K jubilejej na serbskosć wsy dopominali

wutora, 18. junija 2019
artikl hódnoćić
(0 )
Na swjedźenskim ćahu k jubilejej Sprjejc je tohorunja Nowoměšćanski serbski kwasny ćah sobu wobdźěleny był.  Foto: Jost Schmidtchen Na swjedźenskim ćahu k jubilejej Sprjejc je tohorunja Nowoměšćanski serbski kwasny ćah sobu wobdźěleny był. Foto: Jost Schmidtchen

Sprjejcy (JoS/SN). Za Sprjejcami w gmejnje Sprjewiny Doł leži składnostnje 600. róčnicy prěnjeho naspomnjenja swjedźenski tydźeń, kaž drje jón wjes hišće dožiwiła njeje. Hromadźe z wobydlerjemi, gmejnu, wohnjowej woboru, cyrkwju a mnohimi dalšimi partnerami běchu jón předewšěm čłonojo póstniskeho a tradiciskeho towarstwa cyłe lěto přihotowali. Wuzběhnyć maja so dopomnjenki na serbsku zašłosć wsy, kotrež su tež minjeny kónc tydźenja prezentowali. Wjacori wobydlerjo wočinichu za to swoje statoki. Na nich hraješe pozawnowy chór, holcy w serbskej narodnej drasće rozdawachu specielnje prasowane jubilejne brikety a stare traktory běchu runje tak widźeć kaž prěnje płody ze zahrodow a Sprjejčanskich polow. Na pobrjohu Małeje Sprjewje poskićachu k wobjedu karpy a pstruhi. Tež we wosadnym domje předstajichu serbske nałožki, mjez druhim debjerki jutrownych jejkow ze wsy, z gmejny a z bliskeho Grodka. Wotewrjene statoki nadeńdźechu mjez wopytowarjemi tež tohodla přewšo dobry wothłós, dokelž móžachu sej woni wšudźe něšto k jědźi a k piću popřeć.

Wjeršk 600. róčnicy bě sobotu swjedźenski ćah. We wjace hač 20 wobrazach stawizny wsy originelnje předstajichu. Pěstowarske dźěći pokazachu ptači kwas, bywše konsumowe předawarki ze Zakrjejca běchu runje tak pódla kaž gmejnska sotra na Łastojčce. Dale widźeć běštej wohnjowoborne hašenske jězdźidło z lěta 1953 a drje najmoderniše hašenske jězdźidło Hornjeje Łužicy, a to ze zawodoweje wobory LEAG. Sobu kročił je w ćahu Nowoměšćanski serbski kwasny ćah.

Po njedźelnym pisanym programje móžeše wjesny předstejićer Werner Reeb předychać, nic jenož temperaturow dla. Krótko do swjedźenskeho finala knježeše we wsy hišće raz wulki njeměr, dokelž bě so srjedu při natwarje stana hłowny milinowód za Sprjejcy skóncował. Hač do wječornych hodźin bě wša wjes bjez miliny. Na zbožo so poradźi škodu zwuporjedźeć, tak so móžachu wulkotny swjedźenski kónc tydźenja dožiwić.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND