procesion, w kotrymž bě lětsa pjeć nowačkow, sydom slěbornych jubilarow a 40. raz jěchaštaj Gerat Krawc ze Smjerdźaceje a Michał Šołta z Pěskec sobu. Nowosć bě – něchtó njemóžeše so na to dopomnić –, zo je so do křižerskeho procesiona zarjadował por z Jitka, a to Enrico Pilc ze swojim synom Jonathanom.
Koncept integracije předźěłać
W Zhorjelskim wokrjesnym sejmiku wo wukrajnikach debatowali
Zhorjelc (AnB/SN). W časach, jako masiwny přichad ćěkancow wšudźe wulke diskusije zbudźi, bě Werner Genau kwality managera dopokazał. Je to předewšěm zasłužba wjelelětneho decernenta, zo je swój čas w Zhorjelskim wokrjesu takle měrne wostało, jako stejachu komuny w prašenju azyla před wulkimi wužadanjemi, měnješe krajny rada Bernd Lange (CDU) na njedawnym posedźenju wokrjesneho sejmika. Tam su Wernera Genauwa oficialnje na wuměnk rozžohnowali.
Přićah azyl pytacych bě lěta 2014 sylnje přiběrał. Wot lěta 2016 so połoženje zaso změrowa. Kónc minjeneho lěta bydleše na teritoriju Zhorjelskeho wokrjesa hišće nimale 1 800 ludźi w zhromadnych přebywanišćach abo bydlenjach. Nimo wjacorych zhromadnych přebywarnjow maja we wokrjesu 261 bydlenjow, w kotrychž su ćěkancy zaměstnjeni, najwjace z nich w Zhorjelcu.
Krótkopowěsće (18.04.17)
Eksplozija w Zhorjelcu
Zhorjelc. Před wjaceswójbnym domom w Zhorjelcu dóńdźe w nocy na dźensa k eksploziji. Po informacijach policije su so durje a awto wobškodźili. Wosoby so žane zranili njejsu. Wěstoty dla su jeno skrótka 18 wobydlerjow doma ewakuěrowali. Přičina eksplozije dotal jasna njeje. Pad pak fachowcy nětko dokładnje přepytuja.
Žane awta a motorske na móst
Drježdźany. Znaty Drježdźanski Awgustusowy móst je za indiwidulany wobchad zawrjeny. Tole zdźěli dźensa rěčnica Drježdźanskeje radnicy. Po wobzamknjenju měšćanskeje rady smědźa po ponowjenju jenož pěškojo, taksije, tramwajki, chorobne awta, wohnjowa wobora abo busy z měšćanskimi wodźenjemi móst wužiwać.
Wobchadne haćenja sněha dla
Lipsk. Zyma a sněh stej so w mnohich kónčinach Sakskeje za mylenja wobchada postarałoj. W Rudnych horach je sněh samo ležo wostał. We Łužicy maja šoferojo niskich temperaturow dla z hładkimi dróhami ličić. Tu a tam móže so tež sněžić. Wot štwórtka maja temperatury zaso stupać.
Čara za běh ze smólnicu jasna
Serbstwu domiznu dać
Na terenje Krabatoweho młyna Dom Jurja Brězana wotewrjeny
Po lětomaj intensiwneho twarskeho časa je towarstwo Čornochołmčanski Krabatowy młyn dźensa, zeleny štwórtk, Dom Jurja Brězana zjawnosći přepodało. „Smy prěnjotny statok swójby Gerharda Rječki z Dubrjenka znowa natwarili. Tak smy na přikład originalne třěšne cyhele a typiske kašćikowe wokna z tohole domu wužiwali. Originalne sćěnowe cyhele smy do špundowanja Domu Jurja Brězana sobu zatwarili“, podšmórnje předsyda towarstwa Čornochołmčanski Krabatowy młyn Tobias Čižik.
