Policija (10.12.18)
Třěchikryjerski skład wopor wohenja
Hornja Hórka. Tójšto dźěła mějachu wohnjowi wobornicy kónc tydźenja w Hornjej Hórce. Pjatk wječor wołachu jich na Šulsku, hdźež so skład třěchikryjerskeje frimy paleše. Kaž policija zdźěli, běchu w něhdźe 40 x 40 metrow wulkej hali wjetše mnóstwa palneho drjewa a twaršćizny składowane kaž tež twarski kran wotstajeny. Wšitko sta so z woporom płomjenjow. Tež twarska substanca hale je wohenja dla chětro poćerpjeła. Wosoby so njezranichu. Škodu trochuje wobsedźer na wjac hač 150 000 eurow. Kaž w rozprawje policije dale rěka, zwěsćichu wohnjowi wobornicy wjacore městna, na kotrychž bě woheń wudyrił. Kriminalna policija pad tuž nětko přepytuje.
Slědźa za předchadnikami
Běły Chołmc (AK/SN). Do kóždeje wjetšeje hłubokotwarskeje naprawy maja archeologojo składnosć, potrjecheny areal přepytować. Tak dźěłaja woni tuchwilu pola Běłeho Chołmca, hdźež přichodnje wysokonapjaty milinowód do zemje składu. Tohodla tam Veronika Büttner a Mario Steinbach po dołhosći 750 metrow slědźitaj, hač je teren archeologisce zajimawy. Z jednorym gratom so wonaj centimeter po centimetru do zemje dźěłataj. „Kóžde wurywanje je hinaše. Njewěmy do toho, što nas wočakuje“, Veronika Büttner rozłožuje.
Nimo klasikarjow nowosće
Serbski spěwny wječork za projekt w Ruskej wotměli
Jaseńca (RL/SN). Zhromadnosć mjez Serbami a hudźba stej młodostnu Judith Pjetašec z Pančic-Kukowa runje tak kaž wjace hač sto dalšich ludźi na spěwny wječork sobotu, 8. decembra, do Jaseńcy wabiłoj. Skupina PoŠtyrjoch bě mjeztym wosme lěto pospochi na beneficny koncert do bróžnje Floriana Rynča přeprosyła. Tónraz je hosćićel, kiž so wo wšu logistiku stara, zdobom sam jako hudźbnik w programje sobu skutkował, a to z dujerskej kapału Tuten und Blasen.
Zběrali su na koncerće za projekt biskopa Clemensa Pickela w ruskim Saratowje. Tam hižo wot 1990tych lět swójby mjez druhim z tym podpěruja, zo jim kruwu jako žiwjenski zakład přewostajeja. Moderator Jan Rjeda rozłoži, zo płaći jedna něhdźe 500 eurow. Wunošk wječora wučinja tysac eurow – takrjec dwě kruwje za swójbje w Ruskej.
Krótkopowěsće (10.12.18)
Bukowski dobyćer „Łužicy 2019“
Budyšin. Choćebuski dramatikar Oliver Bukowski je ze swojej dźiwadłowej hru „Syn“ wubědźowanje Budyskeho Němsko-Serbskeho ludoweho dźiwadła, Statneho dźiwadła Choćebuz a Noweho jewišća Zły Komorow „Łužicy 2019“ dobył. Nimo pjenježneho myta 10 000 eurow wopřijima wuznamjenjenje prapremjernu inscenaciju lěta 2020 w Złym Komorowje.
Zamołwja naležnosće Serbow
Zły Komorow. Anja Schmiedgen zamołwja wot 1. decembra serbske naležnosće w Złym Komorowje. Wona bu na zašłej měšćanskej radźe z wjetšinu hłosow – jeno štyrjo ze 37 běchu přećiwo tomu – do zastojnstwa powołana. Za serbske dźěło ma Schmiedgen tydźensce dwě hodźinje. Powołać zamołwitu za serbske naležnosće bě trjeba, dokelž přisłuša město wot lońšeho zaso serbskemu sydlenskemu rumej w Braniborskej.
Migraciski pakt UNO schwaleny
Policija (07.12.18)
Muža z nožom zranił
Budyšin. K namócnemu rozestajenju mjez młodymaj mužomaj je wčera popołdnju na Budyskich Žitnych wikach dóšło. Najprjedy je 20lětny Budyšan 18lětnemu z Rozwodec z pjasću mjezwoči bił. Na to wućahny na zemi ležacy 18lětny nóž, kłóješe z nim do bička a jeho wjacekróć na noze zrani. Wuchowanska słužba dyrbješe rany 20lětneho zastarać. Přiwołani policisća nóž sćazachu a pad nětko dale přepytuja.
Bjesada w sakskej stolicy
Drježdźany. Na dalšu bjesadu w maćernej rěči su Serbja, bydlacy w Drježdźanach, přeprošeni. Wobdźělnicy zetkaja so přichodny štwórtk, 13. decembra, wot 19 hodź. w hospodźe „Altes Wettbüro“ na Antonowej 8 (blisko dwórnišća Drježdźany-Nowe město). Wšitcy zajimcy, hornjo- a delnjoserbšćinu rěčacy a wuknjacy, su na rozmołwu w stolicy Sakskeje wutrobnje witani.
Mała Sněženka na předań
Budyšin. W Załožbje za serbski lud je wušoł druhi nakład woblubowaneje słuchohry „Mała Sněženka 2“ z hudźbu a spěwami Měrćina Weclicha, Bena Budarja a Hrjehorja Nawki. Hromadźe ze Sněženku dožiwja připosłucharjo wobradźenje, zymske wjesela a pryzle, wrótne sankowanje a wulki silwesterski dyrdomdej. Swěrnaj přećelej Wětřik a Měsačk staj wězo tež zaso pódla. CD za 11,90 eurow dóstanu zajimcy w Budyskimaj Serbskej kulturnej informaciji a Smolerjec kniharni.
Wjelka dla ćišć wukonjeć
Wo formulaciji w próstwje sakskemu knježerstwu emocionalnje rěčeli
Pančicy-Kukow (SN/MWj). Podobnje druhim gmejnam w zarjadniskim zwjazku Při Klóšterskej wodźe su radźićeljo w Pančicach-Kukowje na swojim wčerawšim posedźenju wobzamknyli próstwu Swobodnemu statej Sakskej wo regulaciji wobstatka wjelkow. Do toho bě k zdźěla emocionalnej diskusiji dóšło, w kotrejež wuslědku spočatnu předłohu za naćisk změnichu.
Dalše adwentne wiki kiwaja
Za wobornikow, towarstwa a dźěći
Podobnje kaž w druhich gmejnach dyrbja tež w Trjebinskej wo tym rozmyslować, kak móhli komunalnu pawšalu Swobodneho stata Sakskeje najlěpje wužiwać. Namjetow je wjele.
Trjebin (AK/SN). Jako pawšalnu připokazanku Swobodneho stata Sakskeje dóstanje gmejna Trjebin za lěta wot 2018 do 2020 stajnje po něhdźe 64 000 eurach. Na swojim posedźenju je so tamniša gmejnska rada předwčerawšim zdźěla dojednała, za čo pjenjezy zasadźić.
Trjebinska wohnjowa wobora dóstanje 1 800 eurow, z kotrymiž financuje hadźicy a podest. Za 7 000 eurow chcedźa přewětrjenje w Trjebinskim towarstwowym domje porjedźeć a hnojiwa za tamniše wonkowne připrawy kupić. Trjebinska pěstowanja „Lutki“ smě so na trampolin a słónčnu płachtu za dohromady 4 400 eurow wjeselić. Za 1 500 eurow da gmejna Trjebin hrajkanišćo w Miłorazu ponowić. Tamniši wobornicy maja nimo toho nowu škitnu drastu dóstać.
