Budyšin (SN). Jednaćelstwo Zwjazka carity Hornjeje Łužicy přewozmje wot 1. julija Andreas Ošika z Worklec. Jeho je čłon předsydstwa, farar Martin Prause, za nowe skutkowanišćo požohnował, a předsyda předsydstwa Andreas Johne wupřa jemu za nowostart w Budyšinje wjele zboža. Zdobom dźakowaše so Manueli Pöpelowej, kotraž je zwjazk w minjenych třoch lětach wuspěšnje a z angažementom nawjedowała. Wona přewozmje wot jutřišeho zaso swoje poprawne městno jako nawodnica zarjadnistwa Carity.
Chrósćicy (aha/SN). Na poslednjej zhromadźiznje do lětnjeje přestawki zaběraše so wčera Chróšćanska gmejnska rada z dodatnymi wustawkami „Chrósćicy – Hórnikowa“. Sobudźěłaćerka Budyskeho architektneho běrowa Panse Elisa Menzel přednjese wotwažowanje zapodatych stejišćow nošerjow zjawnych zajimow a zjawnosće. Kaž naćisk změnjenych wustawkow předwidźi, ma so něhdźe 2 000 kwadratnych metrow dotal wonkowneho wobłuka zapřijeć do nutřkowneho. Pokiwy a poručenja zapodachu krajny zarjad za wobswět, ratarstwo a geologiju, wopłóčkowy zaměrowy zwjazk Při Klóšterskej wodźe, ENSO kaž tež twarski a přirodoškitny hamt krajnoradneho zarjada.
Zamołwita za financy zarjadniskeho zwjazka při Klóšterskej wodźe Franciska Čapikowa přednjese wčera někotre změny k lětušemu hospodarskemu planej, kotryž bě nětko w juniju wupołoženy. Radźićeljo jemu přihłosowachu.
Nowy móst nad Klóšterskej wodu a wutwar statneje dróhi S 100 w Pančicach-Kukowje je tuchwilu z wotstawkom najwjetše nadróžne twarnišćo w dwurěčnych gmejnach. Z tejle seriju chcemy twarnišćo přewodźeć a starosće tamnišich wobydlerjow wobswětlić.
Mjeztym połdra měsaca je statna dróha S 100 w Pančicach-Kukowje zawrjena. Ludźo su so na to zwučili, zo dyrbja zdźěla dosć dołhe wokołopuće na so brać. Tak tež pjekar Maik Zelnak, kiž pak ma hišće cyle hinaše starosće. Wón ma při swojej pjekarni napřećo klóštrej předawarnju a dalšu w kupnicy Netto a je takrjec dwójce wot twarnišća potrjecheny. „Dokelž bě hižo do toho wotwidźeć, zo ludźo w delnim wobchodźe nakupować móc njebudu, smy tule wot srjedź meje časy redukowali a začinjamy hižo w dźesaćich. To je někak čas, hdyž smy w pjekarni dodźěłali. Po tym zwožu wšitke twory do hornjeje předawarnje w Netto“, pjekar rozłožuje. Deleka žanu předawarku hižo nima, ale zwjetša sam twory předawa.
Zhorjelc (UM/SN). Z wulce zapołoženym projektom chce Zhorjelski wokrjes swoje zarjadnistwo modernizować. Na wčerawšim posedźenju wokrjesneho sejmika staj krajny rada Bernd Lange (CDU) a za financy zamołwity přirjadnik Thomas Gampe (njestronjan) zakładne směrnicy koncepta „zarjadnistwo 4.0“ předstajiłoj.
Kniha Meškanka wušła
Budyšin. W Praskim nakładnistwje Milan Hodek je wušła kniha Tima Meškanka „Bjez wčerawšeho dnja njeje jutřišeho“. W nim wěnuje so priwatny docent w třoch wobšěrnišich přinoškach powójnskim stawiznam serbskeho šulstwa, Domowinje jako zastupjerce zajimnow SED a měrliwej rewoluciji w Serbach. W přiwisku wozjewjene su dokumenty wo prawniskim rozestajenju mjez nim a Dyrlichec mandźelskimaj.
Najšpatniše wišnjowe lěto
Podstupim. Po zmjerzkach w aprylu liča lětsa w Braniborskej z najšpatnišimi wišnjowymi žnjemi po přewróće. Po trochowanjach změja runje 230 tonow słódkich a 400 tonow kisałych wišnjow. Tak su žně wo 96 procentow snadniše hač w dotal najlěpšim lěće 1992, zdźěla statistiski zarjad w Podstupimje. Tež w Sakskej drje budu „podpřerězne“ žně.
Mormonojo matrikle kopěruja
Do něhdyšeje zakładneje šule w Njeswačidle je zaso žiwjenje zaćahnyło. Na chódbach pak žana hara wjace słyšeć njeje. Měr je zaćahnył do twarjenja, kotrež nima ničo šulske wjace na sebi. Staroba nětčišich wobydlerjow je chětro wysoka.
W domje, kotryž za naročny zaměr wobhospodarjerja jara přijomnje bjezposrědnje při hrodowym parku leži, wěnuje so hladanska słužba advita hladanju starych ludźi. Nimo starobje wotpowědneho a přewodźaneho bydlenja poskićeja w domje dnjowe zastaranje a wěnuja so wosebje skupinje na demencu schorjenych, kotraž z fachowym přewodom w domje hromadźe bydli.
Wjac hač jenož
starych hladać
Paduši hłódni byli
Wojerecy. Wobsedźerka kantiny na Wojerowskej industrijowej přestrjeni dyrbješe zawčerawšim zwěsćić, zo běchu so pola njeje na dnjach do toho njeznaći zadobyli. Po wšěm zdaću woni z hłodom tradachu, přetož z kuchnje běchu žiwidła w hódnoće 670 eurow sobu wzali. Nimo toho načinichu něhdźe 200 eurow wěcneje škody.
Malešecy (CS/SN). Dźewjeć sobudźěłaćerjow Malešanskeje gmejny, kotřiž su dotal w komunje šulske a pěstowarske rumnosće rjedźili, přeńdźe wot 1. awgusta do priwatneje firmy. Tole je Malešanska gmejnska rada zawčerawšim wobzamknyła. Radźićeljo chcychu to hižo na zašłym posedźenju činić, běchu pak swój rozsud tehdy přestorčili.
Nětko je jasne, zo Budyska rjedźenska firma RmTV sobudźěłaćerjow gmejny Malešecy přewozmje, a to najprjedy raz na dwě lěće. Dale je předwidźane, zo woni na samsnych městnach kaž dotal samsne nadawki zmištruja. Gmejna so nadźija, zo z wurjadowanjom swojich sobudźěłaćerjow lětnje něhdźe 100 000 eurow zalutuje. Dokelž su Malešansku wyšu šulu hakle njedawno do nošerstwa wokrjesa dali, radźićel dr. Jürgen Wengler na tym dwělowaše, hač je prawnisce w porjadku, zo nětko tam dźěłace rjedźerki druhemu dźěłodawarjej přewostaja. Hačrunjež wjesnjanosta Matthias Seidel (CDU) wobkrući, zo ma so wšitko po zakonju, zwostachu mjez někotrymi radźićelemi dwěle. Štyrjo z nich hłosowachu tuž přećiwo namjetej.
W swojej lětušej dowolowej seriji předstajamy wosoby, kotrež na někajkežkuli wašnje stawizny zachowuja, zo starožitnosće zběraja a je zdźěla zjawnosći spřistupnjeja.
Njewšědnu zaběru pěstuje Łazowčan Karl-Heinz Kunisch. Wukubłany inženjer zaběra so z wuwićom radijoweje techniki a je w běhu lětdźesatkow wulke mnóstwo radijow znosył. Najstarše eksponaty pochadźeja z časa spočatkow wusyłanskeje techniki. 1923 instalowachu w Berlinje prěni němski sćelak, kotrehož wusyłanja móžachu tehdy jeno z detektorami a słuchatkami přijimać. Najstarše radijo Kunischa z lěta 1925 zaběra wězo hódne městno, ale tež te wo dwě lěće pozdźišo twarjene typa Mende E 45, wuhotowane ze słuchatkami kaž tež ze zwukowej trubjelcu jako wótřerěčak.