Na konju jěchajo do Konjec
Kóžde lěto znowa tež w Šunowje a Konjecach meju mjetaja. 13 porow młodźiny a 13 dźěćacych poda so tuž minjenu njedźelu popołdnju do Šunowa, zo bychu tam wokoło meje rejwali. K tomu hraješe Pětr Měškank na akordeonje, a znaty braška Rajmund Čórlich wjedźeše lóštnje po programje. Meja padny, a jako prěni doběža sej Paul Matka po mejski wjeršk a wupyta sej Piju Bjeńšec za swoju kralownu. Młodostni k někotrym serbskim štučkam zarejwachu, a tójšto přihladowarjow k tomu mócnje sobu spěwaše. Kralowski porik poda so na konju jěchajo do Konjec. Mejski ćah přihladowarjo spěwajo přewodźachu.
Dźěłowy kruh wuradźował
Pančicy-Kukow (SN). Čłonojo dźěłoweho kruha „Žiwidła su hódne“ zetkachu so njedawno w zežiwjenskim a zelowym centrumje w Pančicach-Kukowje k swojemu prawidłownemu wuradźowanju. Kruhej přisłušeja zastupjerjo ministerstwow, towarstwow, institucijow a zawodow zežiwjenskeho hospodarstwa Sakskeje. Na spočatku předstajichu jim aktiwity w prěnich štyrjoch měsacach lěta. Tak bě so Miłočanski Křesćansko-socialny kubłanski skutk wuspěšnje na Zelenym tydźenju w Berlinje wobdźělił. Na kóncu wobhladachu sej wustajeńcu „Bjez zbytkow derje jěsć“, kotraž je hač do kónca septembra přistupna.
Městna njedosahaja
Na wólby derje přihotowani
Wustawki za čestnohamtskich pomocnikow změnili
Njeswačidło (JK/SN). Wólbni pomocnicy Njeswačanskeje gmejny smědźa so z dobrym swědomjom na njedźelne wólby hotować. Hišće sčasom je tamniša gmejnska rada na swojim wčerawšim posedźenju wobzamknyła, změnić wustawki wo zarunanju dźěła čestnohamtskich wólbnych pomocnikow w gmejnje. Nětko dóstanu woni w Njeswačidle runje telko zarunanja kaž w susodnymaj gmejnomaj Rakecy a Bóšicy. To moralku pomocnikow zawěsće pozběhnje, wšako maja njedźelu hnydom troje wólby zmištrować. Nastupajo 1 680 wólbokmanych drje budźe wuličenje hłosow w dwěmaj wólbnymaj lokalomaj dobru chwilu trać. Prawe hódnoćenje tajkeho zamołwiteho dźěła je, zo zarunaja jim to nětko z třiceći eurami. Krajnoradny zarjad so podźělnje na tym wobdźěli, wšako budu tež kandidaća za wokrjesny sejmik a Europski parlament woleni.
Wjele pjenjez za „čerstwu zeleń“
Kamjenc so tež rady „zelene město“ mjenuje. Tomu wotpowědnje wudawa w běhu lěta wjele pjenjez za to, wudźeržować parki a zelenišća – lětsa něhdźe 695 350 eurow.
Kamjenc (SN/mwe). Za prawidłowne trawusyčenje abo kóždolětne wurězanje štomow je to něhdźe 27 000 eurow. Za dźěła na Pastwinej horje, hladanje parkow a naměstow, hrajkanišćow kaž tež wopomnišćow ma Lessingowe město tónkróć něhdźe 576 350 eurow zaplanowanych. Kóžde lěto sadźeja nalěto a w lěću kwětki a dalše rostliny do sudobjow, za čož nałoža 6 500 eurow a něhdźe 6 000 eurow za material.
Kaž Thomas Käppler, referent Kamjenskeho wyšeho měšćanosty Rolanda Dantza (njestronjan), našemu wječornikej na naprašowanje zdźěli, maja syčenje trawy, hladanje štomow a kerkow kaž tež jich wobstajnu kontrolu a wurězowanje jenož fachowcy na starosći. Kóšty za wudźeržowanje a wozelenjenje při dróhach wučinjeja něhdźe 86 000 eurow.
Woblubowane wuhladnišćo „Zerzawy hózdź“ při Žornowskim ...
Dobre znamjo
Ma přirodoškit za wažny nadawk
„Runowaha zaruča wobstajnosć. Pušćeš-li wjac štomow, hač sadźeš, pak přirodu ničiš.“ To je objektiwne zhladowanje Christiana Budera na strowy wobswět. Jeho mjeno steji na lisćinje zjednoćenstwa Rjemjesło a přemysło za Njeswačansku gmejnsku radu.
Lubosć k přirodźe staj staršej dźensa 61lětnemu do kolebki połožiłoj. Runja jemu bě nan blidar, mać pochadźeše ze serbskeje ratarskeje Panachec swójby we Łomsku. Přirodoškit wobhladuje Buder jako wužadacy nadawk tež na komunalnej runinje. „Maš jenož hišće mało łastojčkow, a scyła je so w přirodźe wjele pohubjeńšiło. Dyrbimy sej swojeje zamołwitosće wědomi być a njesměmy ničenju stwórby bjezradni přihladować.“
Čestne měšćanstwo Schrammej
Budyšin (SN/mwe). Christiana Schramma, něhdyšeho wyšeho měšćanostu Budyšina jako čestneho wobydlerja wuznamjenić, to wobzamknychu radźićeljo na zašłym posedźenju Budyskeje měšćanskeje rady. Nětčiši wyši měšćanosta Alexander Ahrens (SPD) w swojim pledoajeju emocionalnje wuzběhny, zo měli so wobydlerjo jeho předchadnikej dźakować, zo je město Budyšin dźensa tajke žiwjenjahódne. Ahrens wosebje wobdźiwaše, zo bě Christian Schramm w 1990tych lětach zamóhł při běžnym dźěle fungowace zarjadnistwo wutworić.
Wuslědki njesprócniweho skutkowanja bywšeho wjelelětneho wyšeho měšćanosty wšak su dźeń wote dnja widźomne, hdyž móža Budyšenjo wopytowarjam nimale dospołnje saněrowane stare město prezentować, swoje dźěći do modernych šulow słać abo w Centeru na Žitnych wikach nakupować. Zdobom słušeše hospodarstwo k ćežišćam dźěła Schramma. Wšako dźensa wšědnje wjace hač 18 000 ludźi do Budyšina na dźěło jězdźi. 25 lět je wón sprjewinemu městu wobličo dawał a je tež jako kulturnu stolicu Serbow we wšelakich gremijach zastupował.
Krótkopowěsće (22.05.19)
Wjelki tema w kabineće
Berlin. Po wjele diskusijach předpołoži zwjazkowe knježerstwo skónčnje naćisk wjelčeho zakonja. Tón je kabinet dźensa w Berlinje schwalił. Přichodnje budźe lóšo problematiske wjelki třěleć směć. Přiwšěm budźe stajnje hišće wotpowědna dowolnosć trěbna. Wowčerjo zakoń jara witaja. Wobswětoškitna organizacija BUND plany kritizuje.
Zhladuja na róčnicy
Podstupim/Choćebuz. Serbski zakoń Braniborskeje wobsteji 25 lět, pjeć lět skutkuje knježerstwowa społnomócnjena za naležnosće Serbow w susodnym zwjazkowym kraju. Přiležnosć to ministerstwu za wědomosć, slědźenje a kulturu wuhotować póndźelu, 27. meje, zarjadowanje z přeprošenymi hosćimi w Choćebuskim Delnjoserbskim gymnaziju, zo bychu na wobě róčnicy zhladowali.
Nihdy njezabyć
Policija (21.05.19)
Peugeot so wupalił
Budyšin. W Budyskej Strowotnej studni je so wčera něhdźe w 23 hodź. awto paliło. Na parkowanišću blisko kupnicy steješe Peugeot z dotal njeznatych přičin w płomjenjach. Najebać spěšne hašenje měšćanskeje wohnjoweje wobory so awto dospołnje wupali.
Žona w awće zatłusnjena
Kamjenej. Na B 96 je wčera popołdnju wodźer VWja T-Roca w Kamjenej pola Rakec blisko wotbóčki K měznikej do napřećo přijěduceho nakładneho awta zajěł. Při tym zatłusny so we wosobowym awće sobujěduca, kotruž móžachu hakle wohnjowi wobornicy wuswobodźić. Žonu su z helikopterom do chorownje dowjezli. Šofer awta so lochko zrani, wodźer Lkw-ja wosta njezranjeny.
Ćežko zranjenaj
Chróstawa. 22lětny šofer Audija zrazy wčera připołdnju pola Chróstawy frontalnje do napřećo přijěduceho Citroëna 74lětneho. Wobaj so tak ćežko zraništaj, zo dyrbjachu jeju wuchowanske mocy do chorownje dowjezć. Sobujěduca Citroëna so lochko zrani.
