Čěscy hosćo na swjedźeń přijěli
Dworowy swjedźeń na Rownjanskim Njepilic statoku je tam kóžde lěto jedyn z wjerškow wjesneho žiwjenja. Njedźelu na mjeztym 18. swjedźeń je znowa tójšto ludźi přichwatało.
Rowno (JoS/SN). Kulturne cyłki z Choćebuskeho a Wojerowskeho regiona kaž tež z čěskeho Chomutova su zawčerawšim kulturny program 18. dworoweho swjedźanja na Njepilic statoku w Rownom wuhotowali. Zahajili běchu jón z dwurěčnej bohosłužbu, na kotrejž je fararka Jadwiga Malinkowa tohorunja dźěćo wukřćiła. We wobłuku burskich wikow poskićachu najwšelakoriše regionalne wosebitosće, kaž samopječeny tykanc, pražene swinjo, jejkacu poliwku a wosebity chlěb z Čamarjec pjekarnje.
Saněruja šulsku sportownju
Gmejnska rada Łaz twarskej nadawkaj za Wulke Ždźary přepodała
Łaz (AK/SN). Po tym zo je Łazowska gmejna we Wulkich Ždźarach tamnišu zakładnu šulu „Při Hórnikečanskim jězoru“ zdźěla ponowiła, chcedźa tam tež šulsku sportownju saněrować. Za to su čłonojo gmejnskeje rady na swojim zašłym posedźenju wažnej nadawkaj přepodali. Přetwar a wobmjetk w hódnoće 159 000 eurow ma zawod z Brěžkow wobstarać. Elektriske dźěła we wobjimje 67 000 eurow změje předewzaće z Němcow zwoprawdźić. Sportownja ma w prěnim połlěće 2018 dosaněrowana być.
Policija (26.09.17)
Tajkile cirkus
Załom. K rozestajenju mjez wowčerjom a sobudźěłaćerjemi cirkusa je zawčerawšim wječor w Załomju nad Sprjewju dóšło. Tam chcyše šef cirkusa ze swojimi přistajenymi cirkusowy stan natwarić, je pak sej za to wopačnu městnosć wupytał. Město łuki, za kotruž mějachu dowolnosć, rozsudźichu so póćmje za wopačnu ležownosć. To pak so jeje wobsedźerjej scyła njelubješe. Ze swojim awtom měrješe so tuž runu smuhu na direktora, tón pak móžeše nabok skočić a so njezrani. Wowčer na to z awta wulěze a so do direktora da. Dalšej eskalaciji 20lětny sobudźěłaćer cirkusa zadźěwa, při čimž pak so wowčer zrani a so na to z awtom zminy. Přiwołani policisća muža doma wopytachu a zwěsćichu, zo měješe wón 0,52 promilow alkohola w kreji. Tak sej jeho jězbnu dowolnosć hnydom wobchowachu. Sobudźěłaćerjo cirkusa mjeztym ze swojim direktorom stan na prawe městno přestajichu.
Z třomi promilemi po awtodróze
Wiki, Romantica a nowa strona
Budyske towarstwo Nutřkowne město předstaji na wčerawšej nowinarskej konferency swoje přichodne wjerški, mjez druhim 15. romanticu, kotraž steji pod hesłom „Hra elementow“.
Budyšin (SN/bn). Na wčerawšej nowinarskej konferency Budyskeho towarstwa Nutřkowne město předstaji zajimowe zjednoćenstwo přichodne projekty, z kotrymiž chce nazymu za město wabić, turizm zesylnić a tak wikowarjow, rjemjesło a gastronomiju podpěrać.
Nowy kružny wobchad na statnej dróze S 100 mjez Błohašecami a ...
Hłowne wustawki modifikowali
Budyšin (SN/at). Budyski wokrjesny sejmik je na swojim wčerawšim posedźenju hłowne wustawki wokrjesa modifikował. Hłowne wuchadźišćo běchu změny z lěta 2016 a 2017 w rozdawanskim prawje. Te mějachu so nětko do hłownych wustawkow přiwzać, zo by dokument zaso aktualnemu prawniskemu połoženju wotpowědował, kaž krajny rada Michael Harig (CDU) wuswětli. We wobłuku nad ekstremnej hódnotu rozdawanskeho prawa za dodawanja a posłužby kaž tež za wukony swobodnych powołanjow buchu rjadowanja předpisow VOL/A a VOF bjez zarunanja šmórnjene. Rozdawanske regularije su nětko w postajenju wo rozdaću zjawnych nadawkow (VGV) zjimane. Tomu su hłowne wustawki přiměrili.
Při tej składnosći su rjad dypkow hłownych wustawkow konkretizowali. Na přikład wobsahuje § 8 wotr. 4 nětko pokazku na to, rjadować zarunanje kóštow za šulerski transport. Přisłušnosć k serbskemu ludej je w § 13 rozłožena, dotal bě to § 12. Nastupajo přirjadnikow/přirjadnicy zapisachu nowy § 11.
Krótkopowěsće (26.09.17)
Wjace politiskeho kubłanja
Drježdźany. Sakska chce politiske kubłanje na šulach dale polěpšić. Gremij ekspertow je w nadawku statneje ministerki za kultus Brunhild Kurth (CDU) 31 poručenjow zdźěłało. Za to dyrbja so wučerjo, njewotwisnje wot fachoweje kombinacije, a socialni dźěłaćerjo dale kubłać. Šulerjo maja dóstać wjace prawow sobupostajowanja.
„Skupina 47“ online
Waischenfeld. Němsku literaturu w druhej połojcy 20. lětstotka rozsudnje wobwliwowaca „Skupina 47“ je nětko ze swojim nowym online-poskitkom prezentna. We wobłuku 50. róčnicy poslednjeho zeńdźenja originalneje skupiny wuhotuje město Waischenfeld jubilejny swjedźeń, na kotrymž so wšitcy hišće žiwi awtorojo wobdźěla. W duchu załožerja Hansa-Wernera Richtera chce literarny dorost přichodnje spěchować.
Škodowki tež z Němskeje?
Rozprawja wo Peruwje
Budyšin. Přichodne zarjadowanje Budyskeho kluba wuchowarjow rěče wotměje so jutře, wutoru, w 19 hodź. we wobłuku Mjezykulturneju tydźenjow w Budyskej měšćanskej bibliotece. Tam předstaji Yuri Lévano García w hudźbnje wobrubjenym přednošku swoju domiznu Peru kaž tež jeho krajinowu, rěčnu a kulturnu mnohostronskosć. Wšitcy zajimcy su na zarjadowanje wutrobnje přeprošeni. Zastup je darmotny.
Přednošuje wo młynach
Budyšin. Młyny w Budyskim sprjewinym dole wot 14. do 20. lětstotka steja w srjedźišću přednoška jutře, wutoru, w 19 hodź. w Muzeju Budyšin. Muzeologa Hagen Schulz rozprawja wo najwšelakorišich wódnych młynach, kotrež su dołhi čas wobraz sprjewineho doła postajeli. Dohromady hodźi so 28 připrawow dopokazać, kotrež buchu wot wódnych kołow ćěrjene. W swojim přednošku zaběra so Schulz tež z prašenjom, kotry wuznam mějachu młyny za hospodarske wuwiće města.
Pancate wjedro klubu činiło
Wužitne dźěło wukonjała
Młodostna Monika Bulankec z Prawoćic widźeše po politiskej změnje jako w Lipsku wukubłana chorobna sotra wobšěrniše nadawki. Wulka nuza bě w dźěsćownjach w sobu najchudšim kraju Europy, mjenujcy w Rumunskej. Wo tym rozprawješe wona tele dny skupinje Budyskich katolskich serbskich seniorow.
Tež hdyž běchu diasowe wobrazy mjeztym chětro njejasne, zawostaji rozprawa wudateje Moniki Süßoweje, kotraž bydli ze swójbu we Wopakej a dźěła po pedagogiskim studiju pola Serbskeho šulskeho towarstwa w Budyšinje, w připosłucharjach hłuboki zaćišć. Z towaršku wjedźeše ju puć do městačka Cristuru Secuiesc w Sedmihródskej. Tež hdyž su Madźarojo w Rumunskej narodna mjeńšina, w tymle regionje tworja woni zdawna wjetšinu, mjenuja městačko Székelykeresztúr, němsce pak Szeklerkreuz.
