Harig do Berlina njepóńdźe
Berlin/Budyšin (SN/at). Budyski krajny rada Michael Harig (CDU) njebudźe jednaćelski prezident Zwjazka wuchodoněmskich lutowarnjow (OSV) w Berlinje. Tež Lipšćanski wyši měšćanosta Burkhard Jung (SPD) bě so wo zastojnstwo požadał. Dokelž njejstej so Forum sakskich wokrjesow a Forum sakskich městow na zhromadneho kandidata dorozumić móhłoj, je wukónc ćahańcy na škodu Sakskeje. Jako wupuć je so předsydstwo OSV wčera w Berlinje na to dojednało, dotalneho jednaćelskeho prezidenta dr. Michaela Ermricha ze Saksko-Anhaltskeje znowa za zastojnstwo namjetować. Zwjazkowa zhromadźizna OSV ma 24. oktobra poslednje słowo. To je wuslědk eklatantneje słabosće nawjedowanja w Forumje sakskich městow, kotryž bě Junga za zastojnstwo poručił, bě słyšeć. Wojerowski wyši měšćanosta Stefan Skora (CDU) jemu předsydari. W OSV zastupjene sakske lutowarnje maja podźěl 47 procentow na cyłkownej bilancowej sumje zwjazka, 118,6 miliardow eurow.
„Akceptuju wólby. Widźu to sportowsce“, rjekny Michael Harig, kiž wostanje dale krajny rada Budyskeho wokrjesa.
Krótkopowěsće (28.09.18)
Žony wróća so do powołanja
Budyšin. W septembrje bě we wuchodnej Sakskej 18 263 bjezdźěłnych, 442 (2,4 procenty) mjenje hač w předměsacu. Ličba bjezdźěłnych je dźě woteběrała, nic pak tak sylnje kaž w minjenych lětach. Porno lońšemu maja předewšěm žony wosebity podźěl na pozitiwnym wuwiću. Nastupajo wróćić so do powołanja, je jich podźěl jara wulki. Aktualna kwota bjezdźěłnosće je 6,5 procentow.
Azylpytaceho wupokazali
Budyšin. W dojednanju z policiju je Budyske měšćanske zarjadnistwo rozsudźiło, přećiwo dorosćenemu azylpytacemu třiměsačny zakaz přebywanja w cyłym měsće wuprajić. Přičina za rozsud je wulka ličba chłostajomnych jednanjow w krótkim času. Přećiwo njemu so we wobłuku škitanja domjaceho měra a zranjenja ćěła přepytuje.
Jednanja za kubłanski tiket
Nowy puć nětko dotwarjeny
Sakska, wokrjes a gmejna su w Bóščanskej gmejnje za dróhu inwestowali
Bóšicy (SN/MiR). Wot lěća hižo chwala sej wobydlerjo Bóščanskeje gmejny swoju K 7205. Je to nowa dróha z wotbočki S 100 pola Libona hač do Bóšic. Wčera bu druhi twarski wotrězk mjez Nowej Jaseńcu a Bóšicami oficialnje za wobchad wotewrjeny a z tym je twarska naprawa dokónčena. Při Parku 4 w Bóšicach běchu so wčera připołdnju zamołwići z boka Sakskeje, wokrjesa a gmejny kaž tež někotři wjesnjenjo zešli. Birgit Weber, přirjadnica Budyskeho krajneho rady rjekny: „Dźakowano dobremu hospodarskemu wuwiću we wokrjesu a stabilnemu połoženju etata je nam móžno kóžde lěto 20 milionow eurow do infrastruktury dróhow inwestować. Tele předewzaće je wokrjes zhromadnje z gmejnu přewjedł. Docyła bu do naprawy něhdźe 2,4 miliony eurow inwestowane.“ Gmejna je so wo dróhupřewodźacy chódnik, šěsć busowych zastanišćow, wobswětlenje wsow a zhromadny kanal za dešćikowu wodu starała.Z grafitijemi město porjeńša
Štož je w Budyšinje a wšudźe druhdźe hewak kruće zakazane, smědźa tu młodostni w tymle tydźenju cyle oficialnje činić, mjenujcy jedyn grafiti za druhim pryskać.
Budyšin (UM/SN). Njewšědnje wjele ludźi bě zawčerawšim popołdnju w Budyšinje w tunlu za pěškow mjez Žitnymi wikami a Karla Marxowej. Předewšěm młodźi ludźo so tam zhromadźichu. Mjez nimi bě Julian Wulke, kiž z tyzami barby wušiknje dźěłaše a najprjedy zelene, pozdźišo tež hinakbarbne smuhi na do toho běłu přebarbjenu sćěnu pryskaše, doniž so z tychle smuhow jendźelske słowo „peace“ (měr) formowaše.
Policija (27.09.18)
W kupnicy móšeń pokradnyli
Pančicy-Kukow. 29lětnej žonje su njeznaći minjenu póndźelu popołdnju w kupnicy Netto w Pančicach-Kukowje móšeń pokradnyli. Žona drje bě swój nachribjetnik w nakupowanskim wozu krótki čas njewobkedźbowany wostajiła. Tutu składnosć njeznaći wužiwachu a za móšnju sahnychu. Nimo wupokaza a pjenježnych kartow zhubi so tohorunja dwucyfrowa suma pjenjez. Kriminalna policija pad přepytuje a radźi, wosobinske wěcy njewobkedźbowane njewostajić.
Kóń do awta zaběžał
Prěčecy. Wjacore konje so wčera rano pola Bolborc ze swojeje pastwy wudobychu. Jedyn z nich je krótko po 5 hodź. na statnej dróze S 100 pola Prěčec do wosoboweho awta zaběžał a so při tym snadnje zranił. Skótny lěkar jeho zastara. Šofer so na zbožo zranił njeje.
Na serbski wječor
Pančicy-Kukow. Zastupjerki a zastupjerjo Domowiny, Sakskeje serbskeje rady a Załožby za serbski lud přeproša wšitkich zajimcow na zhromadny diskusijny wječor. Wón wotměje so wutoru, 2. oktobra, w 19 hodź. w hosćencu „Karstenowa piwowa stwička“ w Pančicach-Kukowje. Přeprošeni njejsu jenož aktiwni čłonojo najwšelakorišich serbskich towarstwow, ale tež jednotliwcy, serbscy młodostni a starši kaž tež politisce zajimowani. Z nimi chcedźa so wo tym rozmołwjeć, hdźe derje běži, hdźe klaca a kak móhli jich skutkowanje podpěrać. W srjedźišću steja prašenja wopytowarjow. Organizatorojo wjesela so na čiłu diskusiju.
Parkowanišćo ponowja
Pjenjezy za płuwarnju a woboru
Běła Woda (AK/SN). Swoju płuwarnju chce město Běła Woda modernizować. Za twarske změny přewostaji wone 63 000 eurow. Tole su měšćanscy radźićeljo na swojim wčerawšim posedźenju z jednym wzdatym hłosom wobzamknyli.
Ponowić maja so roły za chlorowy płun. Tuchwilne su dodźeržane a płun zdźěla přepušćeja. Tele roły w płuwarni dale wužiwać, njeby jenož zakazane było, ale tež njezamołwite. „Tohodla dyrbja so wone wuměnić“, rěka w předłoze za wobzamknjenje. Za pjeć přewětrjenske připrawy dyrbja nowe regulatory zatwarić. Dale ma so za techniku płuwarnje nowe procesorowe wodźenje instalować. Wone je wažne za dodawanje chlora do wody a runje tak za rjedźenje a sćoplenje wody. Wšitke trěbne daty so wot procesoroweho wodźenja wobdźěłaja.
Dołha suchota a wobstajnje horce temperatury drje běchu w lěću ...
Přidatne srědki rozdźělili
Krótkopowěsće (27.09.18)
Złoži mandat kónc oktobra
Drježdźany. Serbski zapósłanc a bywši sakski ministerski prezident Stanisław Tilich (CDU) 31. oktobra swój mandat w krajnym sejmje złoži. Wón postupuje tak, kaž hižo dlěši čas přizjewjene, a njeje přičiny mjenował, zdźěli wčera rěčnik Sakskeho krajneho sejma. Naslědnik po krajnej lisćinje CDU móhł Jörg Markert być. Krajny wólbny nawoda je so jeho hižo prašał, hač mandat přiwozmje.
Naprašowanje nětko online
Budyšin. Wobšěrne naprašowanje Domowiny je nětko tež online pod adresu https://www.soscisurvey.de/DomowinaBefragung/ w hornjoserbskej, delnjoserbskej a němskej rěči přistupne. Wotmołwy, kotrež maja so tež po tymle puću hač do 14. oktobra zapodać, wuhódnoći agentura Methodenberatung Jahn z Lipska. Domowina nima žadyn přistup k jednotliwym wotmołwam.
Syći Via Regia přistupił
