Marwu El-Sherbimi wopominali

Drježdźany. Wosom lět po morjenju Marwy El-Sherbini w Drježdźanach su Egyptowčanku sobotu wopominali. Rada wukrajnikow a přihotowanski kruh wopominanja běštej, kaž minjene lěta, wobydlerjow namołwałoj před krajnym sudnistwom běłe róže połožić. W twarjenju bě skućićel 1. julija 2009 młodu žonu z hidy na wukrajnikow zakłół.

Pěskowcowy blok wotstronili

Hřensko. Nawodnistwo narodneho parka Čěska Šwica je 60 tonow ćežki a třiceći kubiknych metrow wulki pěskowcowy blok wotstronić dało. Kamjeń hrožeše na sylnje wužiwanu turistisku šćežku pola skalneho mosta Pravčická brána padnyć. Tajki zasah do njemylenych přirodnych wobstejnosćow narodneho parka je skerje wuwzaće, bě pak trěbny.

Mjenje howjadow, wjace swini

Kamjenc. W Sakskej je tak mało howjadow kaž dołho nic. Z něhdźe 487 500 skoćatami je wobstatk na najnišim stawje po lěće 2008, zdźěla krajny statistiski zarjad w Kamjencu. Najbóle woteběrała je ličba dejkow, tuchwilu je jich w swobodnym staće hišće 183 000. Porno tomu je so ličba swini wo 0,2 procentaj na nětko 654 600 skoćatow zwyšiła.

Nadróžnych twarnišćow je tuchwilu dosć. Zo so runje za čas prózdnin wjele twari, njezadźiwa, wšako je nětko mjenje wobchada hač hewak. Štóž pak přiwšěm wšědnje na dźěło jězdźi, žno dyrbi sej derje přemyslić, po kotrym puću najlěpje swój cil docpěje, zo by jenož te wokołopuće na so wzał, kotrež su njewobeńdźomne. Runje tele rozmyslowanje jako šansu wobhladować a njeskoržić je nastajenje, z kotrymž po mojim zdaću najlěpje tajki napjaty čas přetraješ. A tak widźi to tohorunja pjekar Maik Zelnak w Pančicach-Kukowje – jedyn z tych rjemjeslnikow a přemysłownikow, kotřiž su tuchwilu wot tamnišeho wulkeho twarnišća po­trjecheni. Mi so lubi, kak wón tele wuž­a­- danje z wěstej lochkosću, ale přiwšěm z połnej koncentraciju akceptuje a kak z tym wobchadźa. Móhł sej derje předstajić, zo jeho přichodne měsacy skerje zesylnjeja hač wosłabjeja. Marian Wjeńka

Nowowutworjeny hort w Njebjelčanskim dźěćacym dnjowym přebywanišću zaběraše wčera čłonow tamnišeje gmejnskeje rady. Po tym zo běchu so rozsudźili, swójski hort wu­tworić, je nětko tež jasne, kelko maja starši za njón płaćić.

Pěskecy (SN/MWj). Za přebywanje swojich dźěći w nowowutworjenym horće w Njebjelčicach změja starši runje telko płaćić, kaž hdyž bychu jich dźěći we Worklecach do horta chodźili. „Na te wašnje nima nichtó njelěpšiny z toho, zo jeho dźěćo do Njebjelčanskeho horta chodźi“, rjekny wjesnjanosta Tomaš Čornak (CDU) na wčerawšim posedźenju gmejnskeje rady w Pěskecach.

Krajny a wokrjesny młodźinski zarjad stej mjeztym přihłosowałoj, zo móža za 14 holcow a hólcow 1. lětnika w šulskim lěće 2017/2018 w Njebjelčanskej pěstowarni hort wutworić. Rjadować pak nětko hišće dyrbja, kak transport dźěći po šulskej wučbje z Worklec do Njebjelčic organizuja a kak tomu zadźěwaja, zo je tele jězdźenje z přidatnymi wudawkami zwjazane.

Smědźa hort powjetšić

Worklecy. Sakski krajny młodźinski zarjad je Worklečanskej gmejnje dowolił, zo smě wot šulskeho lěta 2017/ 2018 swój hort wo 15 na cyłkownje 95 městnow powjetšić. Kaž wjesnjanosta Franc Brusk (CDU) zdźěli, pak to woznamjenja, zo dyrbja w šuli dalšu rumnosć za hort woprować. Byrnjež připrajenje dotal jenož ertne było, móža rumnosć hižo nětko přihotować.

Lěhwo dyrbi wupadnyć

Choćebuz. Delnjoserbske młodźinske lěhwo Rěčneho centruma WITAJ lětsa wupadnje, kaž delnjoserbski rozhłós rozprawja. Jeničce třo zajimcy běchu so přizjewili, poskićił bě RCW dwaceći městnow. Přizjewjeni zajimcy móža so na Witaj-campje wobdźělić, kotryž budźe wot 6. do 11. awgusta w Jarješku. Přizjewjenja za njón su hač do 16. julija móžne.

Dźěłowe wiki dale pozitiwne

Budyšin. We wuchodnej Sakskej je wuwiće na dźěłowych wikach dale pozitiwne, rjekny dźensa Ilona Winge-Paul z Budyskeje agentury za dźěło. Kónc junija bě 20 505 ludźi bjez dźěła, 2 740 mjenje hač před lětom. Kwota bjezdźěłnosće wučinja 7,2 procentaj. Budyska agentura móže něhdźe 4 500 swobodnych dźěłowych městnow posrědkować.