Tójšto dopisow a mejlkow z prawym wuhódanjom hodowneje křižowki „Wjesołe hodowne dny“ smy do redakcije dóstali. Kóždy wotpósłar drje so nětko na myto nadźija. Dokelž pak jeno tři mamy, dyr­bješe redakciska fortuna mjena dobyćerjow wućahnyć. Tak móže sej Marija Šwejdźina ze Sulšec z dalšej wosobu na hornjoserbsku premjeru ptačeho kwasa SLA 26. januara do Radworja dojěć. Na wopyt premjery inscenacije NSLDź „Wopušćeny dom“ 9. měrca smě so ­Janika Dreßlerowa z Budyšina wjeselić. A w LND wušłu słuchoknihu „Alfons Frencl – Po serbskich šćežkach“ přewostajimy Jürgenej Rühmannej z Radeberga.

Po dobrej tradiciji wotmě naša wjesna Domowinska skupina Šunow-Konjecy njedawno zaso swoju hodowničku, zwjazanu z hłownej zhromadźiznu w Konječanskej Burskej stwě. Pilne žony běchu z wjesnymi dźěćimi tónraz bajku „Připołdnica“ nazwučowali. Wšitko běchu dźěći ze swojimi pomocnicami zhromadnje zmištrowali a sej mjez druhim wosoby wumyslili, teksty zestajeli, kulisy wobstarali a so staru dźěłansku drastu woblekli. Za swoju spodobnu inscenaciju žnějachu młodźi dźiwadźelnicy wulki dźak a připóznaće.

Předsydka Kerstin Mauwowa poda rozprawu wo dźěle skupiny, Andreja Lanzyna rozprawješe wo tuchwilnym stawje našeje skupinskeje pokładnje. Wobě rozprawje čłonojo schwalichu. Zwjeselace je, zo móžachmy kónc minjeneho lěta štyrjoch dalšich wjesnjanow do našeje Domowinskeje skupiny witać.

Při bjesadźe a spěwje rjana hodownička wuklinča. Alojs Langa

Mjeztym zo we wjesnych kónčinach dobrowólnych wohnjowych wobornikow w nuzowym padźe wołaja, přijědu w Budyšinje jako prěni powołanscy wobornicy k hašenju abo njezbožam.

Budyšin (SN). Nowych sobudźěłaćerjow dóstanje přichodnje Budyska powołanska wohnjowa wobora. Jedna žona a pjećo mužojo su swoje wukubłanje zahajili resp. to w aprylu činja. Jich žiwjenske srjedźišćo budźe w přichodnymaj lětomaj krajna wohnjowoborna šula w Narću pola Wojerec. Prjedy hač potom statne pruwowanje złoža, zmištruja woni wšelake praktikumy w Budyšinje a druhich powołanskich wohnjowych woborach. Wukmanić so na wuchowanskeho sanitetarja je tohorunja dźěl jich wukubłanja.

Jězorinowy klinikum wotewrje nowu paliatiwnu staciju

Wojerecy (AK/SN). Po wosom měsacach twarskeho časa wotewru přichodnu wutoru we Wojerowskim jězorinowym klinikumje nowu paliatiwnu staciju. Změja tam šěsć stwow stajnje za jednoho pacienta. „Organizatorisce je wulke wužadanje, jich zastarać. Terapijowy plan a dnjowy­ wotběh chcemy indiwidualnje zestajeć a na potrěbnosće a přeća kóždeho jednotliwca wu­směrić“, podšmórny wčera fachowa lěkarka za nutřkownu medicinu a šef­lěkarka za geriatriju a paliatiwnu medicinu w jězorinowym klinikumje Michaela Stöckel. Wona je nowinarjam swój nowy wotrjad předstajiła.