Přewozmu wuchowansku staciju
Budyšin (SN/JaW). Němska wuchowanska lětanska słužba (DRF Luftrettung) přewozmje w Budyšinje po nowym lěće staciju wuchowanskeje lětanskeje słužby. Wo tym informuje nowinska rěčnica DRF Sabine Bruder w nowinskej zdźělence. Němska DRF, kotraž ma swoje sydło w badensko-württembergskim Filderstadće, je za to trěbny helikopter do Budyšina pósłała.
„Wot 31. decembra hižo čerwjeno-běły moderny helikopter typa H 145 z mjenom Christoph 62 w sprjewinym měsće a wokolinje zasadźimy“, Sabine Bruder připowědźa. Zaručić maja lětacy fachowcy z Budyšina tak wšědnje a w kóždym času transport pacientow mjez klinikami kaž tež wo spěšnu pomoc při njezbožach. „Wosebitosć je specialne wuhotowanje z wuchowanskej wijawu, kotruž trjebamy za zasadźenja předewšěm w ćežko přistupnych kónčinach we wuchodnej Sakskej. Při tym dźěłamy derje z našim partnerom Hórska straža Sakska hromadźe“, Sabine Bruder wujasnja. Nimo toho wobsedźi H 145 dowolnosć, zasadźeć nócne dalokowidy (Nachtsichtgeräte). Dale ma pilotam po nocach wysokowukonity swětłomjetak pomhać.
Policija (27.12.18)
Njeluba překwapjenka
Běła Woda. Wšo druhe hač měrliwje a pokojnje započa so patoržica za wobydlerja wjaceswójbneho domu w Běłej Wodźe. Rano dyrbješe wón w swojej pincy zwěsćić, zo bě něchtó tobołu z napojemi spakosćił. Nimo toho bě pinčny kamor wočinjeny. W nim měješe škodowany swoje hodowne dariki schowane, kotrež běchu njeznaći tohorunja sobu wzali. Běchu to zastupne lisćiki za Drježdźansku Semperowu operu, kniha a škitne poćehnjenja za awto w cyłkownej hódnoće wjace hač 220 eurow.
Wohnjostroj pokradnyli
Jubilej dostojnje swjećili
Wojerecy (AK/SN). Město Wojerecy je ze swojimi hosćimi lětsa dostojnje, kreatiwnje a na přiměrjene wašnje swoju 750. róčnicu wobstaća swjećiło. Na to skedźbni tamniši wyši měšćanosta Stefan Skora (CDU) na wuradźowanju měšćanskeje rady wutoru tydźenja. Cyłkownje 75 zarjadowanjow běchu město, towarstwa, zarjadnišća a předewzaća organizowali. „Nazhonjenja z toho chcemy přichodne lěta wužiwać“, měnješe wyši měšćanosta wróćo zhladujo.
Tuchwilu nastawa kónčna rozprawa wo měšćanskim swjatku. Što bě na jubileju wusahowace? Što měli přichodnje polěpšić? A kotre trajne a do přichoda pokazowace projekty je měšćanski jubilej wujewił? Z tymi a dalšimi prašenjemi je so tež dźěłowa skupina „750 lět Wojerecy“ 13. decembra rozestajała.
Znowa připóznaće žnjeli
Hodowna stawizna na swjatych dnjach mnohim kruty termin
Róžant/Radwor/Konjecy/Bluń (SN/JaW/BŠe). W mnohich wsach a městach Hornjeje kaž Delnjeje Łužicy, mjez druhim w Budyšinje, Wojerecach, Smječkecach, Pančicach-Kukowje a Slepom, su w minjenych dnjach znowa hodownu stawiznu předstajili. Tak bě tež patoržicu popołdnju w Róžeńće. Hižo někotre lěta je tole mjez wjesnjanami, předewšěm mjez młodymi swójbami, kruty termin a přiwabja wěriwych tež z wokolnych wsow do putniskeje cyrkwje. Swoju hru wo hodownej stawiznje předstajeja Róžeńčanske dźěći mjeztym dwójce wob lěto. Druhi króć hižo běchu z njej lětsa na 2. swjatym dnju hosćo w Ralbicach a tež tam žnějachu tójšto připóznaća mnohich zajimcow. Pod nawodom wučerki Diany Šołćineje pokazachu lětsa stawiznu ze znatymi elementami a postawami Marije, Józefa a Jězusdźěćatka, wuslědźichu zhromadnje potajnu hodownu hwězdu a podachu so z pastyrjemi do Betlehema.
Krajny rada na hodownej turje
Krok dale za nowu šulu w Barće
Budyski wokrjes chce w lětomaj 2019 a 2020 inwesticije za nimale 180 milionow eurow zeskutkownić. Ćežišćo w kubłanskim wobłuku je modernizacija šulskeho stejnišća Kamjenc. Tež zarunanski nowotwar za Bartsku wyšu šulu ze sportownju a rozšěrjenje Kinsporskeje Wyšeje šule stej w dwójnym etaće wokrjesa zakótwjenej.
Budyšin (SN/at). Bjezdwěla su inwesticije do šěrokopasmoweho wutwara w nimale wšitkich komunach najwjetša suma w dwójnym etaće 2019/2020 Budyskeho wokrjesa. 105 milionow eurow maja wotpowědne dźěła płaćić, z kotrymiž su nazymu započeli a kotrež dyrbja za dwě lěće wotzamknjene być.
Wokrjesny radźićel a Malešanski wjesnjanosta Matthias Seidel (CDU) je spokojom. Česćelakomy projekt, w Barće dwučarowe wyšošulske stejnišćo w nošerstwje wokrjesa wutworić, „je so do prawych kolijow dóstał“. Za nowu sportownju chcedźa srědki sakskeho komunalneho paketa „polěpšenje šulskeje infrastruktury“ wužiwać. Dwójny etat wokrjesa předwidźi za to nimale 4,5 milionow eurow. Sportownja ma 2021, šula lěto pozdźišo dotwarjena być.
Krótkopowěsće (27.12.18)
Nowe towarstwo Škit
Hrubjelčicy. Nowe serbske towarstwo Škit je so 4. adwent w Hrubjelčicach załožiło. 16 sobustawow je Roberta Krawca za předsydu wuzwoliło. Čłonojo towarstwa chcedźa serbske wuměłstwo, hudźbu a rěč škitać a podpěrać kaž tež digitalne poskitki za skrućenje identity našeho ludu rozšěrić. Wotpohladuja so wo status zapisaneho towarstwa prócować.
Twarić w Sakskej dźeń a dróše
Kamjenc. Štóž chce w Sakskej twarić, ma za to dźeń a wjace pjenjezy nałožić. Kaž Statistiski krajny zarjad w Kamjencu dźensa zdźěla, su w přerězku lěta twarske kóšty za bydlenske twarjenje wo 5,4 procenty přiběrali. Porjeńšace reparatury w jednym bydlenju so wo 6,2 procentaj, naprawy k zwuporjedźenju na bydlenskich twarjenjach wo 6,1 procent podróšachu.
Pytaja za čěskej symboliku
Spodobny program předstajili
Dołho trajacy přiklesk pjatk do druheho adwenta w Ralbičanskej sportowni płaćeše předewšěm 118 holcam a hólcam tamnišeje zakładneje šule za jich nimale dwuhodźinski dohodowny program.
Runočasnje pak bě to připóznaće staršich, dźědow a wowkow a dalšich hosći – mjez nimi bě tež wjesnjanosta delanskeje gmejny Hubertus Ryćer (CDU) – wučerce Weronice Statnikowej, kotraž měješe kulturnu zamołwitosć za wobsahowe wuhotowanje. Wo to je so wona wot lěta 1992, tehdy na žurli hosćenca w Sernjanach prěni raz přewjedźenym koncerće, swěru starała. W slědowacych lětach je wona wobsahowje na dobrym niwowje poskićeny program na žurli Šunowskeje Fabrikskeje hospody zaručiła. Tola tež tam so bórze wopokaza, zo městna njedosahaja.
Biblioteka zawrjena
Kamjenc. Měšćanska biblioteka w Lessingowym měsće wostanje wot 24. decembra do 2. januara zawrjena. W tym času maja zajimcy składnosć, digitalne wupožčowanje Onleihe wužiwać, hdźež móža sej e-booki wupožčić. Wot štwórtka, 3. januara 2019, budźe knihownja zaso wotewrjena.
Zaso so nawróćić?
Budyšin. Štwórtk, 27. decembra, wotměje so na wulkej žurli Budyskeho krajnoradneho zarjada „bursa nawrótnikow“. Wot 10 do 14 hodź. změja zajimcy, kotřiž tuchwilu hišće zwonka domizny dźěłaja, chcedźa pak so zaso nawróćić, přiležnosć wo dźěłowych městnach we Łužicy so informować.
Wo Kitu husličkarju
Budyšin. Dźěći móža so na dalše předstajenje klankohry „Kito husličkar“ wjeselić, kotruž 27. decembra w 10 hodź. w Budyskim Dźiwadle na hrodźe předstaja. Dokelž Kito hudźbu lubuje, by so najradšo z husličkarjom stał.
Kupjel po hodźoch zaso přistupna
Kamjenc. Kamjenska halowa kupjel wostanje wot 24. do 26. decembra zawrjena, wot 27. do 30. decembra pak budźe wot 9 do 18 hodź. přistupna. Tež silwester a Nowe lěto njebudźe tam móžno so kupać, hakle 2. januara wot 9 do 20 hodź. kaž tež 3. a 4. januara wot 9 do 22 hodź.
Agentura zawrjena
