Z wohnjowoborneje gratownje ma zetkanišćo nastać

Komorow (CS/SN). Bywšu wohnjowobornu gratownju w Komorowje pola Rakec chcedźa na zetkanišćo přetwarić. Za to su tam wobydlersku iniciatiwu zało­žili, kotrejž pjeć wjesnjanow přisłuša. Wuchadźišćo rozmyslowanjow bě přeće wobydlerjow, wosrjedź wsy hrajkanišćo natwarić. Nimo toho Krabatowa kolesowanska šćežka po wsy wjedźe. Tohodla měli kolesowacym a dowolnikam wotpočnišćo poskićeć.

Rentnarku zjebali

Wojerecy. Hnydom trójce su njeznaći zawčerawšim we Wojerecach spytali z tak mjenowanym wnučkowym trikom staršim ludźom pjenjezy wulišćić. Na zbožo wšitcy potrjecheni prawje reagowachu, telefonat skónčichu a policiju informowachu. Mjenje zboža měješe samsny dźeń rentnarka w Žitawje. Cuza žona wudawaše so při telefonje jako „dobra znata“. W rozmołwje wona 76lětnej wo nuzowej situaciji powědaše a zo trjeba krótkodobnje 8 000 eurow. Rentnarka pjenjezy na bance wotzběhny a je nje­znatemu posołej přepoda. Hakle jako swoju woprawdźitu znatu wróćo zazwoni, so wukopa, zo bu zjebana. W tym zwisku policija znowa warnuje, zo měli starši ludźo kedźbliwi być, hdyž jich něchtó při telefonje wo pjenjezy prosy.

Hodźij. Na zjawne zarjadowanje wo wo­znamje wjesnych mjenow přeprosy Domizniske towarstwo Hodźij sobotu, 10. nowembra, w 14 hodź. do tamnišeho towarstwoweho­ domu na Debrikečanskej dróze 8. Přeprosyli su sej prof. dr. Bernda Könitza z Lipšćanskeje uniwer­sity. Referent je so hižo za čas studija w Praze z wjesnymi mjenami zaběrał a wotwodźuje wuwiće najwjetšeho dźěla wjesnych mjenow z jich słowjanskeho wuchadźišća. Tuž lubi to jara zajimawe zarjadowanje być, zdźěli předsyda domizniskeho towarstwa Peter Beer.

Awtor předstaji knihu

Budyšin. „Schlesische Metamorpohosen – Ethnografie Görlitzer Identitätserzäh­lungen nach 1990“ rěka kniha Roberta Lorenza, kotruž předstaji wón štwórtk, 8. nowembra, w 19.30 hodź. w Budyskej Smolerjec kniharni. Po lěće 1990 je wu­znaće k šleskej identiće w Zhorjelcu a wokolinje wulki rozmach dožiwiło. W swojej knize podawa so awtor na slědy tuteje identity w zašłosći a přitomnosći. Zajimcy su wutrobnje přeprošeni.

Budyšin (CS/SN). Meblowy wobchod Budyskeho wokrjesneho zwjazka Carity ma swój nowy domicil nětko na Naměsće přećelstwa ludow w Budyskej Strowotnej studni njedaloko kupnicy Kaufland. Do toho bě wón zaměstnjeny w Löblein-centeru na južnej kromje města. Tam pak bě wobchod prosće přewotležany, rozłožuje jednaćel Budyskeje Carity Andreas Ošika. Wosrjedź Strowotneje studnje móhło wjace ludźi do njeho załožić.

W němskim mjenje „Ritas Möbel“ chowa so mjeno Caritas. Kuchnje, kamory, křesła, elektriske nastroje a wjele dalšeho je myslene za ludźi ze snadnymi dochodami, potajkim za přijimarjow Hartza IV a Baföga abo za seniorow ze skromnej rentu. Z wotpowědnymi po­dłožkami dóstanu woni kartku, z kotrejž móža sej meble za symbolisku mału płaćiznu kupić. Wone pochadźeja wot wobydlerjow, kotřiž je hižo njetrjebaja a je Caritas darmotnje přewostajeja. Sobudźěłaćerjo mebloweho wobchoda je pola darićela wotewzaja a pozdźišo tež kupcej dowjezu.

Dohromady maja we wobchodźe šěsć sobudźěłaćerjow, kotřiž za swoje dźěło wotrunanje 1,30 eurow na hodźinu dóstawaja.