Krótkopowěsće (28.05.18)
Dalše pjenjezy k dispoziciji
Drježdźany. Za mjezy přesahowace projekty su dalše 7,4 miliony eurow z programa Interreg Pólska-Sakska 2014–2020 k dispoziciji, zdźěli wčera sakske wobswětowe ministerstwo w Drježdźanach. Spěchować maja so zhromadne přirodne a kulturne herbstwo, regionalna mobilita, mjezy přesahowace wu- a dalekubłanja kaž tež partnerske zhromadne dźěło.
Slědźa w nadawku UNESCO
Choćebuz. UNESCO je prof. dr. Annu Amelinu jako mějićelku specifiskeje katedry w fachowym wobłuku mjezykulturalita Braniborskeje techniskeje uniwersity (BTU) Choćebuz-Zły Komorow wobkrućiła, kaž BTU dźensa wozjewi. Delnjołužiske wysokošulske kubłanišćo přisłuša wubranej syći dwanaće katedrow po cyłej Němskej za přeslědźenje kulturneho namrěwstwa UNESCO.
Hudźbny festiwal zahajeny
Zazběh wobnowjenja znateho mosta
Policija (25.05.18)
Konjacy zapřah twochnył
Njedźichow. Bjez kontrole bě zawčerawšim připołdnju konjacy zapřah w Njedźichowje po puću. 65lětny wobsedźer bě swojej konjej runje před wóz zapřahnył, jako so jedyn z njeju stróži a poda so hromadźe z tamnym konjom a wozom po Kulowskej dróze do směra na zwjazkowu dróhu B 97. Tam powali zapřah wobchadne znamjo. Připadnje přitomnemu znatemu wobsedźerja brunačow so poradźi zapřah zadźeržeć. Ludźo so při „wulěće“ na zbožo žani zranili njejsu, jedyn z konjow so při klamje zrani.
Na muzejowy swjedźeń
Njeswačidło. Mjeztym hižo 14. muzejowy swjedźeń wotměje so njedźelu, 27. meje, wot 13 hodź. na Njeswačanskim torhošću. Wo lóštnu zabawu postara so tam hudźbne ćěleso Morawscy wagabundźa. Tež woblubowane rjemjeslniske wiki zaso na Parkowej a na dwěmaj dworomaj přewjedu. Wětrowski klub oldtimerow so tohorunja předstaji. Dźěći zakładneje šule rejuja publikumej k wjeselu. Tež zumba a aerobic-poskićenja steja na programje. Dale budu wopytowarjo na cyrkwinu wěžu zalězć móc. W domizniskim muzeju a w hrodowym parku su wodźenja předwidźane. Wjesne towarstwo Přećeljo domizny a kultury wjeseli so na mnohich zajimowanych wopytowarjow.
Na zjawny přednošk
Budyšin. Wjacerěčnosć jako wužadanje a wobohaćenje je tema zjawneho přednoška w Budyskim Serbskim instituće štwórtk, 31. meje, w 14 hodź. Referować budźe prof. dr. Dieter Halwachs z Uniwersity Graz, a to wo aktualnej rěčno-kulturnej mnohotnosći w Grazu. Přednošk budźe němskorěčny.
Brigada dwójce koncertuje
Tučasne poměry njespokojeja
Delanscy radźićeljo bychu rady wjace za swoju gmejnu wuskutkowali
Róžant (JK/SN). W gmejnje Ralbicy-Róžant je dźeń a ćešo nadawki na dobro komuny a wobydlerjow zmištrować. Byrnjež za najwšelakoriše projekty spěchowanske srědki dóstała, ma gmejna postajeny swójski podźěl zwjesć. Hižo tón pak jeje tuchwilne móžnosće často přesahuje. Hladajo na trěbny nowotwar pěstowarnje w Ralbicach je to chutny a dorazny signal politikarjam, poměry změnić. To bě tež wuprajenje wjacorych radźićelow na wčerawšim posedźenju gmejnskeje rady. Sakska a Zwjazk w pjenjezach runjewon płuwatej, gmejny pak njemóža najwažniše nadawki zwoprawdźić.
Nowy wonkowny napohlad dóstawatej tele dny dwě postawje na dworje ...
Krótkopowěsće (25.05.18)
Chce so z kulturnej stolicu stać
Žitawa. Město Žitawa chce so ze swojej němsko-pólsko-čěskej wokolinu wo titul europskeje kulturneje stolicy 2025 požadać. Po słowach wyšeho měšćanosty Thomasa Zenkerta (Žitawa móže wjace) zdźěłaja přichodne měsacy koncept. Hornjołužiske města, wokrjes Zhorjelc a susodźa w Čěskej a Pólskej požadanje podpěruja. Nimo toho maja kooperaciske zřěčenje ze słowjenskej Novej Goricu, kotraž so tohorunja wo titul prócuje.
Nowe čisło digitalnje wušło
Budyšin. Dalše čisło informaciskeho łopjena „Naša Domowina digitalnje“ je dźensa wušło, kaž Domowinski zarjad zdźěla. Temy mjez druhim su zwołanje 19. hłowneje zhromadźizny Domowiny kaž tež přeprošeni na dźeń wotewrjenych duri w Muzeju Měrćina Nowaka-Njechorńskeho a na VIII. mjezynarodny festiwal dudakow w Slepom.
Měnjernje skónčnje fairniše?
Wulki swjedźeń z nowosćemi
Budyšin (SN/MWj). Drje runje prawe wjedro wupytali su sej organizatorojo 1 016. Budyskeho nalěća, kotrež so wot jutřišeho hač do njedźele w sprjewinym měsće wotměje. Po wěšćenju wjedrarjow chce swjaty Pětr Budyšanow a jich hosći z wjele słóncom a lětnimi temperaturami zapleńčić. Wonkowne wuměnjenja za wulki měšćanski swjedźeń njemóhli tuž lěpše być. Tež wobsahowje su sej zamołwići w radnicy tójšto wumyslili. Wjace hač 500 sobuskutkowacych wuhotuje na Žitnych wikach, Hłownym torhošću a Mjasowych wikach kulturne programy. Nowe budźe jewišćo w saněrowanej rozwalinje Mnišeje cyrkwje na Wulkej Bratrowskej. Dalša nowosć je limitěrowany nopach z Budyskim motiwom, kotryž hodźi so wšudźe wróćić abo tež sobu domoj wzać.
Za „Krónu“ kompromis našli
Wo přichodźe měšćanskeje hale hišće ničo njerozsudźene
Budyšin (CK/SN). Po ani poł hodźinje bě wčerawše wurjadne posedźenje Budyskeje měšćanskeje rady nimo. W jeničkim dypku dnjoweho porjada je so přemóžaca wjetšina radźićelow za to wuprajiła, wo kupje „Króny“ znowa jednać. Dwaj radźićelej so hłosa wzdaštaj. Hižo na posedźenju 25. apryla bě dwaceći radźićelow za kup hłosowało, ale tež jědnaće přećiwo njej. Na to zapołoži wyši měšćanosta Alexander Ahrens (SPD) swój weto, hłownje tohodla, dokelž njebě jasne, za čo ma so areal wužiwać. Kaž wón informowaše, je runje wčera twarske naprašowanje do radnicy dóšło, a to wot ludźi, kotřiž so za „Krónu“ hižo zajimowachu, jako ležeše płaćizna hišće pola 3,4 milionow eurow.
Policija (24.05.18)
Wobskorženeho zajeli
Kamjenc. Dokelž so 32lětny wobskorženy na sudnistwje přizjewił njebě, byrnjež jeho pisomnje napominali, da justica jeho z wukazom zajeća pytać. Zastojnicy nańdźechu muža zawčerawšim rano na Jěžowskej dróze w Kamjencu, hdźež jeho zajachu. Sudnik na to rozsudźi, zo ma wón hač do spočatka sudniskeho jednanja w jastwje wostać. Tajki njedobrowólny přebytk za lěsycami móhł sej muž zalutować, by-li, kaž wot sudnistwa žadane, na prěnim jednanskim terminje přitomny był.
