Šćežka wažna za turizm
W Hamorskej gmejnje planuja wjacore dróhotwarske projekty
Delni Wujězd (AK/SN). Sakski krajny zarjad za dróhotwar a wobchad (LASuV) chce podłu zwjazkoweje dróhi B 156 zapadnje Delnjeho Wujězda kolesowansku šćežku hač k wotbóčce do Lipin twarić. Dale budźetej hłownej pućej w Rychwałdźe a Klětnom ponowjenej. Přez wobě wsy wjedźe statna dróha S 131. Tele tři naprawy rozłoži nawoda Budyskeje wotnožki LASuV Andreas Biesold na wčerawšim posedźenju Hamorskich gmejnskich radźićelow.
Šćežka zapadnje Delnjeho Wujězda je wažna za kolesowanski turizm. Wona ma 1,6 kilometrow dołha a 2,5 metrow šěroka być. Hižo lěta 2013 běchu ju planować započeli. Tuchwilu je předwidźane, zo nastanje zapadnje Delnjeho Wujězda, hdźež B 156 do směra na Běłu Wodu wotboča, kružny wobchad. W nim je tež kolesowanska šćežka wobkedźbowana. Hač do klětušeho ma wšitko doplanowane być, tak zo móža w lěće 2020 abo najpozdźišo 2021 twarić započeć.
Wosebite dožiwjenje mějachu wčera dźěći Radworskeje katolskeje ...
Krótkopowěsće (11.09.18)
Dwaceći namjetow dóšło
Budyšin. Nominowanska faza za 23. hornjołužiske předewzaćelske myto je nimo. A Marketingowa towaršnosć Hornja Łužica-Delnja Šleska zdźěla, zo je 20 namjetow předewzaćow z wokoliny dóšło. 18. septembra chce jury wo mytach rozsudźić. We wobłuku Hornjołužiskeho hospodarskeho dnja 8. nowembra w Lubiju budźe myto spožčene.
Wotewru nowu přehladku
Budyšin. Nowu stajnu wustajeńcu „Jatba pod hokatym křižom. Budyšin I a Budyšin II 1933 – 1945“ chcedźa jutře za tydźeń w Budyskim wopomnišću wotewrěć. W srjedźišću steja wopory režima nacijow, zajate tehdy w sprjewinym měsće. Z přehladku ma so tež na stawizny jastwa na Weigangowej pokazać, kotrež su w zjawnym wědomju dotal hłownje z NDRskim časom zwjazane.
Ben Foster jako Žižka
Hišće lětsa šulu přetwarja
Swójski podźěl gmejny za wohnjoškit mjeńši hač planowany
Chrósćicy (JK/SN). Wo stawje přihotow, přetwarić Chróšćansku staru šulu na zetkawanske a gmejnske srjedźišćo, informowaše wjesnjanosta Marko Kliman (CDU) Chróšćanskich gmejnskich radźićelow na zašłym posedźenju w Nuknicy. Nazornje a z pomocu twarskich podłožkow je tam architekt Marko Dźisławk radźićelam planowane naprawy rozjasnił. Kaž wón zdźěli, su dźěła wupisane. Byrnjež twarske firmy tučasnje z nadawkami derje wućežene byli, gmejna po měnjenju Dźisławka dosć poskitkow dóstanje. Te wočakuja w přichodnymaj tydźenjomaj, tak zo móže gmejnska rada nadawki w oktobru rozdawać. Twarske naprawy měli so w nowembru započeć a klětu w februaru zakónčene być. Wulki dźěl trěbnych wudawkow financuje gmejna z pomocu spěchowanskich srědkow. Předpołožene plany architekta radźićelow pohnuchu, tu a abo tamnu ideju dodać abo wobmyslenja wuprajić.
Wiki, wobchody a pomniki wabili
Terminy přizjewić
Budyšin. Rěčny centrum WITAJ namołwja młodźinske kluby, towarstwa a skupiny, swoje terminy za lěto 2019 přizjewić, zo móhli je do přichodneje młodźinskeje protyki zapřijeć. Terminy hodźa so e-mailnje pod protyka2019@ gmx.de abo na Facebooku pod protyka 2019 zapodać.
W stolicy serbować
Berlin. Přichodne Serbske blido w Berlinje budźe štwórtk, 13. septembra, w 16 hodź. w hosćencu „Einstein Kaffee“ na Friedrichowej 206. Štóž ma lóšt a chwile so na měsačnych zetkanjach wobdźěleć, zo by w cuzbje maćeršćinu hajił, je stajnje lubje witany. Za Serbskim blidom w Berlinje maja zajimcy dobru składnosć, swoje rěčne kmanosće nałožować a skrućeć.
Kamjenje postajić dać
Kamjenc. Štóž chce wědźeć, kotre wosebite kamjenje wón doma ma, zhoni to jutře, wutoru, wot 17 hodź. w Kamjenskim Muzeju zapadneje Łužicy. Muzejowy geologa Jens Czoßek přewjedźe tam kamjenjowu rěčnu hodźinu.
Policija (10.09.18)
Padušnu cwólbu zajeli
Nadźanecy. Štyri wosoby wopřijacu padušnu cwólbu je policija minjeny pjatk w Nadźanecach (Nadelwitz) pola Budyšina zajała. Swědcy běchu do toho podhladne awto na parkowanišću kupnicy wobkedźbowali. Jako tam zastojnicy přijědźechu, zwěsćichu woni štyri wosoby, kotrež pod swojej drastu a w tobołach rubiznu z wokolnych wobchodow k awtu njesechu. Při tym jednaše so wo elektroniku a kosmetiku w hódnoće něhdźe 600 eurow. Někajku kupnu kwitowanku za to třo mužojo w starobje 31, 42 a 45 lět kaž tež 21lětna žona předpołožić njemóžachu. We wokolnych wobchodach so nimo toho podhlad wobkrući, zo tam pokradnjene wěcy pobrachowachu. Wšěch štyrjoch na to zajachu a awto za dalše přepytowanja sćazachu.
Pjenjezy za wjesne srjedźišćo
Dźěwin (AK/SN). Wot Swobodneho stata Sakskeje přizwolene srědki za zesylnjenje wjesneje kónčiny chce gmejna Dźěwin (Groß Düben) zmysłapołnje wužiwać. Hač do lěta 2020 dóstanje wona nětko lětnje 70 000 eurow. Wotpowědnje ličbje wobydlerjow chcedźa sumu tak rozdźělić, zo dóstawa Dźěwin po 38 000 eurach a Brězowka po 32 000 eurach. To je gmejnska rada na swojim zašłym posedźenju wobzamknyła.
W Dźěwinje móža pjenjezy jako swójski podźěl za nowowuhotowanje wjesneho srjedźišća trjebać. Tam dyrbja při wohnjowobornej gratowni parkowanske městna wutworić. Nastać matej dale wotpočnišćo za kolesowarjow a mała pěc, kaž gmejnski radźićel Harald Rösch z Dźěwina rozłoži. Dohromady płaći předewzaće něhdźe 150 000 eurow, kotrež Sakska ze 113 000 eurami spěchuje.
Tež w Hornjej Łužicy běchu wčera na mnohich městnach ...
Krótkopowěsće (10.09.18)
Mjezynarodne pěsnje w parku
Wochozy. Z 1. němsko-serbskim chórowym festiwalom zakónči so wčera we Wochožanskim parku błudźenkow tamniše hudźbne lěćo. Serbski muski chór Delany a Błótowski žónski chór Lubin stej něhdźe sto wopytowarjow z łužiskimi a słowjanskimi spěwami zabawjałoj. Nimo toho předstaji so Wojerowski wokalny ansambl Kontrapunkt.
Nowy wobsedźer ze Słowakskeje
Niska. Wagonownja w Niskej ma noweho wobsedźerja. Słowakski koncern Tatrawagonka je łužiski zawod přewzał, zaručejo dale něhdźe 300 dźěłowych městnow a pjećlětne dalewobstaće Nišćanskeho stejnišća. Předewzaće Tatrawagonka je ze zawodami w Němskej, Pólskej, Serbiskej a Indiskej najwjetši twarc nakładnych wagonow.
„Disidentsku šćežku“ wotewrěli
