Paduši w cyrkwi

Załom. Ani modlić so ani pokućić no-chcychu njeznaći, kotřiž běchu so prěni dźeń noweho lěta do Załomskeje ewangelskeje cyrkwje zadobyli. Woni pokradnychu tam keyboard a dalšu techniku, kotraž pódla wołtarja steješe. Dohromady bě rubizna něhdźe 3 000 eurow hódna. Kriminalisća zawěsćichu slědy a pytaja nětko za skućićelemi.

Budyšin. Přichodne zarjadowanje we wobłuku Budyskeje akademije w statnej studijnej akademiji na Lubijskej zaběra so póndźelu, 7. januara, we 18 hodź. z Budyskim spjatym jězorom. Wo nim porěči Sebastian­ Fritze, kiž je we wobłuku krajneho zarjada sakskich rěčnych zawěrow za spjaty jězor zamołwity. Mjez druhim chce wón nastaće a funkciju spjateho jězora a jeho wuznam za Sprjewju rozłožić.

Po hodownych swjatych dnjach zetka so Róžeńčan kružk pisacych na swoje kónclětne zarjadowanje. Kaž kóždy raz bě blido ze słódnymi přikuskami a kofejom pola Marije R.-Šołćineje kryte. Mjeztym hižo trochu starše dźěći hosćićelki kružkarjow z kulturnym programom zawjeselichu. Bě to wulkotne dožiwjenje, spěwy, instrumentalne kruchi a samozbasnjene přinoški słyšeć. Za to wšěm sobuskutkowacym wutrobny dźak. Tež kruž­ka­rjo běchu ze samopaslenymi­ darikami a z dobrej naladu na zeńdźenje derje přihotowani.

We Wojerowskim starym měsće planuja lětsa rozdźělne naprawy

Wojerecy (AK/SN). Po woli měšćanskeje rady Wojerec chcedźa tamniše stare město dale zaměrnje saněrować. Kaž Wojerowscy radźićeljo na swojim zašłym posedźenju wobzamknychu, ma so lisćina naprawow za předewzaća w starym měsće lětsa wo štyri naprawy rozšěrić. Tak chcedźa wonkowne připrawy při Woby­dlerskim centrumje Piwarska haska 1 porjeńšić, idejowe wubědźowanje za swobodne městna w starym měsće přewjesć, parkowanski wodźenski system zwoprawdźić a koncept za nadróžne wobswětlenje zdźěłać. Dohromady zwoprawdźa w starym měsće 29 naprawow w cyłkownym wobjimje 2,7 milionow eurow. Z toho zapłaći město jako swójski podźěl 925 000 eurow. Ze spěchowanskich horncow nadźijeja so 1,8 milionow eurow.